စစ်ကိုင်းတိုင်း စစ်ကိုင်းမြို့ တပ်မ (၃၃) မှ ထွက်လာသည့် စစ်ယာဉ်တန်းနှင့် မိုင်းရှင်းရန်လာသည့် စစ်ကောင်စီစစ်ကြောင်းအား ကြားဖြတ်တိုက်ခိုက်ကြောင်း Phoenix-Sagaing အဖွဲ့ထံမှ သိရသည်။

စစ်ကိုင်းမြို့ တပ်မ (၃၃) မှ ထွက်လာသည့် စစ်ယာဉ်တန်းအား ၂၀၂၄ခုနှစ် ဒီဇင်ဘာလ (၂၃)ရက်နေ့ နေ့လယ် (၁၁)နာရီခွဲခန့်တွင် အုန်းတော ဖွံဖြိုးရေး တက္ကသိုလ်အနီး ရေမျက်လမ်းခွဲ၌ တော်လှန်ရေးပူးပေါင်းတပ်ဖွဲ့မှ မိုင်းဆွဲတိုက်ခိုက်ခဲ့ခြင်းဖြစ်ကြောင်း သိရသည်။

တိုက်ခိုက်မှု ဆောင်ရွက်ပြီးနောက် အဆိုပါ နေရာအား မိုင်းရှင်းလင်းရန်လာသည့် စစ်ကောင်စီစစ်ကြောင်းအား ထပ်မံကြားဖြတ်၍ ပစ်ခတ်တိုက်ခိုက်ခဲ့ကြောင်း Phoenix-Sagaing အဖွဲ့က ဆိုသည်။

အဆိုပါ တိုက်ခိုက်မှုအတွင်း စစ်ကောင်စီတပ်ဖွဲ့ဝင် (၁၂)ဦး သေဆုံးပြီး အများအပြား ထိခိုက်ဒဏ်ရာရရှိခဲ့ကြောင်း ထုတ်ပြန်ထားသော်လည်း Tachileik News Agency အနေဖြင့် သီးခြားအတည်မပြုနိုင်ပါ။

တိုက်ခိုက်မှု ဆောင်ရွက်နေစဉ်အတွင်း တော်လှန်ရေးပူးပေါင်းတပ်ဖွဲ့မှ တပ်ဖွဲ့ဝင် (၁)ဦး ကျဆုံးပြီး ၊ (၂)ဦး ထိခိုက်ဒဏ်ရာ ရရှိခဲ့ကြောင်း သိရသည်။

အဆိုပါ တိုက်ခိုက်မှုအား Phoenix (Sagaing)၊ စစ်ကိုင်းမြို့နယ်(ပကဖ)၊ Generation z Power - GZP (Mandalay) ပြည်သူ့ကာကွယ်ရေး မြို့ပြပြောက်ကျားတပ်ဖွဲ့၊ Taw Twin Tup Pee (LDF) နှင့် BRA (LDF) အဖွဲ့တို့မှ ပူးပေါင်းဆောင်ရွက်ခဲ့ခြင်းဖြစ်ကြောင်း သိရသည်။

#TachileikNewsAgency

#TNA_LE

Photo: Phoenix-Sagaing