မန္တလေးမြို့ရှိ စစ်ကောင်စီတပ်၏ အလယ်ပိုင်းတိုင်းစစ်ဌာနချုပ် (လပခ) အတွင်းသို့ ယနေ့ ၂၀၂၄ခုနှစ် စက်တင်ဘာလ (၃)ရက်နေ့ နံနက်ပိုင်းတွင် (၁၀၇)မမ ရှော့တိုက်ဒုံး (၁၀)လုံးဖြင့် ပစ်ခတ်တိုက်ခိုက်ရာ (၇)လုံးကိုအောင်မြင်စွာ ပစ်ခတ်တိုက်ခိုက်နိုင်ခဲ့ကြောင်း Brave Warriors for Myanmar-BWM ကထုတ်ပြန်သည်။
အလယ်ပိုင်းတိုင်းစစ်ဌာနချုပ်(လပခ) သည် တော်လှန်ရေးအင်အားစုများဆင်နွှဲနေသော ၁၀၂၇ ဒုတိယလှိုင်း၊ ရှမ်း-မန်း စစ်ဆင်ရေးတွင် အာဏာသိမ်း စစ်ရှုံးကောင်စီဘက်မှ တန်ပြန်ခုခံနေသော စစ်စခန်းများကို အဓိက ကွပ်ကဲနေသည့် အရေးပါသော စစ်တိုင်းဌာနချုပ်(၂)ခုထဲမှ တစ်ခုဖြစ်သဖြင့် တိုက်ခိုက်ခြင်းဖြစ်သည်ဟု ဆိုသည်။
တော်လှန်ရေးအင်အားစုများက အဆိုပါ စစ်တိုင်းကွပ်ကဲရေး ဌာနချုပ်နှစ်ခုထဲမှ တစ်ခုဖြစ်သည့် အရှေ့မြောက်တိုင်းစစ်ဌာနချုပ်(ရမခ) ကို သိမ်းပိုက်နိုင်ခဲ့ပြီးဖြစ်ကာ BWM အဖွဲ့နှင့် မဟာမိတ်အဖွဲ့များကလည်း တော်လှန်ရေး အင်အားစုများ၏ ၁၀၂၇ ဒုတိယလှိုင်း ရှမ်း-မန်းစစ်ဆင်ရေးကို ပူးပေါင်းပါဝင်ကူညီသည့်အနေဖြင့် ကျန်ရှိနေသေးသော အလယ်ပိုင်းတိုင်းစစ်ဌာနချုပ်ကို (၁၀၇)မမ ရှော့တိုက်ဒုံးများဖြင့် တိုက်ခိုက်ရခြင်းဖြစ်ကြောင်း ထုတ်ပြန်ထားသည်။
ယနေ့တိုက်ခိုက်မှုသည် BWM နှင့်မဟာမိတ်အဖွဲ့များက အလယ်ပိုင်းတိုင်းစစ်ဌာနချုပ်ကို ဒုတိယ အကြိမ်မြောက် တိုက်ခိုက်သော မစ်ရှင်ဖြစ်ပြီး ၂၀၂၃ ဒီဇင်ဘာကလည်း ပထမအကြိမ် တိုက်ခိုက်ခဲ့သေးသည်။
၂၀၂၄ ခုနှစ်အတွင်း BWM အဖွဲ့ သည် တော်လှန်ရေးမဟာမိတ်များနှင့်ပူးပေါင်း၍ အေလာလေတပ်စခန်းကို(၂)ကြိမ် ၊ တောင်ငူလေတပ်စခန်းကို (၃)ကြိမ်၊ တံတားဦး လေတပ်စခန်းကိုတစ်ကြိမ် တိုက်ခိုက်ခဲ့ပြီး စစ်ရှုံးစစ်ကောင်စီ ပြိုလဲသည်အထိ အရှိန်အဟုန်မြှင့်၍ တိုက်ပွဲဝင်သွားမည်ဖြစ်ကြောင်း ထုတ်ပြန်ထားသည်။
ယနေ့နံနက်(၄)နာရီအချိန်ခန့်တွင် လမ်း(၈၀×၁၁×၁၂)လမ်းကြား Kore အကြောပြင်တိုက်အပေါ် ဆုံးထပ်သို့ လက်နက်ကြီးတစ်လုံးကျရောက်ပြီး အမိုးပွင့်ကာ လူထိခိုက်မရှိကြောင်း သိရသည်။
"ကျုံးအနောက်မြောက်ဘက်ပေါ့။ ကျုံးဘေးကပ်လျက်ကိုကျတာ။ ပျက်စီးတာတွေတော့ရှိတယ်။"ဟု ဒေသခံတစ်ဦးက Tachileik News Agency ကိုပြောသည်။
ဒုတိယတစ်လုံးမှာ အမှတ်(၄)ရဲစခန်းအရှေ့ဘက်တိုက်သို့ ကျရောက်ကာ တိုက်အပေါ်ထပ် အုတ်နံရံပျက်စီးပြီး လူထိခိုက်မှုမရှိဟုသိရပြီး တတိယတစ်လုံးမှာ ရွှေကျင်တိုးဂိတ်သို့ ကျရောက်ပေါက်ကွဲသည်ဟု သိရသည်။
#TachileikNewsAgency
