မန္တလေးတိုင်း မြင်းခြံခရိုင် နွားထိုးကြီးမြို့နယ် ကုက္ကိုဇီးကျေးရွာဘုန်းကြီးကျောင်းဝန်းအတွင်း တပ်စွဲထားသည့် စစ်ကောင်စီတပ်ဖွဲ့ဝင်များအား တော်လှန်ရေးအင်အားစုများက ဝိုင်းဝန်းပိတ်ဆို့တိုက်ခိုက်ပြီး နှစ်ဦးအရှင်ဖမ်းမိကာ လက်နက်ခဲယမ်းများ သိမ်းဆည်းရမိကြောင်း မြင်းခြံခရိုင် အမှတ်(၄)တပ်ရင်း (NPDF) ထံမှ သိရသည်။

ရန်ကုန်-မန္တ‌လေး အမြန်လမ်းပိုင်း၏ အနောက်ဖက် (၁)မိုင်ခန့် နွားထိုးကြီးမြို့နယ် ကုက္ကိုဇီးကျေးရွာ ဘုန်းကြီးကျောင်းဝန်းအတွင်း တပ်စွဲအထိုင်ချထားသည့် အင်အား (၁၀)ဦးခန့် ပါရှိသည့် စစ်ကောင်စီတပ်ဖွဲ့ဝင်များအား သြဂုတ်လ (၂၉) ရက်နေ့ ညနေ (၃) နာရီဝန်းကျင်တွင် တော်လှန်ရေးအင်အားစုများက ဝိုင်းဝန်း ပိတ်ဆို့တိုက်ခိုက်ခဲ့ခြင်းဖြစ်ကြောင်း သိရသည်။

တိုက်ခိုက်မှုကြောင့် စစ်ကောင်စီတပ်ဖွဲ့ဝင် (၅) ဦး သေဆုံးပြီး ၊ ဗိုလ်ကြီး ဝေဖြိုးသူ နှင့် တပ်သား လှဖြိုးအောင်တို့အား အရှင်ဖမ်းဆီးရမိကာ ၎င်းတို့ထံမှ MA-5 ပစ္စတို (၂) လက် ၊ MA-1 (၃) လက် ၊ G3 (၁) လက် နှင့် 9 mm အူစီ (၁) လက်တို့ သိမ်းဆည်းရမိခဲ့ကြောင်း သိရသည်။

အဆိုပါ တိုက်ခိုက်မှုအား Natogyi People Defence Force-မြင်းခြံခရိုင်အမှတ် (၄)တပ်ရင်းနှင့် မြင်းခြံခရိုင် အမှတ်(၁၀)တပ်ရင်းတို့ ပူးပေါင်းဆောင်ရွက်ခဲ့ခြင်းဖြစ်ကြောင်း သိရသည်။

#TachileikNewsAgency