အာဏာသိမ်းစစ်ကောင်စီ၏ ရွေးကောက်ပွဲကော်မရှင်(UEC)က လူ့ဘောင်သစ်ပါတီ(NSP) နှင့် ဇိုမီးဒီမိုကရေစီအဖွဲ့ချုပ်ပါတီ(ZCDP)ကို ပါတီမှတ်ပုံတင်ခွင့်ကို ငြင်းပယ်လိုက်ကြောင်း ၂၀၂၄ခုနှစ် ဩဂုတ်လ(၅)ရက်နေ့က သတင်းထုတ်ပြန်လာသည်။

 လူ့ဘောင်သစ်ပါတီ(NSP) နှင့် ဇိုမီးဒီမိုကရေစီအဖွဲ့ချုပ်ပါတီ(ZCDP)တို့သည် နိုင်ငံရေးပါတီများမှတ်ပုံတင်ခြင်း ဥပဒေ ပုဒ်မ (၆)တွင် ပြဌာန်းထားသည့် သတ်မှတ်ချက်များနှင့် ညီညွတ်ခြင်းမရှိ၍ဟုဆိုကာ ငြင်းပယ်လိုက်ခြင်း ဖြစ်သည်။

၆.၈.၂၀၂၄ ထုတ် ကြေးမုံသတင်းစာကနေ ထုတ်ပြန်ထားပုံ

စစ်ကောင်စီ၏ အလိုကျ ပြန်ဌာန်းထားသည့် နိုင်ငံရေးပါတီများမှတ်ပုံတင်ခြင်း ဥပဒေအတိုင်း ပြန်လည် မှတ်ပုံတင်သည့် နိုင်ငံရေးပါတီများအနက် ပြည်ထောင်စုတိုးတက်ဖွံ့ဖြိုးရေးပါတီ (Union Development Party)၊ ရခိုင်အမျိုးသားပါတီ (Arakan National Party)၊ ကချင်အမျိုးသားကွန်ဂရက်ပါတီ [Kachin National Congress (KNC)]၊ ပြည်သူ့အင်အားပါတီ၊ လူ့ဘောင်သစ်ပါတီ(NSP) နှင့် ဇိုမီးဒီမိုကရေစီအဖွဲ့ချုပ်ပါတီ(ZCDP)စသည့် နိုင်ငံရေးပါတီ (၆)ခုသည် ပါတီမှတ်ပုံတင်ခွင့် ငြင်းပယ်ခံထားရခြင်း ဖြစ်သည်။

အာဏာသိမ်းကာလအလွန် ၂၀၂၁ခုနှစ် နိုဝင်ဘာလ(၁၆)ရက်နေ့ကစပြီး နိုင်ငံရေးပါတီအဖြစ် ပြန်လည် မှတ်ပုံမတင်သည့် အမျိုးသားဒီမိုကရေစီအဖွဲ့ချုပ်ပါတီ(NLD) အပါအဝင် နိုင်ငံရေးပါတီများနှင့် ပယ်ဖျက်ခံရသည့် နိုင်ငံရေးပါတီများမှာ (၄၅)ပါတီရှိသည်။

စစ်ကောင်စီအလိုကျ ပြန်လည်မှတ်ပုံတင်ရာတွင် အတည်ပြုခံရသည့် နိုင်ငံရေးပါတီ စုစုပေါင်းမှာ စစ်တပ်၏ ကျောထောက်နောက်ခံ နိုင်ငံရေးပါတီဖြစ်သည့် ပြည်ထောင်စုကြံ့ခိုင်ရေးနှင့်ဖွံ့ဖြိုးရေးပါတီ     အပါအဝင် (၄၈)ခုရှိကြောင်းလည်း သိရသည်။