တော်လှန်ရေးပူးပေါင်းတပ်များထိန်းချုပ်ထားသည့် မိုးကုတ်မြို့အနောက်ခြမ်းအခြေအနေများကို TNLA က ယနေ့ ၂၀၂၄ခုနှစ် ဇူလိုင်လ (၅)ရက်နေ့တွင် ထုတ်ပြန်လာသည်။
TNLA နှင့် တော်လှန်ရေးပူးပေါင်းတပ်များသည် မိုးကုတ်မြို့ရှိ စစ်ကောင်စီတပ်များကို ဇွန်လ (၂၅)ရက်နေ့မှ (၃၀)ရက်နေ့အတွင်း တိုက်ခိုက်ခဲ့ရာ ဒေါ်နန်းကြည်တောင်၊ အောင်သာယာ၊ ပန်းသပြေ၊ ဖြူရောင်ကုန်း၊ ရွှေမြင်ဝင်းတောင်၊ ရွှေမြင်တင်ဘုရားတောင်၊ မြို့ဦးလွင်၊ အေးစေတီတို့ရှိ တပ်စခန်းများနှင့် ကျပ်ပြင်ရဲစခန်းတို့ကို သိမ်းပိုက်နိုင်ခဲ့ခြင်းဖြစ်သည်။
မိုးကုတ်မြို့အနောက်ခြမ်တိုက်ပွဲတွင် စစ်ကောင်စီတပ်သား (၁၅)ဦး ဖမ်းဆီးရမိခဲ့ပြီး လက်နက်(၄၃)လက် သိမ်းဆည်းရရှိသည်ဟုလည်း TNLA က ထုတ်ပြန်ထားသည်။
မိုးကုတ်မြို့အနောက်ခြမ်းတွင် စစ်ကောင်စီတပ်စခန်းများမရှိတော့ဘဲ တိုက်ပွဲများအတွင်း အရပ်သား(၂)ဦး သေဆုံးရပြီး နေအိမ်(၁၀)လုံးကျော် ပျက်စီးသည်ဟု သိရသည်။
မိုးကုတ်မြို့တွင် စစ်ကောင်စီ တပ်မ(၉၉)၊ လပခ လက်အောက်ခံ ခလရ (၈၈)၊ ခလရ (၇၈)၊ ခလရ (၁၄၈)နှင့် မိုးကုတ်ဗျူဟာတို့ အခြေချသည့် တပ်များရှိပြီး ၎င်းတို့ဆုတ်ခွာထွက်ပြေးစဉ် KBZ Bank နှင့် CB Bank တို့အား ဖောက်ထွင်းပြီး ငွေသားနှင့် ကျောက်မြတ်ရတနာများ စုစုပေါင်းတန်ဖိုး ကျပ်သိန်းပေါင်း နှစ်သောင်းဝန်းကျင် ယူဆောင်သွားသည်ဟု သိရသည်။
#TachileikNewsAgency
Photo: PSLF/TNLA News
