စစ်ကိုင်းတိုင်း တန့်ဆည်မြို့နယ် မူးဂွရွာတွင် တပ်စွဲထားသည့် စစ်ကောင်စီတပ်ဖွဲ့ဝင်များအား Fixed-Wing Drone များဖြင့် ဗုံးသီးကြဲချတိုက်ခိုက်ကြောင်း ရွှေဘိုခရိုင်အမှတ် ၁၄ တပ်ရင်း၊ ရေဦးPDFမှ ယနေ့ ၂၀၂၄ခုနှစ် ဇွန်လ (၂၄) ရက်နေ့တွင် သတင်းထုတ်ပြန်သည်။
တန့်ဆည်မြို့နယ် မူးဂွရွာတွင်တပ်စွဲထားသည့် စစ်ကောင်စီတပ်ဖွဲ့ဝင်များအား ဇွန်လ (၂၃) ရက်နေ့ နေ့လယ် (၂)နာရီခန့်တွင် ရွှေဘိုခရိုင် အမှတ်(၁၄) တပ်ရင်း ဒရုန်းတပ်စုမှ Fixed-Wing Drone များဖြင့် ဗုံးသီး (၁၅)လုံး ကြဲချတိုက်ခိုက်ခဲ့ကြောင်း သိရသည်။
ဗုံးသီးများကျရောက်ပေါက်ကွဲပြီးနောက် စစ်အုပ်စုဘက်မှ လက်နက်ငယ်များဖြင့် ပြန်လည်ပစ်ခတ်သော်လည်း ပြည်သူ့ကာကွယ်ရေးတပ်ဖွဲ့ဝင်များ ထိခိုက်မှုမရှိဘဲ ပြန်လည်ဆုတ်ခွာနိုင်ခဲ့ကြောင်း သိရသည်။
အဆိုပါ တိုက်ခိုက်မှုအတွင်း စစ်ကောင်စီဘက်မှ ထိခိုက်ကျဆုံးမှုများကို ဆက်လက်စုံစမ်းနေကြောင်း ရေဦး PDF မှ ဆိုသည်။
ယခုတိုက်ခိုက်မှုသည် ရေဦး PDF အဖွဲ့၏ ဇွန်လအတွင်း စစ်ကောင်စီစခန်းများကို ဒရုန်းဖြင့် (၁၀) ကြိမ်မြောက်တိုက်ခိုက်ခြင်းဖြစ်ပြီး ပြီးခဲ့သည့် ဇွန်လ (၁၈) ရက်နေ့ကလည်း ရေဦးမြို့ရှိ စပါးဒိုင်ကွင်းအဟောင်းစခန်းနှင့် မြောက်ဘက်အထွက် စစ်ကောင်စီစခန်းတို့အား Fixed Wing Drone များဖြင့် ဗုံးသီးစုစုပေါင်း (၉)လုံးကြဲချတိုက်ခိုက်ခဲ့ကြောင်း သိရသည်။
အဆိုပါ တော်လှန်ရေးတပ်ဖွဲ့သည် အမျိုးသားညီညွတ်ရေးအစိုးရ၏ ကာကွယ်ရေးဝန်ကြီးဌာနလက်အောက်မှ ရေဦးမြို့နယ်အခြေစိုက်အဖွဲ့တစ်ခုဖြစ်ပြီး ၂၀၂၁ စစ်အာဏာသိမ်းမှုကြောင့် ပေါ်ပေါက်လာသည့် တော်လှန်ရေးအဖွဲ့များထဲမှ တစ်ခုဖြစ်သည်။
#TachileikNewsAgency
Photo: ရွှေဘိုခရိုင်တပ်ရင်း-၁၄ / YEU PDF
