မန္တလေးတိုင်း ပြင်ဦးလွင်ခရိုင် မတ္တရာမြို့နယ်အတွင်း ကျေးရွာများကို မီးရှို့ဖျက်ဆီးနေသည့် စစ်ကောင်စီစစ်ကြောင်းနှင့် ပြည်သူ့ကာကွယ်ရေး

ပူးပေါင်းတပ်ဖွဲ့များ ထိတွေ့တိုက်ပွဲဖြစ်ပွားပြီး လက်နက်ခဲယမ်းတချို့ သိမ်းဆည်းရမိကြောင်း မတ္တရာမြို့နယ် ပကဖ မဟာတပ်ဖွဲ့မှ 

သတင်းထုတ်ပြန်သည်။

မတ္တရာမြို့နယ်အတွင်း စစ်ကြောင်းထိုးနေသည့် ဖောကား (၅)စီးပါ စစ်ကောင်စီအင်အား (၁၅၀)ခန့်ပါရှိသည့် စစ်တပ်နှင့်ပျူစောထီး ပူးပေါင်းစစ်ကြောင်းသည် ၂၀၂၄ခုနှစ် ဇွန်လ (၁၈)ရက်နေ့တွင် ရေနံ့သာကျေးရွာ၏အရှေ့ဘက် (ဒေသအခေါ်-ကိုးပြွန်)တွင် ကားများရပ်၍ ခြေတော်ရာမှ မြို့ဒင်ကျေးရွာဘက်သို့ စစ်ကြောင်းထိုး ဝင်ရောက်ခဲ့ကြောင်း ၂၀၂၄ခုနှစ် ဇွန်လ (၂၂)ရက်နေ့တွင် သတင်းထုတ်ပြန်သည်။

ထို့နောက် အပြန်လမ်းတွင် ပြည်သာအေးကျေးရွာရှိ နေအိမ်များကို မီးရှို့ဖျက်ဆီးနေစဉ် ပြည်သူ့ကာကွယ်ရေးပူးပေါင်းတပ်ဖွဲ့များမှ လက်နက်ကြီးများဖြင့် ပစ်ခတ်ဟန့်တားခဲ့ရာ စစ်ကောင်စီပူးပေါင်းစစ်ကြောင်းမှ နောက်ကြောင်းပြန်ဆုတ်ခွာချိန်တွင် ပြည်သာအေးကျေးရွာ၏ အနောက်မြောက်ဘက်(ဒေသအခေါ်-ပိတ်ကွင်း)အရောက်တွင် ကြားဖြတ်တိုက်ခိုက်ခဲ့ကြောင်း သိရသည်။

စစ်ကောင်စီနှင့် ပြည်သူ့ကာကွယ်ရေးပူးပေါင်းတပ်ဖွဲ့များအကြား လက်နက်ကြီး၊ လက်နက်ငယ်များဖြင့် မိနစ် (၃၀)ကျော်ကြာ ထိတွေ့တိုက်ပွဲဖြစ်ပွားခဲ့ပြီး တိုက်ပွဲအပြီး အထိနာသွားသည့် စစ်ကောင်စီတပ်ဖွဲ့ဝင်များကို အပြန်လမ်းတွင် ထပ်မံမိုင်းဆွဲတိုက်ခိုက်ခဲ့ကြောင်း မဟာတပ်ဖွဲ့မှ ဆိုသည်။

တိုက်ခိုက်အတွင်း စစ်ကောင်စီထံမှ (၈၁)မမ လက်နက်ကြီး အဖူး တစ်ဖူး၊ (၇၃) မမ RPG အဖူး သုံးဖူး၊ (၇၅)မမ RPGအဖူး တစ်ဖူး၊ G-3ကျည် ၁၉ထောင့်၊ ၅.၅၆ကျည် ၆၃ထောင့်၊ ဆီတစ်ပုံးနှင့် Redmiအမျိုးအစား ဖုန်းတစ်လုံးတို့ကိုသိမ်းဆည်းရရှိခဲ့ကြောင်း သိရသည်။

အဆိုပါတိုက်ခိုက်မှုကို မတ္တရာမြို့နယ် ပကဖ မဟာတပ်ဖွဲ့နှင့်အတူ တိုက်နယ်(၃)ပကဖများဖြစ်သည့် နဂါးညီနောင်ပြည်သူ့ကာကွယ်ရေးတပ်ဖွဲ့ ၊ မိုးကြိုးပြောက်ကျားပြည်သူ့ကာကွယ်ရေးတပ်ဖွဲ့၊ မတ္တရာမြို့နယ်ပကဖနှင့် ကျားသစ်နက်စစ်ကြောင်းတို့မှ ပူးပေါင်းဆောင်ရွက်ခဲ့ခြင်းဖြစ်ကြောင်း သိရသည်။

#TachileikNewsAgency