ကရင်ပြည်နယ် မြဝတီမြို့နှင့် အနီးဝန်းကျင်နေရာများရှိ ကျားဖြန့်လုပ်ငန်းများထံပေးပို့မည့် ဖုန်းအလုံးပေါင်း တစ်ထောင်ကျော်ကို ထိုင်းနိုင်ငံ မဲဆောက်မြို့တွင် ထိုင်းအာဏာပိုင်များက ဖမ်းဆီးရမိကြောင်း ထိုင်းအာဏာပိုင်များထံမှ သိရသည်။
မြဝတီမြို့နှင့် အနီးဝန်းကျင်ရှိ ကျားဖြန့်လုပ်ငန်းများထံသို့ နယ်စပ်ဖြတ်ကျော်ကာ ခိုးသွင်းရန်ပြင်ဆင်ထားသည့် ဖုန်း(၁၀၆၂)လုံးကို ယနေ့ ၂၀၂၄ ခုနှစ် ဇွန်လ (၁၃)ရက်နေ့တွင် မဲဆောက်ခရိုင် အထူးတပ်ဖွဲ့သည် နယ်စပ်တစ်လျှောက် ကင်းလှည့်နေစဉ် သိမ်းဆည်းရရှိခဲ့ခြင်းဖြစ်သည်ဟု ဆိုသည်။
တာဝန်ရှိသူများက မဲဆောက်ခရိုင် သစိုင်းလွိုက်မြို့နယ် ဘန်သရက်နယ်မြေအား စစ်ဆေးရာ သေတ္တာ(၈)လုံးကိုတွေ့ရှိသဖြင့် စစ်ဆေးရာ သေတ္တာပေါ်တွင် စာလုံး KLK-T108 နှင့် တရုတ်စာလုံးများကို တွေ့ရှိရသည်ဟု သိရသည်။
စစ်ဆေးရာတွင် HUAWEI မော်ဒယ် P smart+2019 ပါ ဖုန်းများကို စစ်ဆေးတွေ့ရှိပြီး ဥပဒေကြောင်းအရ အရေးယူရန်လုပ်ဆောင်သွားမည်ဟု သိရသည်။
အာဏာပိုင်များကိုတွေ့ရှိသဖြင့် ဖုန်းများထည့်ထားသည့် သေတ္တာအား စွန့်ပစ်ပြီး ထွက်ပြေးသွားခြင်းဖြစ်သည်ဟုလည်း ယူဆထားသည်။
ထိုင်း-မြန်မာနယ်စပ် ကရင်ပြည်နယ် မြဝတီမြို့နယ်အတွင်း အွန်လိုင်းငွေလိမ်လုပ်ငန်း (ကျားဖြန့်)နှင့် အွန်လိုင်းလောင်းကစားလုပ်ငန်း လုပ်နေသည့် နိုင်ငံခြားသားများအားလုံး အောက်တိုဘာလ နောက်ဆုံးထားထွက်ခွာရန် ကရင်နယ်ခြားစောင့်တပ် (BGF) က မေလတွင် သတိပေးစာ ထုတ်ပြန်ခဲ့သည်။
မြဝတီမြို့အပြင် BGF ထိန်းချုပ်ရာ ရွှေက္ကိုလ်မြို့သစ်နှင့် မယ်ထော်သလေးဒေသရှိ KK Park စီမံကိန်းများသည် အွန်လိုင်းငွေလိမ်လောင်းကစားများအပြင် လူမှောင်ခိုကူးမှုနှင့် နိုင်ငံတကာရာဇဝတ်မှုများ ကျူးလွန်ရာနေရာအဖြစ် နိုင်ငံတကာက ဝေဖန်ထားသည်။
#TachileikNewsAgency
