စစ်ကိုင်းတိုင်း ယင်းမာပင်မြို့နယ်တွင် စစ်ကောင်စီတပ်ဖွဲ့ လက်အောက်ခံ ရဲတပ်ဖွဲ့ဝင်များကို ဒေသကာကွယ်ရေးတပ်များက ယနေ့ ၂၀၂၃ခုနှစ် အောက်တိုဘာလ (၃)ရက်နေ့ နံနက်ပိုင်းက ပစ်ခတ်တိုက်ခိုက်ခဲ့ရာ ရဲတပ်ဖွဲ့ဝင်များထံမှ လက်နက်(၃)လက် သိမ်းဆည်းရရှိခဲ့သည်ဟု ပြည်ထောင်စုလွတ်မြောက်ရေးတပ်ဦးထံမှ သိရသည်။

ယင်းမာပင်မြို့နယ် သီတဂူဘုန်းကြီးကျောင်းဝင်းအတွင်း တပ်စွဲထားသည့် ရဲတပ်ဖွဲ့ဝင်(၅)ဦးသည် ယနေ့ နံနက်(၆)နာရီတွင် စစ်ကောင်စီတပ်စခန်းကုန်းသို့သွားရာ မုံရွာ-ယာကြီး-ကလေးဝလမ်းပိုင်း၌ ဒေသကာကွယ်ရေးတပ်ဖွဲ့က စောင့်ဆိုင်းတိုက်ခိုက်ခဲ့ခြင်းဖြစ်ကြောင်း သိရသည်။

တိုက်ခိုက်မှုသည် (၇)မိနစ်သာ ကြာမြင့်ခဲ့ပြီး ရဲတပ်ဖွဲ့ဝင်(၂)ဦးသေဆုံးကာ ဒဏ်ရာရသူများလည်းရှိခဲ့ပြီး G-3 (၂)လက်၊ အူဇီတစ်လက်နှင့် ကျည်များကို ဒေသကာကွယ်ရေးတပ်ဖွဲ့က သိမ်းဆည်းရရှိခဲ့ခြင်းဖြစ်သည်ဟု သိရသည်။

တိုက်ခိုက်မှုကို ULF(ကော်မတီဝင်) ချိုမိုင်မိုင်တော်လှန်ရေးတပ်ပေါင်းစု(ယင်းမာပင်မြို့နယ်)မှ ရဲဘော် (၇)ဦးက လုပ်ဆောင်ခဲ့ခြင်းဖြစ်ကြောင်း သိရသည်။

#TachileikNewsAgency