ကရင်ပြည်နယ်အတွင်း ကြာအင်းဆိပ်ကြီးနှင့် ကော့ကရိတ်ဒေသတို့တွင် စစ်ကောင်စီတပ်နှင့် ပူးပေါင်းတပ်တို့ (၆)ရက်အကြာ တိုက်ပွဲပြင်းထန်ခဲ့ပြီး စစ်ကောင်စီတပ်က ကျေးရွာများသို့ လက်နက်ကြီးနှင့် ပစ်ခတ်သဖြင့် ဒေသခံ(၁၅၀၀)ကျော် စစ်ဘေးရှောင်ခဲ့ကြရသည်ဟု သိရသည်။

အာဏာသိမ်းစစ်အုပ်စု၏  ခြေလျင်တပ်များဖြစ်သည့်  ခလရ ၃၂ ၊ ခလရ ၂၈၃ ၊ ခလရ ၂၈၄  တပ်များကို တော်လှန်ရေးတပ်ပေါင်းစုများက ဝင်ရောက်တိုက်ခိုက်ခဲ့ရာ စစ်အုပ်စု၏ တပ်စခန်းနှစ်ခုကို သိမ်းယူနိုင်ခဲ့ပြီး ကျန်ရှိစခန်းတစ်ခုအား ဝင်ရောက်သိမ်းယူစဉ် စစ်ကောင်စီဘက်က လေကြောင်းပစ်ကူအများအပြားအသုံးပြုခဲ့ကြောင်း သိရသည်။

၎င်းတိုက်ပွဲများတွင် ပူးပေါင်းတပ်များက ၆၀ မမများ၊ ၄၀ မမများနှင့် RPG စသည့် လက်နက်ကြီးများဖြင့်သာ တိုက်ခိုက်ခဲ့ပြီး စစ်ကောင်စီတပ်သား အနည်းဆုံး(၉၀)ကျော်သေဆုံးသည်ဟု K.T.L.A(Lion Battalion Commando-ဗျူဟာစစ် ကြောင်း)က ထုတ်ပြန်ထားသော်လည်း အတည်ပြုနေဆဲဖြစ်သည်။

တိုက်ပွဲဖြစ်ပွားနေချိန်တွင် စစ်ကောင်စီတပ်က ကျေးရွာများအား ဦးတည်၍ လက်နက်ကြီးများဖြင့် ပစ်ခတ်ခဲ့ရာ ဒေသခံ(၁၅၀၀)ကျော်စစ်ဘေးရှောင်ခဲ့ရပြီး ဘုန်းကြီးကျောင်းအပါအဝင် နေအိမ်များလည်းပျက်ဆီးခဲ့ရကြောင်း သိရသည်။

လိုအပ်သည့် လက်နက်ခဲယမ်းများကို ပြန်လည်ဖြည့်တင်း၍ အခွင့်အခါသင့်သလို စစ်ကောင်စီတပ်အား တိုက်ခိုက်ချေမှုန်းမည်ဖြစ်ကြောင်း Lion Battalion Commando-ဗျူဟာစစ်ကြောင်းက ထုတ်ပြန်ထားသည်။

၎င်းစခန်းများကို K.T.L.A(Lion Battalion Commando-ဗျူဟာစစ်ကြောင်း)၊ အထူးစစ်ဆင်ရေးတပ်ဖွဲ့ S.O.F နှင့် အခြားသော ပူးပေါင်းတပ်ဖွဲ့များက တိုက်ခိုက် သိမ်းယူ ခဲ့ခြင်းဖြစ်သည်။

 

Photo: Lion Battalion Commando