ရှမ်းပြည်နယ် (အရှေ့ပိုင်း) ကျိုင်းတုံခရိုင်၊ မိုင်းပျဉ်းမြို့၌ မန္တလေး အိုးဘိုထောင်မှ လွတ်လာသည့် အမျိုးသမီးတစ်ဦးကို ၂၀၂၀ ခုနှစ်၊ ဒီဇင်ဘာလ (၁၃) ရက်နေ့တွင် RDT ဖြင့် စစ်ဆေးရာ COVID 19 ပိုးတွေ့ရကြောင်း သိရသည်။

“ပိုးတွေ့တဲ့အမျိုးသမီးက သူက မန္တလေး အိုးဘိုထောင်ကနေ လွတ်လာတာ။ အဲဒီကနေ တောင်ကြီးကို သွားတယ်။ တောင်ကြီးကနေ တခြားခရီးသည် (၁)ယောက်နဲ့အတူ ကားနဲ့ထွက်လာတယ်။ မိုင်းပျဉ်းရောက်တော့ ဒီခရီးသည် (၂)ဦးနဲ့ ယာဉ်မောင်းကို RDT နဲ့ စစ်လိုက်တော့ သူက positive ဖြစ်တယ်။ ကျန်တဲ့ ခရီးသည် (၁)ဦးနဲ့ ယာဉ်မောင်းကိုပါ quarantine ထားလိုက်တယ်။”ဟု ရှမ်းပြည်နယ်အရှေ့ပိုင်း ပြည်နယ်ပြည်သူ့ကျန်းမာရေးဦးစီးဌာန လက်ထောက်ညွှန်ကြားရေးမှူး ဒေါက်တာ ဘစိုးသက်က တာချီလိတ်သတင်းအေဂျင်စီသို့ ပြောသည်။

အဆိုပါ ပိုးတွေ့လူနာ အမျိုးသမီးသည် မန္တလေး အိုးဘိုထောင်မှ ဒီဇင်ဘာလ(၁၁)ရက်နေ့တွင် ပြစ်ဒဏ်စေ့လွတ်မြောက်လာသူဖြစ်ပြီး ယင်းနေ့မှာပင် တောင်ကြီးမြို့သို့ရောက်ရှိခဲ့ကာ ဟိုတယ်တစ်ခု၌ တည်းခိုနေထိုင်ခဲ့ခြင်းဖြစ်ကြောင်း သိရသည်။

ယင်းနောက် တောင်ကြီးမှနေ၍ ခရီးသည်တင်ယာဉ်ငယ်တစ်စီးအား အခြားခရီးသည်တစ်ဦးနှင့်အတူ ငှားရမ်းစီးနင်းလာခဲ့ခြင်းဖြစ်ကြောင်း သိရသည်။