ကိုရိုနာဗိုင်းရပ်စ် (COVID-19) ဖြစ်စဉ်ကြောင့် အသေးစား၊ အငယ်စားနှင့် အလတ်စားစီးပွားရေးလုပ်ငန်းများ အပေါ် အခွန်ကင်း လွတ်ခွင့်နှင့် သက်သာခွင့်များပေးနိုင်ရေးကို ၂၀၂၀ ခုနှစ် မတ်လ (၁၃) ရက်နေ့တွင် ဖွဲ့စည်းလိုက်သည့် စီးပွားရေးသက်ရောက်မှုများအပေါ် ကုစားရေးလုပ်ငန်းကော်မတီက ဆောင်ရွက်မည်ဟု သိရသည်။
ကမ္ဘာ့နိုင်ငံအများအပြားတွင် လတ်တလောဖြစ်ပွားနေသည့် COVID-19 ကြောင့် ပြည်တွင်းရှိ အသေးစား၊ အငယ်စားနှင့် အလတ်စားစီးပွားရေးလုပ်ငန်းများအပေါ် အခွန်ကင်းလွတ်ခွင့်နှင့် သက်သာခွင့်များ ပေးနိုင်ရေးအပါအဝင် အချက် (၆) ချက်ဆောင်ရွက်ရန် Corona virus Disease 2019(COVID-19) ကြောင့် ဖြစ်ပေါ်လာနိုင်သည့် စီးပွားရေးသက်ရောက်မှုများအပေါ် ကုစားရေးလုပ်ငန်းကော်မတီက ဆောင်ရွက်မည်ဟု သိရသည်။
COVID-19 ကဲ့သို့ ဖြစ်စဉ်များမှာ အနာဂတ်တွင်လည်း ထပ်မံပေါ်ပေါက်လာနိုင်ရာ ကုန်ကြမ်းပစ္စည်းများ ရရှိရေးကို တရုတ်နိုင်ငံတစ်ခုတည်းအား အမှီပြုနေရခြင်းအစား အခြားနိုင်ငံများမှ ကုန်ကြမ်းပစ္စည်းများ ဖြန့်ခွဲရယူနိုင်ရေး ပြင်ဆင်ဆောင်ရွက်ရန်၊ လိုအပ်ပါက ပြည်တွင်းစီးပွားရေးလုပ်ငန်းများအတွက် သက်သာသည့်အတိုးနှုန်းဖြင့် ချေးငွေများထုတ်ပေးနိုင်ရေး နိုင်ငံတော်သမ္မတရုံးသို့ သုံးသပ်တင်ပြရန် စသည့် လုပ်ငန်းစဉ် (၆) ရပ်ကို အဆိုပါကော်မတီက ဆောင်ရွက်မည်ဟု သိရသည်။
Corona virus Disease 2019(COVID-19) ကြောင့် ဖြစ်ပေါ်လာနိုင်သည့် စီးပွားရေးသက်ရောက်မှုများအပေါ် ကုစားရေးလုပ်ငန်းကော်မတီ ဥက္ကဌအဖြစ် ရင်းနှီးမြှပ်နှံမှုနှင့် နိုင်ငံခြားစီးပွားဆက်သွယ်ရေးဝန်ကြီးဌာန ပြည်ထောင်စုဝန်ကြီး၊ အတွင်းရေးမှူးအဖြစ် ရင်းနှီးမြှပ်နှံမှုနှင့် နိုင်ငံခြားစီးပွားဆက်သွယ်ရေးဝန်ကြီးဌာနမှ အမြဲတမ်းအတွင်းဝန်အပါအဝင် အဖွဲ့ဝင် (၇) ဦးဖြင့် ဖွဲ့စည်းလိုက်ပြီး နိုင်ငံတော်သမ္မတရုံး၏ အမိန့်ကြော်ငြာစာအမှတ်၊ ၄၆/၂၀၂၀ ဖြင့် ထုတ်ပြန်ထားခြင်းဖြစ်သည်။
Tachileik News Agency
