ရှမ်းပြည်နယ် (မြောက်ပိုင်း) လားရှိုးမြို့တွင် လားရှိုး - လင်ချမ်း စီးပွားရေးနှင့် ကူးသန်းရောင်းဝယ်ရေး ကုန်စည်ပြပွဲအား ပထမဦးဆုံးအကြိမ်ကျင်းပရန် ၂၀၁၉ ခုနှစ်၊ နိုဝင်ဘာလ (၁)ရက်နေ့တွင် လားရှိုးမြို့၌ ညှိနှိုင်းဆွေးနွေးနေပြီဖြစ်သည်။

"တရုတ်ဘက်ကတော့ လင်ချမ်း ဒုတိယမြို့တော်ဝန်နဲ့အဖွဲ့တွေလာတဲ့အတွက် ကျွန်တော်တို့ မြန်မာဘက်ကလည်း လားရှိုး ခရိုင်အထွေထွေအုပ်ချုပ်ရေးကနေ ဦးဆောင်ပြီးတော့ ဆွေးနွေးပွဲလုပ်တာပါ။ အဓိကဆွေးနွေးတာကတော့ ပြပွဲဖြစ်မြောက်အောင်လုပ်နိုင်ဖို့အတွက် လိုအပ်ချက်လေးတွေကို ညှိနှိုင်းဆွေးနွေးတာပါ။ ဘာတွေ လိုအပ်တယ်။ ဘာတွေလုပ်ပေးမယ်ဆိုတာတွေ ပြောကြပါတယ်" ဟု လားရှိုးမြို့တွင်ပြုလုပ်သည့် လုပ်ငန်းညှိနှိုင်းအစည်း အဝေးသို့ တက်ရောက်ခဲ့သည့် စားသုံးသူရေးရာဦးစီးဌာန ဒုတိယပြည်နယ်ဦးစီးမှူးရုံး(လားရှိုး)မှ ဒုတိယ ပြည်နယ်ဦးစီးမှူး ဦးဇော်မင်းသန်း က တာချီလိတ်သတင်းအေဂျင်စီသို့ ပြောသည်။

အဆိုပါပြပွဲကို နိုဝင်ဘာ (၂၁)ရက်နေ့မှ (၂၄)ရက်နေ့အထိ ကျင်းပမည်ဖြစ်ပြီး ပြခန်းပေါင်း ( ၁၃၁ )ခန်းတွင် အဓိကအနေဖြင့် ဆောက်လုပ်ရေးပစ္စည်း၊ အီလက်ထရောနစ်ပစ္စည်းစသည့် ထုတ်ကုန်များကို တရုတ်(လင်ချမ်း)ဘက်ရှိ ကုမ္ပဏီများမှ ဆိုင်ခန်းပေါင်း(၈၀)ဖြင့် ပြသမည်ဖြစ်ပြီး မြန်မာဘက်မှ လားရှိုးမြို့အပါအဝင် ဒေသအသီးသီးမှ ထွက်ကုန် များကိုပြသမည်ဟု သိရသည်။

အဆိုပါ လုပ်ငန်းညှိနှိုင်းအစည်းအဝေးတွင် တရုတ်နိုင်ငံဘက်မှ လင်ချမ်းခရိုင် ဒုတိယမြို့တော်ဝန်နှင့်အဖွဲ့ တက်ရောက်ခဲ့ပြီး  မြန်မာ-တရုတ် စီးပွားရေးနှင့်ကူးသန်းရောင်းဝယ်ရေးကုန်စည်ပြပွဲ အောင်မြင်စွာကျင်းပ နိုင်ရေး ဦးစီးကော်မတီမှ ဒုတိယဥက္ကဌ(ကိုယ်စား) လားရှိုးခရိုင်အထွေထွေအုပ်ချုပ်ရေးမှူးနှင့် ကုန်စည်ပြပွဲနှင့် သက်ဆိုင်သည့် ဌာနဆိုင်ရာအချို့တက်ရောက်ခဲ့သည်ဟု သိရသည်။

တရုတ်(လင်ချမ်း) နှင့် မြန်မာ(လားရှိုး)တို့ ပူးပေါင်းကျင်းပမည့် အဆိုပါပြပွဲများအား နှစ်စဉ် အလှည့်ကျ ကျင်းပသွားမည်ဖြစ်ကာ ၂၀၂၀ ခုနှစ်တွင် လင်ချမ်းမြို့၌ ပြုလုပ်သွားမည်ဟု သိရသည်။

သတင်း #နေဖြိုးမြင့်
ဓါတ်ပုံ - စားသုံးသူရေးရာဦးစီးဌာန