~~~~~~~~⊰❂ unicode ❂⊱~~~~~~~~

ကျောက်မဲမြို့တွင် ဆိုင်ကယ်ခိုးခံရမှု၊ ဆိုင်ကယ်စီးသူထံမှ လုယူခံရမှုများကို အမှုဖွင့်တိုင်ကြားကြရန် ရဲတပ်ဖွဲ့ တိုက်တွန်း
***********
ရှမ်းပြည်နယ်(မြောက်ပိုင်း) ကျောက်မဲမြို့တွင် ဆိုင်ကယ်ခိုးခံရမှု၊ ဆိုင်ကယ်စီးနင်းလာသူထံမှ လုယက်ခံရမှုများ ဖြစ်ပွားနေပြီး ၂၀၁၈ ခုနှစ် နိုဝင်ဘာလအတွင်း ဖြစ်ပွားမှုများလာသည်ဟု ဒေသခံများကဆိုသော်လည်း (၂)နှစ်တာကာလအတွင်း လုယက်ခံရမှု၊ ခိုးမှုများ အမှုဖွင့်တိုင်ကြားခြင်းမရှိကြောင်း ရဲတပ်ဖွဲ့ထံ သိရသည်။

" ရဲတပ်ဖွဲ့က ပြည်သူကိုဗဟိုပြုတဲ့စနစ်နဲ့ လုပ်ဆောင်နေရတာဖြစ်တဲ့အတွက် ပြည်သူတွေက ပူးပေါင်းပါဝင်ဖို့က  အဓိကကျပါတယ်။ ဆိုင်ကယ်တွေခိုးခံရတာ၊ လုခံရတာတွေဖြစ်လာရင် ရဲတပ်ဖွဲ့မှာလာပြီး တိုင်ကြား စေချင်ပါတယ်။ မူးယစ်ဆေးဝါးနဲ့ပတ်သက်တဲ့ သတင်းတွေလည်း တိုင်ကြားလို့ရပါတယ်။ တိုင်ကြားသူကို ရဲတပ်ဖွဲ့က ကာကွယ်ပေးထားမှာပါ" ဟု ကျောက်မဲမြို့မစခန်းမှူး ဒုရဲမှူး ဟန်ဝင်းလှိုင်က တာချီလိတ်သတင်းအေဂျင်စီသို့ ပြောသည်။

ကျောက်မဲမြို့မရဲစခန်းတွင် ၂၀၁၇ ခုနှစ်မှ ၂၀၁၈ ခုနှစ် နိုဝင်ဘာလ(၁၈)ရက်နေ့အထိ လုယက်မှု၊ ခိုးမှုနှင့် ပတ်သက်သည့် တိုင်ကြားမှု တစ်ခုမှမရှိကြောင်း သိရသည်။

"ပြည်သူကလည်း ရဲတပ်ဖွဲ့အပေါ် ယုံကြည်မှုလျော့ကျနေသလို ဖြစ်နေတယ်။ ဒါကြောင့် အမှုအခင်းတွေ၊ ပစ္စည်းပျောက်တာတွေ၊ လုခံရတာတွေကို သွားပြီးမတိုင်ကြဘူး။ လာမတိုင်ကြတော့ ရဲကလည်း သိသင့်သလောက် မသိဘူးဖြစ်နေတယ်။ အဲဒီလိုအခြေအနေကြောင့် ခိုးမှုတွေ၊ လုယက်မှုတွေ များလာတယ်လို့ ပြောရမှာပဲ။ အဓိကကတော့ ရဲတပ်ဖွဲ့နဲ့ ပြည်သူကြားမှာ ယုံကြည်မှုရှိနေကြဖို့လိုတယ်" ဟု ကျောက်မဲမြို့မှ အဖြူရောင်နှလုံးသားလူမှုကူညီရေးအသင်း ဥက္ကဌ ဦးမြဝင်းက တာချီလိတ်သတင်းအေဂျင်စီသို့ ပြောသည်။

ပြည်သူများအနေဖြင့် ရဲတပ်ဖွဲ့ထံ တိုင်ကြားမှုများရှိပါက အလေးထားဆောင်ရွက်သွားမည်ဖြစ်ပြီး မူးယစ်မှုများနှင့်ပတ်သက်၍ သတင်းပေးတိုင်ကြားလာပါက တိုင်ကြားသူနှင့် ပတ်သက်သည့် အချက်အလက်များကိုလည်း ကာကွယ်ပေးထားမည်ဖြစ်ကြောင်း ကျောက်မဲမြို့မစခန်းမှူးက ဆိုသည်။

ပြည်သူများအနေဖြင့် သတင်းပေးတိုင်ကြားမှုများအတွက် ကျောက်မဲမြို့မရဲတပ်ဖွဲ့ ဖုန်း 082 40028 သို့ ဆက်သွယ်နိုင်ကြောင်း သိရသည်။

သတင်း #နေဖြိုးမြင့်