ရှမ်းပြည်နယ်မြောက်ပိုင်း ကွတ်ခိုင်မြို့နယ်အတွင်း တပ်မတော်က မူးယစ်ဆေးဝါးနှင့် လက်နက်ခဲယမ်းများ ဆက်တိုက် သိမ်းဆည်းရမိ
ရှမ်းပြည်နယ် (မြောက်ပိုင်း) ကွတ်ခိုင်မြို့နယ်၊ လွယ်ခမ်ကျေးရွာအတွင်း တပ်မတော် နယ်မြေလုံခြုံရေး တပ်ဖွဲ့များက နယ်မြေရှင်းလင်းမှုအတွင်း မူးယစ်ဆေးဝါးများနှင့် လက်နက်ခဲယမ်းများ ဆက်တိုက် ဖမ်းမိနေရာ ၂၀၂၀ ခုနှစ်၊ မတ်လ (၈)ရက်နေ့ကလည်း နေရာ (၄)ခုမှ မူးယစ်ဆေးဝါးများနှင့် လက်နက်ခဲယမ်းများ ဖမ်းမိကြောင်း သိရသည်။
နယ်မြေလုံခြုံရေးတပ်ဖွဲ့ဝင်များက ၂၀၂၀ ခုနှစ်၊ မတ်လ (၈)ရက်နေ့ နံနက် (၇) နာရီခွဲဝန်းကျင်တွင် ကွတ်ခိုင်မြို့နယ်၊ ရှောက်ဟော်ကျေးရွာမှ ထွက်ပြေးတိမ်းရှောင်နေသော ဦးယောဆီ ပိုင်ဆိုင်သည့် လွယ်ခမ်ကျေးရွာရှိ အဆောက်အဦတစ်လုံးအတွင်း ဝင်ရောက်ရှာဖွေရာ 88/1 စာတန်းပါ ပန်းရောင် စိတ်ကြွ ရူးသွပ်ဆေးပြား (၇၈၀,၀၀၀) ပြား၊ WY စာတန်းပါ ပန်းရောင်စိတ်ကြွ ရူးသွပ်ဆေးပြား (၃၃၀၀၀၀) ပြား၊ ဘိန်းဖြူမှုန့် (၁၉၈၀)ဂရမ်၊ ဘိန်းဖြူဘလောက်တုံး (၄,၀၀၀)ဂရမ်၊ ICE (၈) ကီလိုဂရမ်ခန့်၊ ဘိန်းဆီခဲ (၁၆) ကီလိုခန့်နှင့် ဘိန်းညိုမှုန့် (၇၅,၀၀၀) ဂရမ်ခန့်ကို သိမ်းဆည်းရမိကြောင်း သိရသည်။
လုံခြုံရေးတပ်ဖွဲ့ဝင်များက အဆိုပါနေရာတစ်ဝိုက်အား ဆက်လက် စစ်ဆေးရှာဖွေရာ နံနက် (၁၁) နာရီဝန်းကျင်တွင် သိန်းနီမြို့နယ်၊ နမ့်ခိုက်ကျေးရွာမှ ထွက်ပြေးတိမ်းရှောင်နေသော ဦးရန်အင်ချန်း ပိုင်ဆိုင်သည့် မီးဖိုဆောင်နှင့် ကားဂိုဒေါင် တွဲလျက် အဆောက်အဦ၏ မြေအောက်ခန်းနှင့် မျက်နှာကျက် အတွင်းမှ 88/1 စာတန်းပါ ပန်းရောင် စိတ်ကြွ ရူးသွပ်ဆေးပြား (၂၀၁၆,၀၀၀) ပြား၊ ဘိန်းဖြူမှုန့် (၂,၂၀၀)ဂရမ်၊ ICE (၇) ကီလိုဂရမ်ခန့်၊ ဘိန်းစိမ်း (၁၀) ကီလိုဂရမ်ခန့်နှင့် ဘိန်းညိုမှုန့် (၁၀၀,၀၀၀) ဂရမ်ခန့်ကို သိမ်းဆည်းရမိကြောင်း သိရသည်။
ယင်းနောက် မွန်းလွဲ (၁) နာရီခန့်တွင် ကွတ်ခိုင်မြို့နယ်၊ လွယ်ခမ်ကျေးရွာမှ ထွက်ပြေးတိမ်းရှောင်နေသော ဦးချာကွေးအန် ပိုင်ဆိုင်သည့် အဆောက်အဦ (၁) လုံးနှင့် ကားဂိုဒေါင် (၁) လုံးအတွင်းမှ စိတ်ကြွရူးသွပ်ဆေးပြားရောရာ (၈၃၅,၀၀၀) ပြား၊ ဘိန်းဖြူ ဘလောက်တုံး (၁၀၀၀)ဂရမ်၊ICE (၂၃) ကီလိုဂရမ်ခန့်၊ ဆေးပြားရိုက်တံ (၄) ချောင်း၊ ပစ္စတိုသေနတ် (၂) လက်နှင့် ၎င်းကျည်အိမ် (၂) ခုတို့ကို သိမ်းဆည်းရမိကြောင်း သိရသည်။
၎င်းနေရာတစ်ဝိုက်အား ဆက်လက်ရှာဖွေ စစ်ဆေးရာ ညနေ (၃) နာရီဝန်းကျင်တွင် သိန်းနီမြို့နယ်၊ နမ့်ခိုက်ကျေးရွာမှ ထွက်ပြေးတိမ်းရှောင်နေသော ဦးဂျမ်းရွယ်ခင်းပိုင်ဆိုင်သည့် တစ်ထပ်တိုက် မျက်နှာကျက် အတွင်းမှ ပစ္စတို သေနတ် (၂) လက်၊ ရိုင်ဖယ် (၂) လက်၊ ကျည်မျိုးစုံ (၂၃၁၉) တောင့်၊ လက်ပစ်ဗုံး (၂) လုံး၊ ကျည်အိမ် (၁၄) ခု၊ WY စာတန်းပါ လိမ္မော်ရောင်စိတ်ကြွရူးသွပ်ဆေးပြား (၅,၃၀၀,၀၀၀) ပြား၊ 88/1 စာတန်းပါ ပန်းရောင်စိတ်ရူးသွပ်ဆေးပြား (၆၂,၀၀၀) ပြား၊ ဘိန်းဖြူမှုန့် (၁၀,၄၅၀)ဂရမ်နှင့် ဘိန်းညိုမှုန့် (၁၂၀၀) ဂရမ်ခန့်နှင့် ၆ ဘီးယာဉ် (၁) စီးတို့ကို သိမ်းဆည်းရမိကြောင်း သိရသည်။
ကွတ်ခိုင်မြို့နယ်အတွင်း လုံခြုံရေးတပ်ဖွဲ့ဝင်များ၏ ရှာဖွေဖေါ်ထုတ်မှုအတွင်း ဖေဖော်ဝါရီ (၂၈) ရက်နေ့မှ မတ်လ (၈)ရက်နေ့အထိ စိတ်ကြွရူးသွပ်ဆေးပြားမျိုးစုံ (၅၃,၆၄၁,၀၀၀) ပြား၊ ဘိန်းဖြူ (၁၈၉,၉၈၀) ဂရမ်၊ ဘိန်းညို (၂၇၁,၀၀၀) ဂရမ်၊ ဘိန်းဖြူခဲ (၁) ဒသမ (၆) ကီလိုဂရမ်၊ ဘိန်းဆီခဲ (၁၆) ကီလို၊ ဆေးပြားအကြေမှုန့် (၂,၆၅၀) ဂရမ်၊ ဘိန်းစိမ်း (၁၀) ကီလိုဂရမ်နှင့် ICE (၃၆၅) ဒသမ (၅) ကီလိုဂရမ်၊ မူးယစ်ဆေးဝါး ချက်လုပ်ရာတွင် အသုံးပြုသည့် ဆက်စပ်ပစ္စည်း (၁၀၉) မျိုးကို ဖမ်းဆီးရမိထားကြောင်း သိရသည်။
Tachileik News Agency
ဓါတ်ပုံ - တပ်မတော်ကာကွယ်ရေးဦးစီးချုပ်ရုံး
~~~~~~~~~~~~~~~~~~ ကြော်ငြာ ~~~~~~~~~~~~~~~~~~~~
~~~~~~~~~~~~~~~~~~ ကြော်ငြာ ~~~~~~~~~~~~~~~~~~~~
~~~~~~~~~~~~~~~~~~ ကြော်ငြာ ~~~~~~~~~~~~~~~~~~~~
~~~~~~~~~~~~~~~~~~ ကြော်ငြာ ~~~~~~~~~~~~~~~~~~~~
