ထိုင်းနိုင်ငံအတွင်း ကယ်ဆယ်ရေးဂေဟာများတွင် ထိန်းသိမ်းစောင့်ရှောက်ခံထားရသည့် မြန်မာနိုင်ငံသား (၅၃)ဦးကို ကရင်ပြည်နယ်၊ မြဝတီမြို့သို့ ထိုင်းနိုင်ငံဘက်က ပြန်လည်လွှဲပြောင်းပေးလာ၍ ၂၀၁၉ ခုနှစ်၊ အောက်တိုဘာလ (၁၈)ရက်နေ့တွင် လူမှုဝန်ထမ်းဦးစီးဌာ၏ အစီအစဉ်ဖြင့် နေရပ်အသီးသီးသို့ ပို့ဆောင်ပေးထားကြောင်း သိရသည်။

ထိုင်းနိုင်ငံ၊ လူမှုဖွံ့ဖြိုးတိုးတက်ရေးနှင့် လူထုလုံခြုံရေးဝန်ကြီးဌာနမှ လက်ထောက်ညွှန်ကြားရေးမှူး Mr. Ratchapon Maneelek ဦးဆောင်သောအဖွဲ့က ၂၀၁၉ ခုနှစ်၊ အောက်တိုဘာလ (၁၇) ရက်နေ့ နံနက် (၉)နာရီကျော်တွင် ကရင်ပြည်နယ်၊ မြဝတီမြို့၊ (၄)ရပ်ကွက်ရှိ ပြန်လည်ထူထောင်ရေးဦးစီးဌာန၊ ယာယီလက်ခံစောင့်ရှောက်ရေးဂေဟာသို့ မြန်မာနိုင်ငံသား အမျိုးသား (၄၃)ဦးနှင့် အမျိုးသမီး (၁၀)ဦးတို့ကို လာရောက်အပ်နှံခဲ့ခြင်းဖြစ်သည်။

အဆိုပါ မြန်မာနိုင်ငံသားများမှာ ထိုင်းနိုင်ငံ၊လူမှုဖွံ့ဖြိုး တိုးတက်ရေးနှင့် လူထုလုံခြုံရေးဝန်ကြီးဌာန လက်အောက်ရှိ ကယ်ဆယ်ရေးဂေဟာများတွင် ထိန်းသိမ်းစောင့်ရှောက်ခံထားရခြင်းဖြစ်ကြောင်း သိရသည်။

ထိုင်းနိုင်ငံမှ လွှဲပြောင်းပေးလာသည့် မြန်မာနိုင်ငံသားများကို မြဝတီခရိုင်လူဝင်မှုကြီးကြပ်ရေးမှူး ဦးအောင်ခိုင်ဆွေ၊ မြဝတီခရိုင်လူမှုဝန်ထမ်းဦးစီးဌာနမှ လက်ထောက်ညွှန်ကြားရေးမှူး ဦးနေဝါထွန်း ဦးစီးပူးပေါင်းဖွဲ့တို့က လက်ခံခဲခြင်းဖြစ်ကြောင်း သိရသည်။

Tachileik News Agency
ဓါတ်ပုံ - MOHA