ရှမ်းပြည်နယ် (အရှေ့ပိုင်း) တာချီလိတ်မြို့တွင် ဆိုင်ကယ်မောင်းလိုင်စင်များ ကွင်းဆင်းဆောင်ရွက်ပေးခြင်းကို ၂၀၁၉ ခုနှစ်၊ အောက်တိုဘာလ (၂၃)ရက်နှင့် (၂၄) ရက်နေ့များတွင် ရှမ်းရိုးမကွင်းအတွင်း နံနက် (၉)နာရီ နေ့လယ် (၂)နာရီအထိ ဆောင်ရွက်ပေးသွားမည်ဖြစ်သည်။

အဆိုပါနှစ်ရက်တာအတွင်း ယာဉ်မောင်းလိုင်စင် လာရောက်လုပ်ဆောင်သူများကို အောက်တိုဘာလ (၃၀)ရက်နေ့၌ ယာဉ်စည်းကမ်း၊ လမ်းစည်းကမ်းဟောပြောပြီး လိုင်စင်များထုတ်ပေးမည်ဖြစ်ကြောင်း သိရသည်။

ယာဉ်မောင်းလိုင်စင်များ ကွင်းဆင်းဆောင်ရွက်ပေးရာတွင် စစ်ဆေးခ (၃) ကြိမ်အစား (၁) ကြိမ်သို့ လျှော့ချသတ်မှတ်ပေးထားသဖြင့် ပုံမှန်အတိုင်းယာဉ်မောင်းလိုင်စင်ပြုလုပ်သည်ထက် ငွေကျပ် (၄၀၀၀) လျော့နည်းမည်ဖြစ်ကြောင်း သိရသည်။

ဆိုင်ကယ်ယာဉ်မောင်းလိုင်စင်အသစ် ပြုလုပ်လိုသူများအနေဖြင့် မှတ်ပုံတင်မိတ္တူ၊ လိုင်စင်ဓါတ်ပုံ (၃)ပုံနှင့်အတူ လာရောက်လုပ်ဆောင်နိုင်ပြီး အသက် (၁၈)နှစ်အောက်အတွက် ကျပ်တစ်သောင်းခွဲ၊ အသက် (၁၈)နှစ်အထက်တွက်  ကျပ်နှစ်သောင်းခွဲ ကျသင့်မည်ဖြစ်ကြောင်း သိရသည်။

"ရှမ်းရိုးမကွင်းထဲဆောင်ရွက်ပေးတာက ယာဉ်မောင်းလိုင်စင်အသစ်တွေပဲ။ ယာဉ်မောင်းလိုင်စင် သက်တမ်းတိုးဖို့က အာမခံဆောင်ပြီးတော့ မှတ်ပုံတင်မိတ္တူရယ်၊ ဓာတ်ပုံရယ်၊ လိုင်စင်ကတ်အဟောင်းရယ် ရုံးလာလုပ်လို့ရပါတယ်"ဟု တာချီလိတ်ခရိုင် ကုန်းလမ်းပို့ဆောင်ရေး ညွှန်ကြားမှုဦးစီးဌာနမှ  စစ်ဆေးရေးမှူး -၂ ဦးစိုင်းဆမ်တစ်က တာချီလိတ်သတင်းအေဂျင်စီသို့ ပြောသည်။

၂၀၂၀ ခုနှစ်တွင် မော်တော်ဆိုင်ကယ် မောင်းနှင်သူတိုင်း ယာဉ်မောင်းလိုင်စင်ရှိရမည် စီမံချက်ဖြင့် ဆိုင်ကယ်မောင်းလိုင်စင်များ ကွင်းဆင်းဆောင်ရွက်ပေးခြင်းကို ကုန်းလမ်းပို့ဆောင်ရေးညွှန်ကြားမှုဦးစီးဌာန၊ ယာဉ်ထိန်းတပ်ဖွဲ့င့် မြန်မာ့အာမခံလုပ်ငန်းတို့ပါဝင်သည့် ပူးပေါင်းအဖွဲ့ဖြင့် တစ်နိုင်ငံလုံးအတိုင်းအတာဖြင့် လုပ်ဆောင်နေခြင်းဖြစ်သည်။

သတင်း၊ဓါတ်ပုံ #ဟန်စိုးထိုက်