တာချီလိတ်တွင် မြန်မာနိုင်ငံသားများဘဏ် (MCB)ခွဲ စတင်ဖွင့်လှစ်
ရှမ်းပြည်နယ်(အရှေ့ပိုင်း) တာချီလိတ်မြို့တွင် မြန်မာနိုင်ငံသားများဘဏ် (MCB)၏ ဘဏ်ခွဲအား ၂၀၂၀ ခုနှစ်၊ ဇန်နဝါရီလ (၂၇) ရက်နေ့ နံနက်ပိုင်းက ဆန်ဆိုင်း (ခ) ရပ်ကွက်၊ ဗိုလ်ချုပ်လမ်းမပေါ်ရှိ အောင်ချမ်းသာတိုက်ခန်းတွင် စတင်ဖွင့်လှစ်လိုက်ပြီ ဖြစ်သည်။
MCB ၏ (၄၆)ခုမြောက်ဘဏ်ခွဲဖြစ်သည့် တာချီလိတ်ဘဏ်ခွဲ ဖွင့်ပွဲအခမ်းအနားသို့ စီးပွားရေးနှင့် ကူးသန်းရောင်းဝယ် ပြည်ထောင်စုဝန်ကြီး ဒေါက်တာ သန်းမြင့်၊ ကုန်သွယ်ရေးဦးစီးဌာန ညွှန်ကြားရေးမှူးချုပ် ဦးမင်းမင်း၊ စစ်ဗျူဟာအဖွဲ့ အခြေချ (တာချီလိတ်) စစ်ဗျူဟာမှူး ဗိုလ်မှူးကြီး သော်ဇင်ဦး၊ ပြည်နယ်လွှတ်တော်ကိုယ်စားလှယ် ဦးခင်မောင်တင့်၊ တာချီလိတ်ခရိုင် အုပ်ချုပ်ရေးမှူး ဦးမြင့်နိုင်၊ မြို့နယ်အုပ်ချုပ်ရေးမှူး ဦးချမ်းမြေ့စော၊ မြန်မာနိုင်ငံသားများဘဏ်လီမိတက် ဒါရိုက်တာအဖွဲ့ ဥက္ကဌ ဦးတိုးမြင့်အောင်၊ မြန်မာနိုင်ငံသားများဘဏ် လီမိတက် ဒါရိုက်တာများဖြစ်သည့် ဦးအုန်းဆိုင်၊ ဦးလှဦး၊ ဦးထွန်းလွင်၊ ဦးအောင်အောင်၊ တာချီလိတ်နယ်စပ်ကုန်သည်များအသင်း ဥက္ကဌ ဦးစိုင်းစိုင်း၊ မြို့မိမြို့ဖ ဦးကြည်မြင့်၊ အာခါတိုင်းရင်းသားလူမျိုးရေးရာ နာယက ဦးမင်းညိုတို့က ဘဏ်ကို ဖဲကြိုးဖြတ်ဖွင့်လှစ်ပေးခြင်း၊ အမွှေးနံ့သာရည် ပက်ဖျန်းပေးခြင်းများကို လုပ်ဆောင်ပေးကြသည်ကို တွေ့ရသည်။
နယ်စပ်ဒေသ တာချီလိတ်တွင် ဘဏ်ခွဲများအနေဖြင့် မြန်မာ့စီးပွားရေးဘဏ် (၁) ခု၊ KBZ ဘဏ်ခွဲ (၃) ခု၊ CB ဘဏ်ခွဲ (၂) ခု၊ ဧရာဝတီဘဏ်ခွဲ တစ်ခု၊ AGD ဘဏ်ခွဲ တစ်ခု၊ မြဝတီဘဏ်ခွဲ တစ်ခု၊ အင်းဝဘဏ်ခွဲ (၁) ခုနှင့် ယခု ဖွင့်လှစ်လိုက်သည့် မြန်မာနိုင်ငံသားများဘဏ်ခွဲ တစ်ခု အပါအဝင် ဘဏ်ခွဲပေါင်း (၁၁) ခုရှိပြီဖြစ်သည်။
ဓါတ်ပုံ - ကျော်ဇင်ဟိန်း
