တရုတ်နိုင်ငံနယ်စပ်ဖြစ်သည့် ရှမ်းပြည်နယ်(မြောက်ပိုင်း) နမ့်ခမ်းမြို့နယ် နောင်ခမ်းကျေးရွာတွင် တရုတ်နိုင်ငံဘက်မှ ကျူးကျော်၍ မြောင်းလာတူးခြင်းကို ကန့်ကွက်ခဲ့ရပြီးနောက် မြန်မာ - တရုတ်နယ်စပ် ရွှေလီချိုင့်ဝှမ်းတလျှောက် တရုတ်ဘက်မှ အလားတူအပြုအမူများ မကြာခဏပြုလုပ်နေမှုအား အစိုးရအနေဖြင့် ဖြေရှင်းပေးရန် ၂၀၁၉ ခုနှစ် အောက်တိုဘာလ (၁၇)ရက်နေ့တွင် နိုင်ငံရေးပါတီတစ်ခုနှင့် လူမှုရေးအသင်းအဖွဲ့ (၄)ခုက သဘောထားထုတ်ပြန်ကြေညာသည်။

မြန်မာ - တရုတ်နယ်စပ် နယ်နမိတ်မျဉ်းနှင့်ကပ်လျက် မြန်မာနိုင်ငံဘက်ခြမ်း၊ နမ့်ခမ်းမြို့နယ်၊ နောင်ခမ်းကျေးရွာ အနီးရှိ နယ်နမိတ်မှတ်တိုင် BP (၅၇) နှင့် BP (၅၈)ကြား နောင်ခမ်းကျေးရွာနှင့် တရုတ်နိုင်ငံဘက်မှ နောင်တောင်းမြို့ကို ဆက်သွယ်ထားသည့် လမ်းဘေးမြေသားများကို တရုတ်နိုင်ငံဘက်မှ အရပ်ဝတ်လူ(၄)ဦးက ၂၀၁၉ ခုနှစ်၊ အောက်တိုဘာလ (၉)ရက်နေ့ ညသန်းခေါင်အချိန်က မြေတူးစက်ဖြင့် မြောင်းလာတူးခဲ့ခြင်းဖြစ်ကြောင်း သိရသည်။

“မြေတူးစက်က ညပိုင်းမှာလာတူးပြီး မနက်ပိုင်းမှာ ပြန်သွားတယ်။ ညသန်းခေါင်ကြီး လာတူးတာ။ နောင်ခမ်းနဲ့ တရုတ်ဘက် နောင်တောင်းမြို့နဲ့ ဆက်နေတဲ့လမ်းရဲ့ဘေးမှာ မြောင်းလာတူးတယ်။ မြန်မာဘက်ကို ပေ(၆၀)လောက် အထဲဝင်တယ်။ နယ်နမိတ်မှာ နယ်ခြားကျောက်တိုင်တွေရှိတယ်။ အဲဒါကို ကျော်ဝင်လာတာ။ သူတို့က သူတို့ဘက်မြေလိုလို လာလုပ်တာ”ဟု နမ့်ခမ်းမြို့နယ်အခြေစိုက် ရှေးဟောင်းအမွေအနှစ်နှင့် သမိုင်းဝင်နေရာများ ထိန်းသိမ်းကာကွယ်စောင့်ရှောက်ရေးအသင်း ဥက္ကဌ ဦးစိုင်းအောင်ဝင်းက တာချီလိတ်သတင်းအေဂျင်စီသို့ ပြောသည်။

နောင်ခမ်းကျေးရွာဘက်သို့ တရုတ်ဘက်မှ ကျူးကျော်၍ မြေတူးသည့် မှတ်တမ်းများကို ကျေးရွာအုပ်ချုပ်ရေးမှူးက အောက်တိုဘာလ (၁၀)ရက်နေ့၌ မြို့နယ်အုပ်ချုပ်ရေးထံ တင်ပြခဲ့ရာ ယင်းနေ့မှာပင် မြို့နယ်အုပ်ချုပ်ရေးမှူးက ခရိုင်အုပ်ချုပ်ရေးမှူးထံ တင်ပြခြင်းနှင့်အတူ တရုတ်နိုင်ငံဘက် ယူနန်ပြည်နယ်မှ ရွှေလီပြည်ပဆက်ဆံရေးဌာနကိုပါ ကန့်ကွက်စာပေးပို့ထားခဲ့ခြင်းဖြစ်သည်ဟု သိရသည်။
တရုတ်နိုင်ငံနှင့် နယ်နမိတ်ထိစပ်နေသည့် ရှမ်းပြည်နယ်(မြောက်ပိုင်း) နမ့်ခမ်းမြို့နယ်တွင် တရုတ်နိုင်ငံဘက်မှ အလားတူ ဝင်ရောက်လုပ်ဆောင်မှုများကို ၂၀၁၄ ခုနှစ်ကလည်း ကြုံခဲ့ရသည်ဟု သိရသည်။

“ဟိုးအရင် ၂၀၁၄ ခုနှစ်ကလည်း နမ့်ခမ်းမြို့နယ်ထဲက ကုန်းဆာရွာမှာ တရုတ်ဘက်က သေနတ်တွေနဲ့ စစ်သားတွေနဲ့ (၁၂)ယောက်လောက်ပါတယ်။ ဝင်လာကြတာ။ အဲဒီတုန်းက သမ္မတရုံးအထိတင်ပြလိုက်တော့ နောက်တစ်နေ့မှာ ရှမ်းပြည်နယ် ဝန်ကြီးချုပ်က လာပြီးကွင်းဆင်းစစ်ဆေးတာပေါ့။ နောက်တစ်နေ့ကျတော့ ဒီတိုင်းပဲ တရုတ်တွေက ပြန်ဆုတ်သွားပါတယ်”ဟု ဦးစိုင်းအောင်ဝင်းက ပြောသည်။

တရုတ်နိုင်ငံနှင့် နယ်နမိတ်ထိစပ်နေသည့်  ရှမ်းပြည်နယ်မြောက်ပိုင်းဒေသ မူဆယ်ခရိုင်အတွင်းတွင်လည်း တရုတ်နိုင်ငံဘက်မှ ဘက်ဟိုးဖြင့် မြေဝင်တူးမှုကို ၂၀၁၈ ခုနှစ်၊ စက်တင်ဘာလ (၁၉) ရက်နေ့က ပန်ဆိုင်း (ကြူကုတ်)မြို့နယ်၊ ဖိုင်းကောင်းရွာအနီးတွင် ကြုံခဲ့ရသည့်အပြင် မူဆယ်မြို့ နယ်စပ်အနီးရှိ အဆောက်အဦနှင့် ပတ်သက်၍ ၂၀၁၈ ခုနှစ်၊ အောက်တိုဘာလ (၁၇)ရက်နေ့တွင် လက်နက်ကိုင် တရုတ်ရဲတပ်ဖွဲ့က နယ်စပ်တရားမဝင်ပေါက်မှတစ်ဆင့် မူဆယ်မြို့ဘက်သို့ ဖြတ်ကျော်ကန့်ကွက်ခဲ့ခြင်းများလည်း ဖြစ်ပွားခဲ့ဖူးခြင်းဖြစ်သည်။

မူဆယ်မြို့ဘက်ရှိ နယ်စပ်အနီး အဆောက်အဦဆောက်လုပ်မှုအား ကန့်ကွက်သည်ဟုဆိုကာ တရုတ်နိုင်ငံ ကျယ်ဂေါင်နယ်ခြားစောင့် ပြောက်ကျားရဲတပ်ဖွဲ့က ၂၀၁၈ ခုနှစ် အောက်တိုဘာလ (၁၇)ရက်နေ့ နံနက် (၈)နာရီ (၁၀)မိနစ်တွင် တင့်ကား(၃)စီး၊ စစ်သုံးကား (၁)စီး၊ ဘာတီအရပ်ကား အသေး(၁၁)စီးဖြင့် ရောက်လာပြီး တရုတ်နိုင်ငံဘက်အခြမ်းတွင် ကားများရပ်တန့်၍ ဆင်ဖြူဈေးပတ်လမ်း၊ မူဆယ်မြို့မရဲစခန်း၏ အနောက်ဘက် (၅)ဖာလုံခန့် နယ်ခြားမှတ်တိုင်အမှတ် BP 81 နှင့် BP 82 ကြား တရားမဝင် ဝင်ပေါက်မှနေ၍ ရဲစခန်းမှူး လီကျန်းချန်းဦးစီးသည့် တရုတ်လက်နက်ကိုင် ပြောက်ကျားရဲ (၁၃)ဦး၊ လက်နက်မဲ့ (၁၇)ဦး ပေါင်း (၃၀)ဦးတို့ တရားမဝင် ဝင်ရောက်ခဲ့ကြခြင်းဖြစ်သည်။

ယင်းကဲ့သို့ တရုတ်ဘက်မှ မကြာခဏ လုပ်ဆောင်မှုများကို နယ်စပ်ဒေသတွင် ကြုံနေရသဖြင့် အစိုးရအနေဖြင့် ဖြေရှင်းပေးရေးတိုက်တွန်းကြရန် ၂၀၁၉ ခုနှစ်၊ အောက်တိုဘာလ (၁၀)ရက်နေ့က နမ့်ခမ်းမြို့နယ် မြို့မိမြို့ဖများ၊ ရှမ်းတိုင်းရင်းသားများ ဒီမိုကရက်တစ်ပါတီ၊ မြို့နယ်တောင်သူလယ်သမားများအသင်း၊ လူမှုညီညွတ်ရေးအသင်းနှင့် ရှေးဟောင်းအမွေအနှစ်နှင့် သမိုင်းဝင်နေရာများထိန်းသိမ်းကာကွယ်စောင့်ရှောက်ရေးအသင်းတို့က အစည်းအဝေးကျင်းပကာ သဘောထား ထုတ်ပြန်ခဲ့ကြခြင်းဖြစ်သည်ဟု သိရသည်။

Tachileik News Agency
ဓါတ်ပုံ - SNDP (နမ့်ခမ်း)