~~~~~~~~⊰❂ Unicode Version ❂⊱~~~~~~~~

မိုင်းခွဲခံရသည့်ဂုတ်တွင်းတံတားပြုပြင်နေစဉ် သီပေါနှင့် လားရှိုးရောက်နေသည့် နိုင်ငံခြားသားများအတွက် လေကြောင်းခရီးစဉ်(၂)ခု ပြေးဆွဲပေးမည်
***********
ရှမ်းပြည်နယ်(မြောက်ပိုင်း) နောင်ချိုမြို့နယ်အတွင်းရှိ ဂုတ်တွင်းတံတားမိုင်းခွဲခံရ၍ မန္တလေး - လားရှိုး လမ်းပန်းဆက်သွယ်ရေးပြတ်တောက်သွားရာ သီပေါနှင့် လားရှိုးတွင် ပိတ်မိနေသည့် နိုင်ငံခြားသား ခရီးသွားများအတွက် စီစဉ်လိုက်သည့် လေကြောင်းခရီးစဉ်(၂)ခုကို ၂၀၁၉ ခုနှစ်၊ သြဂုတ်လ (၁၇)ရက်နေ့တွင် ပျံသန်းပေးသွားမည်ဖြစ်ကြောင်း သိရသည်။

သီပေါနှင့် လားရှိုးမြို့တို့တွင် ရောက်ရှိနေသည့် နိုင်ငံခြားသားခရီးသွားများအတွက် ဟိုတယ်နှင့် ခရီးသွားလာရေးဝန်ကြီးဌာန ၊ မြန်မာနိုင်ငံခရီးသွားလုပ်ငန်းရှင်များအသင်းနှင့် Air KBZ တို့ ညှိနှိုင်းပြီး သြဂုတ်လ (၁၇)ရက်နေ့တွင် လားရှိုး - မန္တလေးနှင့် လားရှိုး - ရန်ကုန် ခရီးစဉ်(၂)ကြောင်းကို ပျံသန်းပေးသွားမည်ဖြစ်ကြောင်း ခရီးသွားလုပ်ငန်းရှင်များ အသင်းက ထုတ်ပြန်ထားသည်။

ဂုတ်တွင်းတံတားမှဖြတ်သန်း၍မရတော့သဖြင့် မန္တလေး - လားရှိုးလမ်းပန်းဆက်သွယ်ရေး ပြတ်တောက်သွားရာ လေကြောင်းခရီးသွားသူများလာကြောင်း သိရသည်။

တအာင်းအဖွဲ့(TNLA)၊ ရခိုင်အဖွဲ့(AA)နှင့် ကိုးကန့်အဖွဲ့(MNDAA) တို့ပူးပေါင်းအဖွဲ့က သြဂုတ်လ (၁၅) ရက်နေ့ နံနက်ပိုင်းတွင် ပြင်ဦးလွင်မြို့ရှိ တပ်မတော်နည်းပညာတက္ကသိုလ်ကျောင်းအား လက်နက်ကြီးဖြင့် ပစ်ခတ်ခြင်း၊ နောင်ချိုမြို့ရှိ မူးယစ်ဆေးဝါးစစ်ဆေးရေးဂိတ်နှင့် ဂုတ်တွင်းလမ်းပိုင်းရှိ ရဲကင်းတို့အား တိုက်ခိုက်ခဲ့သဖြင့် တပ်မတော်နှင့် တိုက်ပွဲများဖြစ်ပွားခဲ့ရာ ဂုတ်တွင်းလမ်းပိုင်းကို မိုင်းခွဲခံခဲ့ရခြင်းဖြစ်သည်။

လက်ရှိတွင် မိုင်းခွဲခံထားရသည့် ဂုတ်တွင်းတံတားကို ဆောက်လုပ်ရေးဝန်ကြီးဌာန၊ တံတားဦးစီးဌာနမှ တံတားတည်ဆောက်ရေး အထူးအဖွဲ့က နှစ်လမ်းသွားဘေလီတံတားကို (၅)ရက်အတွင်း အပြီးတည်ဆောက်သွားမည်ဖြစ်ကြောင်း သိရသည်။

Tachileik News Agency