အသစ်ပြဌာန်းလိုက်သည့် ကလေးသူငယ်အခွင့်အရေးများဆိုင်ရာဥပဒေအရ ကော်မတီများဖွဲ့စည်းပြီး အသိပညာပေးဟောပြောပွဲများ ဆောင်ရွက်နေရာ ၂၀၁၉ ခုနှစ်၊ စက်တင်ဘာလ (၂၆)ရက်နေ့၌ ရှမ်းပြည်နယ် (အရှေ့ပိုင်း) တာချီလိတ်ခရိုင်၊ မိုင်းဆတ်မြို့တွင် ဥပဒေအသိပညာပေးဟောပြောပွဲ ကျင်းပသည်။
ကလေးသူငယ်အခွင့်အရေးများဆိုင်ရာ ကုလသမဂ္ဂသဘောတူစာချုပ်အရ ကလေးသူငယ်များ၏ အဓိကအခွင့်အရေး(၄)ရပ်ဖြစ်သည့် အသက်ရှင်သန်ခွင့်၊ ဖွံ့ဖြိုးတိုးတက်ခွင့်၊ ကာကွယ်စောင့်ရှောက်ခွင့်နှင့် ပါဝင်ဆောင်ရွက်ခွင့်တို့ရရှိစေရန်အတွက် နိုင်ငံတော်အစိုးရများက အကောင်အထည်ဖော်ခြင်း၊ စောင့်ကြည့်ကြီးကြပ်ခြင်းနှင့် အစီရင်ခံခြင်းတို့ လုပ်ဆောင်ကြရမည်ဖြစ်သည်။
ကုလသမဂ္ဂသဘောတူစာချုပ် လက်မှတ်ရေးထိုးထားသည့် မြန်မာနိုင်ငံတွင်လည်း ၂၀၁၉ ခုနှစ်အတွင်း ကလေးသူငယ်အခွင့်အရေးများဆိုင်ရာဥပဒေကို ပြဌာန်းခဲ့ပြီး အဆိုပါဥပဒေအရ အကောင်အထည်ဖေါ်နိုင်ရန် ကော်မတီအဆင့်ဆင့်ကိုလည်း ဖွဲ့စည်းနေခြင်းဖြစ်သည်။
ဥပဒေပါ ကလေးသူငယ်အခွင့်အရေးများ ကာကွယ်ရေးကို လူမှုဝန်ထမ်း၊ ကယ်ဆယ်ရေးနှင့် ပြန်လည်နေရာချထားရေး ဝန်ကြီးဌာန၊ လူမှုဝန်ထမ်းဦးစီးဌာနနှင့်အတူ မိတ်ဖက်အဖွဲ့အစည်းများက ဆောင်ရွက်ကြရမည်ဖြစ်သည်။
မိုင်းဆတ်တွင်ကျင်းပသည့် ဥပဒေအသိပညာပေးဟောပြောပွဲသို့ ဒုတိယမြို့နယ်အုပ်ချုပ်ရေးမှူး ဦးဟန်စိုးဦး၊ ကျိုင်းတုံခရိုင် လူမှုဝန်ထမ်းဉီးစီးဌာနမှ ဒုတိယညွန်ကြားရေးမှူး ဒေါ်ခင်ခင်မြင့်တို့အပါအဝင် မြို့နယ်အဆင့် ဌာနဆိုင်ရာတာဝန်ရှိသူများ၊ လူမှုရေးအသင်းအဖွဲ့များ၊ တိုင်းရင်းသားစာပေနှင့်ယဉ်ကျေးမှုအဖွဲ့များ၊ မြို့ပေါ်ရှိ မူလတန်းကြိုကျောင်းများမှ တာဝန်ခံများ၊ ကလေးမိဘများ တက်ရောက်ကြသည်။
Tachileik News Agency
သတင်း ယဉ်ဝင်း
