အဆိုပါစာအုပ် မိတ်ဆက်ပွဲကို ကရင်နီပြည်အမျိုးသမီးအရပ်ဖက်အဖွဲ့အစည်းများက ၂၀၁၉ ခုနှစ်၊  အောက်တိုဘာလ (၂) ရက်နေ့တွင် လွိုင်ကော်မြို့ Gold hotel တွင်ပြုလုပ်ခဲ့သည်။

“ကျွန်မတို့ဒီထဲမှာ ဒီအမျိုးသမီးအခွင့်အရေးတစ်ခုတည်း မဟုတ်ဘူးပေါ့။ နိုင်ငံတော်တည်ဆောက်တဲ့ချိန်မှာ ဖြစ်ဖြစ် ၊ ပြည်နယ်ဖွဲ့စည်းပုံရေးဆွဲတာဖြစ်ဖြစ် ပြန်ပြီးတော့ ကိုးကားနိုင်အောင်ပေါ့ ပြည့်စုံမှုရှိကောင်းရှိ ချင်မှရှိမယ်ပေါ့ ။ ဒါပေမဲ့ ကျွန်မတို့အမျိုးသမီးအမြင်ရှုထောင့်တွေ၊ အမျိုးသမီးဖက်ကနေ ဘယ်လိုမူဝါဒ တွေချမှတ်သင့်တယ်ဆိုတာတွေကို ထည့်သွင်းဆွေးနွေးနိုင်အောင် ဒီကရင်နီပြည်မှာ ရှိတဲ့ အမျိုးသမီးတွေ အားလုံးက ပေါင်းပြီး ဒီလိုပြင်ဆင်လုပ်ထားခြင်း ဖြစ်ပါတယ် ” ဟု အမျိုးသမီးများဖောင်ဒေရှင်းမှ ဒါရိုက်တာ မရိုစီကျော်က တာချီလိတ်သတင်းအေဂျင်စီသို့ ပြောသည်။

အနာဂတ်ဖက်ဒရယ်ပြည်ထောင်စုတည်ဆောက်ရာတွင် အမျိုးသမီးများရဲ့အခန်း ကဏ္ဍပါဝင်မှုကို အလေး ထားထည့်သွင်းနိုင်ရန်  အမျိုးသမီးထုတစ်ခုလုံး၏ အခွင့်ရေးဆိုင်ရာ ကိစ္စရပ်များအတွက် အာမခံချက်ရှိသည့်မူဝါဒ၊ ဥပဒေ ၊နည်းဥပဒေများ ချမှတ်နိုင်ရန် ၊ နည်းမျိုးစုံဖြင့် ခွဲခြားဖိနှိပ်မှုလျော့ကျစေရန် နှင့် ငြိမ်းချမ်းရေး တည်ဆောက်ရာမှာ အမျိုးသမီးများ၏ ကာယဉာဏစွမ်းအားများ ဖြင့် အမျိုးသားများ နှင့် တန်းတူ ပါဝင်ဆောင်ရွက်နိုင်ရန် စသည့်ရည်ရွယ်ချက်များဖြင့် အဆိုပါစာအုပ်အား ထုတ်ဝေခဲ့ခြင်းဖြစ်ကြောင်း သိရသည်။

မူဝါဒအကြံပြုချက်စာအုပ် ထွက်ရှိရေးအတွက် ကယားပြည်နယ်ရှိ မြို့နယ်တိုင်းနှင့် ကယန်းဒေသများဖြစ်သည့် ရှမ်းပြည်နယ်တောင်ပိုင်း ဖယ်ခုံမြို့နှင့် ကရင်ပြည်နယ် သံတောင်ကြီးမြို့နယ်များရှိ သက်ဆိုင်ရာအဖွဲ့အစည်းများ ၊ အမျိုးသမီးများနှင့်တွေ့ဆုံကာ ကရင်နီအမျိုးသမီးအစည်းအရုံး  ၊ ကယန်းအမျိုးသမီးအစည်းအရုံး  နှင့် အမျိုးသမီးများအတွက် အမျိုးသမီးများဖောင်ဒေရှင်းအဖွဲတို့မှ ဦးဆောင်၍ အကြံပြုချက်များ ပြုစုခဲ့ခြင်း ဖြစ်ကြောင်း သိရသည်။

ကရင်နီပြည်အမျိုးသမီးများ၏ နိုင်ငံရေး နှင့်ငြိမ်းချမ်းရေးဆိုင်ရာ မူဝါဒအကြံပြုချက်များ စာအုပ်တွင် ဖက်ဒရယ်ပြည်ထောင်စုနှင့် လက်ရှိနိုင်ငံတော်၏ပြုပြင်ပြောင်းလဲရေး အခန်းကဏ္ဍဆိုင်ရာမူဝါဒအကြံပြုချက်များ နှင့် ကြားကာလ တွင်ထားရှိရမည့်အခြေခံမူများ ၊ ငြိမ်းချမ်းရေးနှင့်နိုင်ငံရေးဖြစ်စဉ်တွင် အမျိုးသမီးများ၏ အခန်းကဏ္ဍမြင့်တင်ရေး ထားရှိရမည့် အခြေခံမူများ အထွေထွေအကြံပြုချက်များ ဟူ၍ နှစ်ပိုင်းခွဲခြားပါရှိသည်။

အဆိုပါအပိုင်း နှစ်ပိုင်းအောက်တွင် နိုင်ငံရေးဆိုင်ရာ အခြေခံမူများ၊ လူမှုရေးဆိုင်ရာအခြေခံမူများ ၊လုံခြုံရေးရာအခြေခံမူများ၊ စီးပွားရေးဆိုင်ရာအခြေခံမူများ ၊မြေယာနှင့်သဘာဝသယံဇာတဆိုင်ရာ အခြေခံမူများ ၊ကြားကာလတွင်ထားရှိရမည့်အခြေခံမူများ ၊ ၊ ငြိမ်းချမ်းရေးနှင့်နိုင်ငံရေးဖြစ်စဉ်တွင် အမျိုးသမီးများ၏ အခန်းကဏ္ဍမြင့်တင်ရေး ထားရှိရမည့် အခြေခံမူများ၊ အထွေထွေအကြံပြုချက်များ နှင့် နောက်ဆက်တွဲ ဖော်ပြချက်များ ဟူ၍ကဏ္ဍအလိုက် အကြံပြုချက်များ ထည့်သွင်းထားသည်။

သတင်း၊ဓါတ်ပုံ #ဆန်းဖြိုးထွန်း