တာချီလိတ်မြို့ မဟာမြတ်မုနိဘုရားကြီးကျောင်းတိုက် ပဓာနနာယကဆရာတော်၏ အန္တိမအဂ္ဂိဈာပနကို ပူဇော်သည့်အနေဖြင့် ရန်ကုန်မြို့အခြေစိုက် အစာအိမ်၊ အူလမ်းကြောင်းနှင့် အသည်းရောဂါ ဖောင်ဒေးရှင်း(မြန်မာ) က လာရောက်ဆောင်ရွက်ပေးခြင်းဖြစ်ကြောင်း သိရသည်။

"အသည်းရောင် အသားဝါ ဘီပိုး၊ စီပိုး ရှိမရှိ အခမဲ့စစ်ပေးမယ်။ တကယ်လို့ ရောဂါမရှိဘူးဆိုရင် ကာကွယ်ဆေး တစ်ခါတည်းထိုးပေးမယ်။  စစ်ဆေးတာရော၊ ကာကွယ်ဆေးထိုးတာရောဆိုရင် လူတစ်ယောက်ကို  ကျပ်တစ်သိန်းခွဲလောက်ကျတာကို အခမဲ့လုပ်ပေးမှာ။ လူ (၅၀၀) လောက်ထိကုပေးမှာပေါ့။ ဒီထက်လူများလာလို့ရှိရင် သူတို့တတ်နိုင်ရင် ထပ်လုပ်ပေးမှာပေါ့"ဟု တာချီလိတ်ခရိုင်အုပ်ချုပ်ရေးမှူး ဦးမြင့်နိုင်က တာချီလိတ်သတင်းအေဂျင်စီသို့ ပြောသည်။

အသည်းရောင်ဘီပိုး၊ စီပိုးစစ်ဆေးမှုနှင့် ကာကွယ်ဆေးထိုးနှံပေးမှုများကို နံနက် (၈) နာရီခွဲမှစတင်ပြီး တစ်ရက်လျှင် လူ (၂၅၀) ဦးနှုန်းဖြင့် ဆောင်ရွက်ပေးသွားမည်ဖြစ်ရာ မည်သူမဆို လာရောက်စစ်ဆေးနိုင်ကြမည်ဖြစ်သည်။

ဆေးစစ်ဆေးမှုနှင့် ကုသမှုများကို မဟာမြတ်မုနိကျောင်းတိုက်အတွင်း ဆောင်ရွက်နိုင်ရန်အတွက် တာချီလိတ်ခရိုင်အုပ်ချုပ်ရေးမှူး ဦးမြင့်နိုင်၊ မြို့နယ်အုပ်ချုပ်ရေးမှူး ဦးချမ်းမြေ့စောနှင့် တာဝန်ရှိသူများပါဝင်သည့်အဖွဲ့က ကျောင်းတိုက်မှဆရာတော်ထံ အောက်တိုဘာလ (၄)ရက်နေ့ ညနေပိုင်းက လာရောက်လျှောက်ထား ညှိနှိုင်းခြင်းများပြုလုပ်ခဲ့ကြခြင်းဖြစ်သည်။

နာယကများအဖြစ် အသည်းရောဂါအထူးကု ပါမောက္ခဒေါက်တာခင်မောင်ဝင်းနှင့် ဗိုလ်ချုပ်ကြီး အောင်သန်းထွန်း၊ ဥက္ကဌ ဒုတိယဗိုလ်မှူးကြီး ပါမောက္ခကျော်စိုးထွန်းတို့က တာဝန်ယူထားသည့် ရန်ကုန်မြို့အခြေစိုက် အစာအိမ်၊ အူလမ်းကြောင်းနှင့် အသည်းရောဂါဖောင်ဒေးရှင်း(မြန်မာ)မှ အသည်းအထူးကုဆရာဝန်ကြီးများ လာရောက်စစ်ဆေးကုသပေးမည်ဖြစ်ကြောင်း သိရသည်။

မဟာမြတ်မုနိဘုရားကြီးစာသင်တိုက် ပဓာနနာယကဆရာတော် အဂ္ဂမဟာ သဒ္ဓမ္မဇောတိကဓဇ ဘဒ္ဒန္တပညာသာမိသည် ၂၀၁၉ ခုနှစ်၊ စက်တင်ဘာလ(၇)ရက်နေ့ ည(၉)နာရီ (၁၅)မိနစ်အချိန်တွင် ဘဝနတ်ထံ ပျံလွန်တော်မူသွားသဖြင့် အောက်တိုဘာလ (၃၀)ရက်နေ့တွင် အန္တိမအဂ္ဂိဈာပနာကျင်းပသွားမည်ဖြစ်သည်။

သတင်း #ဟန်စိုးထိုက်
ဓါတ်ပုံ -ကျော်ဇင်ဟိန်း