ရှမ်းပြည်နယ်(အရှေ့ပိုင်း) တာချီလိတ်ခရိုင်၊ မိုင်းဖြတ်မြို့နယ်၊ ဘိုရှီးကျေးရွာတွင် ရပ်ရွာအခြေပြု မူးယစ်ဆေးဖြတ်စခန်းနှင့် ပြန်လည်ထူထောင်ရေးသင်တန်းကို ၂၀၁၉ ခုနှစ် နိုဝင်ဘာ (၁) ရက်နေ့မှစ၍ ရက်ပေါင်း (၄၀)ကြာ ဖွင့်လှစ်ဆောင်ရွက်နေပြီဖြစ်သည်။

ပထမဆုံးဖွင့်လှစ်သည့် သင်တန်းသို့ ဆေးဖြတ်ကုသပြီး ပြန်လည်ထူထောင်ရေးလုပ်ဆောင်မည့်သူ (၃၀) ဦးတက်ရောက်နေပြီး ၎င်းတို့အား ရက်ပေါင်း (၄၀)အတွင်း ဆေးဖြတ်ကုသပေးခြင်း၊ ကျန်းမာရေး စောင့်ရှောက်မှုပေးခြင်း၊ စိတ်ပိုင်းဆိုင်ရာ၊ ရုပ်ပိုင်းဆိုင်ရာ ပြန်လည်ထူထောင်ပေးခြင်း၊ ပိုးဇာပုံနှိပ်၊ ဘလောက်အုတ်နှင့် ဘက်စုံဆပ်ပြာဆီထုတ်လုပ်ငန်းများကို စာတွေ့လက်တွေ့ သင်ကြားပို့ချပေးခြင်းတို့ကို လုပ်ဆောင်ပေးသွားမည်ဖြစ်သည်။

သင်တန်းကို ခရိုင်အုပ်ချုပ်ရေးမှူး ဦးမြင့်နိုင်၊ အမှတ် (၁၈) စစ်ဆင်ရေးဦးစီးဌာနချုပ် စစ်ဆင်ရေးကွပ်ကဲရေးမှူး ဗိုလ်မှူးချုပ်အေးမင်းဦးတို့လည်း တက်ရောက်ကြပြီး ပြန်လည်ထူထောင်ရေးဦးစီးဌာန ညွှန်ကြားရေးမှူး ဦးဉာဏ်မြင့်အောင်က ဘိုရှီးကျေးရွာတွင် ပထမဆုံးအကြိမ် သင်တန်းဖြစ်မြောက်ရေး ကူညီပေးခဲ့သည့် အလှူရှင်များကို ဂုဏ်ပြုမှတ်တမ်းလွှာများ ပြန်လည်ပေးအပ်ခဲ့သည်။

ရှမ်းပြည်နယ်အရှေ့ပိုင်းဒေသများတွင် မူးယစ်ဆေးဝါးနှင့်ပတ်သက်သည့်အမှုများတွင် လူငယ်များ ထက်ဝက်ကျော် ပါဝင်နေပြီး မူးယစ်ဆေးသုံးစွဲမှုဖြင့် ဖမ်းဆီးခံရမှုမှာ များပြားကြောင်း ပြည်နယ်ဒုတိယရဲတပ်ဖွဲ့ (ကျိုင်းတုံ)၏ စာရင်းများအရ သိရသည်။

သတင်း၊ဓါတ်ပုံ #ကိုသာ