ဆွစ်ဇာလန်၊ ဒတ်ချ်၊ ပြင်သစ်၊ အိုင်ယာလန်၊ ပိုလန်၊ဂျာမနီနှင့် သြစတေးလျနိုင်ငံသား (၉) ဦးပါဝင်သော မော်တော်ဆိုင်ကယ်စီးအဖွဲ့၊ စင်္ကာပူ နှင့် မလေးရှား နိုင်ငံသား (၂၈) ဦးပါ မော်တော်ယာဉ်အဖွဲ့တို့သည် ၂၀၁၉ ခုနှစ်၊ ဒီဇင်ဘာ (၂၁) ရက်နေ့ နံနက်ပိုင်းက ရှမ်းပြည်နယ်(အရှေ့ပိုင်း) တာချီလိတ်မြို့ရှိ မြန်မာ-ထိုင်းချစ်ကြည်ရေးအမှတ်(၁)တံတား မှ တဆင့် ထိုင်းနိုင်ငံဘက်သို့ ထွက်ခွာသွားသည်။
ဆွစ်ဇာလန် (၂)ဦး၊ ဒတ်ချ်(၁)ဦး၊ ပြင်သစ်(၂)ဦး၊ အိုင်ယာလန်(၁)ဦး၊ ပိုလန်(၁)ဦး၊ ဂျာမဏီ(၁)ဦးနှင့် သြစတေးလျ(၁)ဦးပါဝင်အဖွဲ့သည် မော်တော်ယာဉ် (၁) စီးနှင့် မော်တော်ဆိုင်ကယ် (၆) စီးပါအဖွဲ့သည် ဒီဇင်ဘာလ (၁၅) ရက်နေ့တွင် အိန္ဒိယ-မြန်မာနယ်စပ် တမူးမြို့မှတစ်ဆင့် မော်တော်ယာဉ်(၁) စီး၊ မော်တော်ဆိုင်ကယ် (၆) စီးတို့ဖြင့် ဝင်ရောက်လာခဲ့ပြီး တမူး၊ ဂန့်ဂေါ၊ ပုဂံ၊ အင်းလေး၊ နမ့်စန်၊ ကျိုင်းတုံနှင့် တာချီလိတ်မြို့များသို့ (၇) ရက်ကြာလည်ပတ်ခဲ့ပြီး တာချီလိတ်မြို့ရှိ မြန်မာ-ထိုင်းချစ်ကြည်ရေးအမှတ်(၁)တံတားမှ ထိုင်းနိုင်ငံဘက်သို့ ထွက်ခွာသွားခဲ့ခြင်းဖြစ်ကြောင်း သိရသည်။
စင်္ကာပူနိုင်ငံသား(၁)ဦးနှင့် မလေးရှားနိုင်ငံသား(၂၇) ဦးပါခရီးသွားအဖွဲ့သည် မော်တော်ယာဉ် (၉)စီးဖြင့် ဒီဇင်ဘာလ (၉) ရက်နေ့တွင် မြန်မာ - ထိုင်း နယ်စပ်ဖြစ်သည့် မြဝတီနယ်စပ်ဂိတ်မှ ဝင်ရောက်လာခဲ့ပြီး မြဝတီ၊ ကျိုက်ထီးရိုး၊ ရန်ကုန်၊ နေပြည်တော်၊ ပုဂံ၊ မန္တလေး၊ အင်းလေး၊ နမ့်စန်၊ ကျိုင်းတုံနှင့် တာချီလိတ်မြို့များသို့ (၁၃) ရက်ကြာလည်ပတ်ခဲ့ပြီး တာချီလိတ်မြို့ရှိ မြန်မာ-ထိုင်းချစ်ကြည်ရေးတံတားအမှတ်(၁)မှ ထိုင်းနိုင်ငံဘက်သို့ ထွက်ခွာသွားခဲ့ခြင်းဖြစ်ကြောင်း သိရသည်။
(၉)နိုင်ငံမှ ခရီးသွား (၃၇)ဦးပါဝင်သည့်အဖွဲ့ နိုင်ငံအတွင်းမှ ထွက်ခွာရေးလိုအပ်သည့် အထောက်အထားများ အတွက် ကမ္ဘာလှည့်ခရီးသွားလုပ်ငန်း လုံခြုံရေးရဲတပ်ဖွဲ့ တပ်ဖွဲ့စု(၁၄) တာချီလိတ်က သက်ဆိုင်ရာဌာနများနှင့် ချိတ်ဆက်၍ စိစစ်ဆောင်ရွက်ပေးခဲ့ကြောင်း သိရသည်။
Tachileik News Agency
သတင်း - ဟန်စိုးထိုက်
ဓါတ်ပုံ - TP
