မြန်မာအစိုးရအနေဖြင့် လက်ရှိရင်ဆိုင်နေရသည့် တရားရေးဆိုင်ရာကိစ္စနှင့်ပတ်သက်၍ နိုင်ငံတကာ လူ့အခွင့်အရေး ဆိုင်ရာ အခြေခံမူများနှင့် စံချိန်စံညွှန်းများကို လေးစားလိုက်နာ လုပ်ဆောင်သွားရန် ကရင်အမျိုးသားအစည်းအရုံး (KNU) က ၂၀၁၉ ခုနှစ်၊ နိုဝင်ဘာလ (၂၂) ရက်နေ့ ထုတ်ပြန်ချက်ဖြင့် တိုက်တွန်းလိုက်သည်။
ရခိုင်ပြည်နယ်မှ နေရပ်စွန့်ခွာသူများကိစ္စနှင့်ပတ်သက်၍ ဂမ်ဘီယာနိုင်ငံက အစ္စလာမ္မစ် ပူးပေါင်း ဆောင်ရွက်ရေးအဖွဲ့ (OIC) ကိုယ်စား မြန်မာနိုင်ငံကို အပြည်ပြည်ဆိုင်ရာတရားရုံး (ICJ) ၌ တရားစွဲဆိုထားသဖြင့် နယ်သာလန်နိုင်ငံ၊ The Hague မြို့၌ ၂၀၁၉ ခုနှစ် ဒီဇင်ဘာလ (၁၀)ရက်နေ့မှ ဒီဇင်ဘာလ (၁၂)ရက်နေ့အထိ စစ်ဆေးမည်ဖြစ်သည်။
အဆိုပါ တရားစွဲဆိုမှုကို ရင်ဆိုင်ရန် နိုင်ငံတော်၏အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်က ဦးဆောင်သည့်အဖွဲ့ သွားရောက်ကြမည်ဖြစ်သည်။
ကရင်အမျိုးသားအစည်းအရုံး (KNU) ၏ (၁၆)ကြိမ်မြောက်ကွန်ကရက်အပြီး တတိယအကြိမ်မြောက် ဗဟိုအမြဲတမ်းကော်မတီအစည်းအဝေး(ဒုတိယပိုင်း)ကို ၂၀၁၉ ခုနှစ်၊ နိုဝင်ဘာလ (၅)ရက်နေ့မှ နိုဝင်ဘာလ (၂၂)ရက်နေ့အထိ ကျင်းပပြီးနောက် ထုတ်ပြန်ချက် ထုတ်ရာတွင် အဆိုပါကိစ္စနှင့်ပတ်သက်၍ အစိုးရအား တိုက်တွန်းချက်ကို ထည့်သွင်းလာခြင်းဖြစ်သည်။
ကရင်အမျိုးသားအစည်းအရုံး (KNU) ၏ ထုတ်ပြန်ချက်တွင် KNU အနေဖြင့် ငြိမ်းချမ်းရေးလုပ်ငန်းစဉ်တွင် ဆက်လက်ပါဝင်သွားမည်ဖြစ်ပြီး အရပ်သားအကာအကွယ်ပေးမှုကို နိုင်ငံတကာလူ့အခွင့်အရေး စံချိန်စံညွှန်းများနှင့်အညီ ဆက်လက် ထိန်းသိမ်းသွားမည်ဟုလည်း ဖေါ်ပြထားသည်ကို တွေ့ရသည်။
Tachileik News Agency
