ကျောက်မဲ မှ ရန်ကုန်သို့ ပြေးဆွဲသည့် ခရီးသည်တင်ယာဉ်လိုင်းများအတွက် ယာဉ်မောင်း နှင့် ယာဉ်အကူများကို  ကျောက်မဲတွင် Home Quarantine ထားရှိမည်

ရှမ်းပြည်နယ်( မြောက်ပိုင်း ) ကျောက်မဲမြို့မှ ရန်ကုန်သို့ ပြေးဆွဲသည့် ခရီးသည်တင်ယာဥ်များမှ ယာဥ်မောင်း၊ ယာဥ်အကူများကို စက်တင်ဘာလ(၅)ရက်က စတင်၍ သီးသန့်နေအိမ်ဖြင့်ထားရှိမည်ဖြစ်ပြီး ရန်ကုန် နှင့် ရခိုင်ပြည်နယ်မှ ကျောက်မဲသို့ ဝင်လာသူအားလုံးကိုလည်း Home Quarantine ထားရန်အတွက် ကျန်းမာရေးဌာနက ဆုံးဖြတ်ပေးမည် ဟု သိရသည်။

"ကျောက်မဲ - ရန်ကုန် ပြေးဆွဲနေတဲ့ ခရီးသည်တင်ယာဥ်တွေက ပါလာသူတွေကို Check Point မှာ စာရင်း ယူမယ်။ သူတို့ နေအိမ်တွေမှာပဲ H.Q အဖြစ်ထားမယ်။ ခရီးသည်တင်ယာဥ်က ယာဥ်မောင်း၊ ယာဥ်နောက်လိုက်တွေကိုတော့ ယာဥ်လိုင်း ပိုင်ရှင်တွေက သီးသန့်နေအိမ် စီစဥ်ပေးရမယ်"ဟု ကျောက်မဲမြို့နယ်အုပ်ချုပ်ရေးမှူး ဦးနိုင်ဝင်းက ပြောသည်။

ကျောက်မဲမြို့နယ်အထွေထွေအုပ်ချုပ်ရေးဦးစီးဌာနရုံးရှိ ခန်းမတွင် မြို့နယ် Covid-19 တားဆီး၊ ကာကွယ်၊ ထိန်းချုပ်ရေးကော်မတီ နှင့် ခရိုင်၊ မြို့နယ်ကျန်းမာရေး အပါအဝင်  ဌာနဆိုင်ရာများ၊ ရပ်ကွက်အုပ်ချုပ်ရေးမှူးများ၊ လူမှူကူညီရေး အသင်းအဖွဲ့များ နှင့် ကြက်ခြေနီ အစရှိသည်တို့ ပါဝင်သည့် အစည်းအဝေးတစ်ရပ်ကို ၂၀၂၀ ခုနှစ်၊ စက်တင်ဘာလ (၄)ရက် နံနက်ပိုင်းက ပြုလုပ်ခဲ့ရာ မြို့နယ်အုပ်ချုပ်ရေးမှူးက ယင်းသို့ ပြောကြားခဲ့ခြင်း ဖြစ်သည်။

Covid-19 ကူးစက်ရောဂါကြောင့် ၂၀၂၀ ခုနှစ် မတ်လအတွင်းက ကျောက်မဲပြည်သူ့ ဆေးရုံရှေ့တွင် ကျန်းမာရေး စစ်ဆေးမှုစင်တာ ( Check Point ) တစ်ခုဖွင့်လှစ်ခဲ့ပြီးနောက် ဇွန်လကုန်ပိုင်း၌ ရုတ်သိမ်းခဲ့ရာ ယခုအခါမှာ နေရာပြောင်းရွှေ့ကာ Check Point တစ်ခု ပြန်လည် ဖွင့်လှစ်ရန်အတွက် အစည်းအဝေးတစ်ခု ပြုလုပ်ခဲ့ခြင်း ဖြစ်သည်။

ကျောက်မဲ မှ ရန်ကုန် သို့ ​ပြေးဆွဲသည့် ခရီးသည်တင် Express ယာဥ်လိုင်း (၂)ခုသာရှိပြီး ယာဥ်လိုင်းများ ပြေးဆွဲခွင့် မပိတ်သိမ်းသေးသော်လည်း စက်တင်ဘာလမှစ၍ ရန်ကုန်နှင့် ရခိုင်မှ ပြန်လာသူ မည်သူမဆို ခရိုင်ကျန်းမာရေးဌာန၏ ဆုံးဖြတ်မှုဖြင့် နေအိမ်အသွားအလာကန့်သတ် ထားရှိမည်ဖြစ်ကာ၊ ရန်ကုန်ကား ယာဥ်လိုင်းမှယာဥ်မောင်းနှင့် ယာဥ်နောက်လိုက်များလည်း သီးသန့် နေအိမ်ဖြင့်နေရမည်ဟု သိရသည်။