တာချီလိတ်တွင် Facility Quarantine ဝင်နေသူများနှင့် ထိတွေ့သူ (၇၇)ဦးကို COVID 19 ဓာတ်ခွဲနမူနာ စစ်ဆေးရန် ရန်ကုန်သို့ပို့ဆောင်
ရှမ်းပြည်နယ် (အရှေ့ပိုင်း) တာချီလိတ်မြို့တွင် အသွားအလာကန့်သတ်ထားသည့် ထိုင်းနိုင်ငံမှ နေရပ်ပြန်များအပါအဝင် စုစုပေါင်း (၇၇)ဦးထံမှ ဓာတ်ခွဲနမူနာများကို ၂၀၂၀ ခုနှစ်၊ စက်တင်ဘာလ (၅)ရက်နေ့က ရန်ကုန်အမျိုးသားကျန်းမာရေးဓာတ်ခွဲမှုဆိုင်ရာဌာနသို့ ပေးပို့စစ်ဆေးထားကြောင်း သိရသည်။
တာချီလိတ် - မယ်ဆိုင်လမ်းကြောင်းဖြင့် ပြန်ဝင်လာသည့် ထိုင်းနိုင်ငံမှ ပြည်တော်ပြန် မြန်မာနိုင်ငံသားများအနက် တာချီလိတ်မြို့နယ်အတွင်းနေထိုင်သူများအား မိုးကုတ်ဝိပဿနာတရားရိပ်သာ၌ အသွားအလာကန့်သတ်ထားရှိခြင်းဖြစ်သည်။
Facility quarantine ထားရှိသူများနှင့် အနီးကပ်ထိတွေ့သူများ စုစုပေါင်း (၇၇)ဦးကို COVID 19 စစ်ဆေးရန် ဓာတ်ခွဲနမူနာများကို ရယူပို့ဆောင်ထားခြင်းဖြစ်ပြီး ယင်းတို့အနက်မှ ဓာတ်ခွဲနမူနာ (၁၀)ခုကို အမျိုးသားကျန်းမာရေးဓါတ်ခွဲမှုဆိုင်ရာဌာနတွင် စစ်ဆေးခြင်းအပြင် တာချီလိတ်ပြည်သူ့ဆေးရုံကြီးတွင်လည်း စတင်စမ်းသပ်စစ်ဆေးမည်ဖြစ်ကြောင်း သိရသည်။
