မိုင်းဖုန်းဆရာတော်၏ သက်တော်(၆၁)နှစ်ပြည့် အထိမ်းအမှတ် ဝိဇာတမွေးနေ့ မင်္ဂလာပွဲတော်အား တာချီလိတ်မြို့ မိုင်းဖုန်း(က)ကျေးရွာအုပ်စုအတွင်းရှိ လွန်းလိန်းသာသနာ့နယ်မြေတွင် ၂၀၂၅ခုနှစ် ဇန်နဝါရီလ(၁)ရက်နေ့ကနေ ဇန်နဝါရီလ(၆)ရက်နေ့အထိ ကျင်းပြုလုပ်မည်ဖြစ်ကြောင်း သိရသည်။
မွေးနေ့ပွဲတော်အစီအစဉ်အရ ၂၀၂၅ခုနှစ် ဇန်နဝါရီလ(၁)ရက်နေ့ မှ (၃)ရက်နေ့အထိ နှီးဘုရားအနှီးရှိ တရားဟောစင်တွင် သတ်မှတ်အချိန်များ၌ မိုင်းဖုန်းဆရာတော်မှ တရားတော်ဟောကြားမည်ဖြစ်ပြီး ဇန်နဝါရီလ(၃)ရက်နေ့၏ နံနက်(၁၀)နာရီ အချိန်အတွင် နှစ်(၇၀)စေတီ (ပူတာအိုစေတီတော်)အား ထီးတော် တင်လှူမည်ဖြစ်ကြောင်း သိရသည်။
ဆက်လက်၍ ဇန်နဝါရီလ(၃)ရက်နေ့ ညနေခင်းကနေ ဇန်နဝါရီလ(၄)ရက်နေ့အထိ သတ်မှတ်အချိန်များတွင် တရားတော်များဟောကြားပြီး ဇန်ဝါရီလ(၅)ရက်နေ့တွင် ဝစီပိတ်အဓိဌာန်ဝင်မည်ဖြစ်ပြီး ညနေခင်း(၃)နာရီအချိန်တွင် မိုင်းဖုန်းဆရာတော်အား ရေသပ္ပာယ်ပူဇော်မည်ဖြစ်ကြောင်း သိရသည်။
သဒ္ဓမ္မဇောတိကဓဇ အဂ္ဂမဟာ ကမ္မဋ္ဌာနာစရိယ မိုင်းဖုန်းဆရာတော် ဘဒ္ဒန္တဉာဏသံဝရ ၏ ဝိဇာတမွေးနေ့ပွဲကာလ တလျှောက်လုံး အလှူရှင်များက အခမဲ့ ကျွေးမွေး လှူဒါန်းသွားမည်ဖြစ်ကြောင်း နှင့် လွန်းလိန်းစေတီတော် ဧရိယာအတွင်း ဈေးရောင်းချခြင်းများကို လုံးဝ ခွင့်ပြုမည် မဟုတ်ဘဲ ဗုဒ္ဓဂယာစေတီတော် မျက်နှာချင်းဆိုင်ရှိ လွန်းကျိုင်းရွာ ကွင်းပြင်၌သာ ဈေးရောင်းချခွင့်ပြုသွားမည် ဖြစ်ကြောင်း သိရသည်။
