ရှမ်းပြည်နယ်မြောက်ပိုင်း လားရှိုးမြို့တွင်း အာဏာသိမ်းစစ်ကောင်စီဘက်က MNDAA ထံ လက်နက်ချ အလင်းဝင်လာသည့် စစ်သုံ့ပန်းများထဲက ဒဏ်ရာရရှိသူများကို ဆေးကုသပေးနေရာတွင် လားရှိုးခရိုင်ရဲတပ်ဖွဲ့၏ ဒုတိယရဲတပ်ဖွဲ့မှူး လှမျိုးလည်း ပါဝင်ကြောင်း ၂၀၂၄ခုနှစ် ဩဂုတ်လ(၆)ရက်နေ့တွင် သတင်းထုတ်ပြန်လာသည်။

၎င်းသည် တိုက်ပွဲ ပြင်းထန်လာ၍ လားရှိုးကနေ ထွက်ပြေးရန် ကြိုးပမ်းစဉ် လားရှိုးမြို့ပေါ် ရပ်ကွက်(၁)ရှိ ကျောင်းဘေးတွင် လက်နက်ကြီး ကျည်စ ထိမှန်ပြီး ဒဏ်ရာရရှိခဲ့ခြင်း ဖြစ်ရာ ၎င်းအား ဆေးကုသပေးနေရာမှ ယခုအခါတွင် ပြန်လည် သက်သာကျန်းမာလာပြီဖြစ်ကြောင်း သိရသည်။

လားရှိုးမြို့ရှိ အရှေ့မြောက်ပိုင်းတိုင်းစစ်ဌာနချုပ်ကို MNDAA မဟာမိတ်တပ်က တိုက်ခိုက် သိမ်းပိုက်ပြီးနောက် အာဏာသိမ်း စစ်ခေါင်းဆောင် မင်းအောင်လှိုင်က အဆိုပါ တပ်ဖွဲ့များကို စွန့်ပယ်ထားခဲ့သော်လည်း MNDAA က ၎င်း၏ အရာရှိများနှင့် စစ်သည်များအား တန်းတူညီမျှစွာ ဆက်ဆံပြီး လူသားချင်းစာနာမှုအကူအညီများ အစွမ်းကုန်ပံ့ပိုးပေးကာ ဆေးကုသမှုများ ဆောင်ရွက်ပေးနေလျှက်ရှိကြောင်း သတင်းထုတ်ပြန်ထားသည်။

လားရှိုးခရိုင်ရဲတပ်ဖွဲ့၏ ဒုတိယရဲတပ်ဖွဲ့မှူး လှမျိုး နှင့် ပတ်သက်ပြီး MNDAA က ၎င်းအား သတ်ဖြတ်လိုက်သည်ဟု စစ်ကောင်စီ၏ လော်ဘီများက ရေးသားပြောဆိုမှုများရှိနေသော်လည်း လက်တွေ့တွင် ဒုတိယရဲတပ်ဖွဲ့မှူး လှမျိုးသည် MNDAA ၏ ဆေးကုသပေးမှုဖြင့် သက်သာ ကျန်းမာလာသည်ကို MNDAA ၏ သတင်းထုတ်ပြန်ချက် ဗီဒီယိုမှတ်တမ်းတွင် တွေ့ရသည်။

 

Photo: MNDAA