မွန်ပြည်နယ် ဂျိုင်းမြစ်ဝှမ်းဒေသရှိ တိုက်ပွဲများကြောင့် နေရပ်စွန့်ခွာ၍ စစ်ဘေးတိမ်းရှောင်ခဲ့ရသည့် ဒေသခံများသည် တိုက်ပွဲများငြိမ်သက်၍ ၎င်းတို့ နေထိုင်ရာဒေသသို့ပြန်လာချိန်တွင် အရွယ်ကောင်း အမျိုးသမီးများကို စစ်ကောင်စီတပ်သားများမှ နှောင့်ယှက်မှုများလုပ်ဆောင်နေကြောင်း မွန်ပြည်ဖက်ဒရယ်ကောင်စီမှ ၂၀၂၄ ခုနှစ် ဇူလိုင်လ (၅)ရက်နေ့တွင် သတင်းထုတ်ပြန်သည်။
ဂျိုင်းမြစ်ဝှမ်းဒေသတွင် စစ်ကောင်စီတပ်များသည် ကျေးရွာများထဲမှ လက်နက်ကြီးပစ်ခတ်ခြင်း၊ စစ်သင်္ဘောမှ လက်နက်ကြီးပစ်ခတ်ခြင်းနှင့် လေကြောင်းမှ ဗုံးကြဲတိုက်ခိုက်ခဲ့ခြင်းတို့ကို လုပ်ဆောင်ခဲ့သောကြောင့် ဒေသခံပြည်သူများမှာ မတ်လ စတုတ္ထပတ်မှစတင်ပြီး နေအိမ်များမှ စွန့်ခွာထွက်ပြေးခဲ့ကြရကြောင်း သိရသည်။
ထို့နောက် တိုက်ပွဲများ ပြန်လည်ငြိမ်သက်လာချိန်တွင် နေရပ်ပြန်လာကြသည့် ဒေသခံအမျိုးသမီးများကို စစ်ကောင်စီတပ်သားများက ၎င်းတို့စားသောက်ရန်အတွက် ထမင်းဟင်းနှင့် စားသောက်ဖွယ်ရာများ ချက်ပြုတ်ရန် စေခိုင်းခြင်း၊ ညအချိန်မတော် အိမ်တံခါးများခေါက်ခြင်းနှင့် လမ်းသွားလမ်းလာများကို စစ်ဆေးသည်ဟုဆိုကာ လူငယ်အမျိုးသမီးများကို နှုတ်အားဖြင့် နှောင့်ယှက်နေကြောင်း ပြည်သူများထံမှတဆင့် ပြန်လည်ကြားသိရကြောင်း မွန်ပြည်ဖက်ဒရယ်ကောင်စီမှ ဆိုသည်။
အဆိုပါ စစ်ကောင်စီတပ်သားများသည် ဂျိုင်းမြစ်ဝှမ်းဒေသတွင် တိုက်ပွဲများဖြစ်ပွားခဲ့ပြီးနောက် ၎င်းတို့တပ်စွဲထားရာကျေးရွာနှင့် အနီးအနားရှိကျေးရွာများမှ ဒေသခံပြည်သူများ၏ နေအိမ်နှင့် ခြံဝင်းများထဲရှိ ပြည်သူပိုင်ပစ္စည်းများကို ဖောက်ထွင်းယူဆောင်ခြင်းများလည်း လုပ်ဆောင်ခဲ့ကြောင်း သိရသည်။
စစ်ကောင်စီတပ်သည် တိုက်ပွဲဖြစ်ပွားစဉ်တွင် လူ့အခွင့်အရေးနှင့် စစ်ရာဇဝတ်မှုများကို ပြောင်ပြောင်တင်းတင်း ချိုးဖောက်ခဲ့ရုံမျှမက တိုက်ပွဲဖြစ်ပွားရာဒေသမှ ပြည်သူများ နေရပ်မပြန်ရဲစေရန် လူ့အခွင့်အရေးချိုးဖောက်မှုကို နည်းလမ်းမျိုးစုံဖြင့် ဆက်တိုက်ကျူးလွန်နေဆဲဖြစ်ကြောင်း မွန်ပြည်ဖက်ဒရယ်ကောင်စီမှ ဆိုသည်။
စစ်ကောင်စီတပ် ယခုကဲ့သို့ ဂျိုင်းမြစ်ဝှမ်းဒေသမှ နေရပ်ပြန် အမျိုးသမီးများအပေါ် နှောင့်ယှက်နေပြီး ပြည်သူများ ရှင်သန်ခြင်းအပေါ် အန္တရာယ်ပြုနေခြင်းနှင့် စစ်ကောင်စီလက်ချက်ကြောင့် အိုးအိမ်စည်းစိမ်များ ထိခိုက်ပျက်စီးဆုံးရှုံးခဲ့ရပြီး အကူအညီများလိုအပ်နေသည့် ပြည်သူများအပေါ် လူ့အခွင့်အရေးများ ထပ်မံချိုးဖောက်နေခြင်းအား မွန်ပြည်ဖက်ဒရယ်ကောင်စီမှ ပြင်းထန်စွာရှုံချကြောင်း သိရသည်။
ထို့အပြင် မွန်ဒေသမှ အကူအညီများလိုအပ်နေသည့် ပြည်သူများကို ပြည်တွင်း၊ ပြည်ပရောက် ပြည်သူများ၊ နိုင်ငံတကာအဖွဲ့အစည်းတို့မှ လူသားစာနာမှုအကူအညီများပေးအပ်နိုင်ရန်အတွက် မွန်ပြည်ဖက်ဒရယ်ကောင်စီမှ တိုက်တွန်းထားသည်။
#TachileikNewsAgency
Photo : Mon State Federal Council - MSFC
