ချင်းပြည်နယ် မတူပီမြို့နယ်ရှိ စစ်ကောင်စီတပ်၏ ဗျူဟာကုန်း ခလရ(၁၄၀)နှင့် အခြားစစ်ကောင်စီတပ်စခန်းကို ဆက်လက်သိမ်းပိုက်နိုင်ရေး ထိုးစစ်ဆင်တိုက်ခိုက်နေကြောင်း ချင်းညီနောင်တပ်ဖွဲ့များက ယနေ့  ၂၀၂၄ခုနှစ် ဇွန်လ (၁၈)ရက်နေ့တွင် သတင်းထုတ်ပြန်သည်။

ချင်းညီနောင်တပ်ဖွဲ့များသည် အာရက္ခတပ်တော်(AA)၊ Yaw Army(YA) အစရှိသည့် မဟာမိတ်တပ်ဖွဲ့များနှင့်အတူ ဇွန်လ(၉)ရက်နေ့က မတူပီမြို့ပေါ်ရှိ စစ်ကောင်စီတပ်စခန်းများကို ဝင်ရောက်တိုက်ခိုက်ရာ ဇွန်လ(၁၇)ရက်နေ့တွင် ခမရ(၃၀၄)တပ်ရင်းအား အပြီးသတ်သိမ်းပိုက်နိုင်ခဲ့သည်ဟု သိရသည်။

photo_2024-06-18_17-54-04.jpg

အဆိုပါတိုက်ပွဲအတွင်းမှ စစ်ကောင်စီတပ်၏ ဟောင်ဝှစ်ဇာလက်နက်ကြီးများနှင့် လက်နက်ခဲယမ်းများကို သိမ်းဆည်းရရှိခဲ့သည်ဟု ဆိုသည်။

ထို့အပြင် မေလ(၂၇)ရက်နေ့ကလည်း တီးတိန်မြို့ပေါ်ရှိ စစ်ကောင်စီတပ်၏ EPC လျှပ်စစ်ရုံးစခန်း၊ တာဝါတိုင် ကုန်းစခန်းတို့ကို တိုက်ခိုက်သိမ်းပိုက်ခဲ့ရာ စစ်ကောင်စီတပ်သား(၇)ဦးသေပြီး (၉)ဦးကိုဖမ်းဆီးရမိကာ လက်နက်ကြီးနှင့် လက်နက်ငယ်(၁၇)လက်ကို သိမ်းဆည်းရရှိခဲ့သည်ဟု ထုတ်ပြန်ထားသည်။

photo_2024-06-18_17-54-04_3.jpg

တိုက်ပွဲအတွင်း တော်လှန်ရေးရဲဘော်တချို့လည်း ကျဆုံးခဲ့ရသည်ဟုလည်း ဆိုသည်။

ချင်းညီနောင်များ၏ စစ်ဆင်ရေးတစ်ခုဖြစ်သော ၂၀၂၄ခုနှစ်အတွင်း ချင်းပြည်နယ်တွင် စစ်ကောင်စီတပ်များ အလုံးစုံကင်းစင်ရေးအတွက် ချင်းညီနောင်စစ်ဆင်ရေး ကနဦးအဆင့်အဖြစ် အာရက္ခတပ်တော်(AA)၊ Yaw Army(YA) အစရှိသည့် မဟာမိတ်တပ်ဖွဲ့များနှင့်အတူ တိုက်ခိုက်နေခြင်းဖြစ်ကြောင်း သိရသည်။

#TachileikNewsAgency