ကချင်ပြည်နယ် ဝိုင်းမော်မြို့ကို ယနေ့ ၂၀၂၄ ခုနှစ် ဇွန်လ (၁၀)ရက်နေ့ ညပိုင်းတွင် စစ်ကောင်စီတပ်က လက်နက်ကြီးနှင့်ပစ်ခတ်နေကြောင်း ဒေသခံများထံမှ သိရသည်။
မြစ်ကြီးနားအဝင်ရှိ စစ်ကောင်စီတပ်ရင်းများက ဝိုင်းမော်မြို့တွင်းကို ယနေ့ မနက်ပိုင်းကစတင်ပြီး ယခုညပိုင်းအထိ လက်နက်ကြီးနှင့် ဝိုင်းပစ်နေကာ ဝိုင်းမော်မြို့ဘက်မှလည်း အဆိုပါတပ်ရင်းများအား လက်နက်ကြီးနှင့် ပြန်လည်ပစ်ခတ်၍ တပ်ရင်းအတွင်း ကျရောက်ပေါက်ကွဲခြင်းများရှိကြောင်း သိရသည်။
"အမြောက်တွေ ပတ်ချာလည်ကနေထုနေတာ။ စက်ကြီး၊ စက်လတ် တွေနဲ့ပါပစ်နေတာ။ တပ်ပတ်လည်က ပစ်နေတာပဲ သိရတာ။ ဝိုင်းမော် ရွှေညောင်ပင်ဘက်လို့ပြောတာပဲ။ သေချာတော့ မသိရဘူး။" ဟု ဒေသခံတစ်ဦးက Tachileik News Agency ကိုပြောသည်။
လက်နက်ကြီးများ ဆက်တိုက်ပစ်ခတ်နေသဖြင့် နေအိမ်များပင် တုန်ခါသည်အထိ ဖြစ်ပွားခဲ့ပြီး အခြေအနေအသေးစိတ်ကိုမူ မသိရပါ။
"ဝိုင်းမော်နဲ့က တစ်ဖက်ကမ်းပဲဆိုတော့ လက်နက်ကြီးနဲ့ပစ်နေတာကို သိရတာပေါ့။ သေနတ်သံတွေလည်း ဆူညံနေတာပဲ။"ဟု ဒေသခံတစ်ဦးက ဆက်ပြောသည်။
ယနေ့ ညနေပိုင်းကလည်း စစ်ကောင်စီတပ်သည် ဝိုင်းမော်မြို့နယ် လမြန်ကျေးရွာရှိ ကချင်နှစ်ခြင်းခရစ်ယာန် ခါနန်နှစ်ခြင်းအသင်းတော် ဘုရားကျောင်းကို ဒရုန်းနဲ့ဗုံးကြဲရာ ဘုရားကျောင်းဆောင် ပျက်စီးသွားသည်ဟု သိရသည်။
#TachileikNewsAgency
