မွန်ပြည်နယ် သထုံမြို့နယ်အတွင်း စစ်ကောင်စီ၏ လက်နက်ကြီး ပစ်ခတ်မှုကြောင့် အရပ်သား (၂)ဦး ထိခိုက်ဒဏ်ရာရပြီး လူနေအိမ်အချို့ ပျက်စီးကြောင်း KNU ဗဟိုမှ ယနေ့ ၂၀၂၄ ခုနှစ် မေလ (၁၉)ရက်နေ့တွင် သတင်းထုတ်ပြန်သည်။
သထုံမြို့နယ်အတွင်း ကျေးရွာများထဲသို့ မေလ (၁၇)ရက် မနက် (၁၁)နာရီ (၁၅)မိနစ်တွင် စစ်ကောင်စီ (ခမရ-၉) တပ်ရင်းတပ်စခန်းမှ လက်နက်ကြီး (၃)လုံး ပစ်ခတ်ရာ သုံးအိမ်စုရွာတွင် ကျရောက်ပေါက်ကွဲပြီး အသက် (၁၅)နှစ်အရွယ် ကလေးငယ်တစ်ဦး လက်နက်ကြီးကျည်စ ထိမှန်ဒဏ်ရာရကာ အရပ်သားနေအိမ် (၂)လုံး ထိခိုက်ပျက်စီးခဲ့ကြောင်း KNU မှ သတင်းထုတ်ပြန်သည်။
ထိုနေ့ ညနေ (၅)နာရီတွင် စစ်ကောင်စီ (အမတ-၃၁၄)တပ်ရင်း တပ်စခန်းမှ လက်နက်ကြီး (၆)လုံး ထပ်မံပစ်ခတ်ရာ သထုံမြို့နယ် ရွှေရောင်ပြကျေးနယ်ရှိ ရွှေရောင်ပြရွာနှင့် အဝန်းကြီးရွာအကြား ကားလမ်းမအထက် ရော်ဘာခြံအတွင်း လက်နက်ကြီး (၄)လုံး ကျရောက်ပေါက်ကွဲပြီး နေအိမ် (၂)လုံး ထိခိုက်ပျက်စီးခဲ့ကြောင်းသိရသည်။
မေလ (၁၆)ရက်နေ့ ည (၇)နာရီ (၁၅)မိနစ်တွင်လည်း သထုံမြို့နယ်၊ ဝီယော်ကျေးနယ်ရှိ ရွာများထဲသို့ စစ်ကောင်စီ (ခမရ-၉) တပ်မှ လက်နက်ကြီး (၄)လုံးပစ်ခတ်ရာ ရော်ဘာခြံအတွင်း လက်နက်ကြီး (၄)လုံးစလုံး ကျရောက်ပေါက်ကွဲခဲ့ပြီး ဝင်းပရွာကြီးနေ ဒေသခံတစ်ဦး လက်နက်ကြီးကျည်စ ထိမှန်ဒဏ်ရာရရှိခဲ့ကြောင်း သိရှိရသည်။
မေလ (၁၆)ရက်နေ့ မနက် (၁၁)နာရီ (၅၀)မိနစ်တွင် စစ်ကောင်စီ (ခမရ-၉)တပ်မှ လက်နက်ကြီး (၂)လုံး၊ နေ့လယ် (၁၂)နာရီ (၁၃)မိနစ်တွင် စစ်ကောင်စီ (အမတ-၃၁၄)တပ်မှ လက်နက်ကြီး (၃)လုံး ပစ်ခတ်ခဲ့ကြောင်း KNU မှ သတင်းထုတ်ပြန်သည်။
စစ်ကောင်စီသည် KNU ထိန်းချုပ်နယ်မြေများအတွင်းရှိ ကျေးရွာများအတွင်းသို့ ရည်ရွယ်ချက်ရှိရှိ လက်နက်ကြီးနှင့် ပစ်ခတ်ခြင်း ၊ လေကြောင်းဖြင့် ဗုံးကြဲတိုက်ခိုက်ခြင်းများ မကြာခဏဆိုသလိုပြုလုပ်နေပြီး မေလ (၁၄)ရက်နေ့ကလည်း သထုံအခြေစိုက် ခမရ (၉) တပ်ရင်းမှ သထုံမြို့နယ်အတွင်းရှိကျေးရွာများသို့ လက်နက်ကြီးဖြင့် ပစ်ခတ်ခဲ့သဖြင့် လူနေအိမ် (၄)လုံး ထိခိုက်ပျက်စီးခဲ့ကြောင်းသိရသည်။
#TachileikNewsAgency
Photo: KNU
