ကရင်နီ(ကယား)ပြည်နယ်၊ ဒီးမော့ဆိုမြို့နယ်အတွင်း အာဏာသိမ်းစစ်ကောင်စီတပ်က တာဝေးပစ်လက်နက်ကြီးများပါ အသုံးပြု၍ သာလွန်လက်နက်ဖြင့် တိုက်ခိုက်နေသည့်အတွက် ပြည်သူ့ကာကွယ်ရေးတပ်များ ခေတ္တဆုတ်ခွာခဲ့ရသည်ဟု ယနေ့ ၂၀၂၂ ခုနှစ် မတ်လ (၁၅)ရက်နေ့တွင် ဒီးမော့ဆို PDF က သတင်းထုတ်ပြန်ထားသည်။

ပြည်သူ့ကာကွယ်ရေးတပ် ဒီးမော့ဆို (DMO Local PDF) တပ်ရင်း -A နှင့် အခြားပူးပေါင်းတပ်များ စစ်ကောင်စီနှင့် တိုက်ပွဲများဖြစ်ပွားခဲ့ရာ စစ်ကောင်စီတို့မှ တာဝေးပစ်လက်နက်ကြီးဖြင့် ပစ်ခတ်ခဲ့ရာ ပြည်သူ့ကာကွယ်ရေးတပ်ဖွဲ့များတွင် လက်နက်အင်အားများစွာ လိုအပ်ချက်ကြောင့် နယ်မြေမှ ဆုတ်ခွာကြရသည်ဟု သတင်းထုတ်ပြန်သည်။

အာဏာသိမ်းစစ်ကောင်စီတပ်က ကရင်နီ(ကယား)ပြည်နယ်တွင်းကို အင်အားအလုံးအရင်းဖြင့် တောက်လျှောက် ထိုးစစ်ဆင် တိုက်ခိုက်မှုအတွင်း လေကြောင်းမှ တိုက်ခိုက်မှအပြင် တာဝေးပစ်လက်နက်ကြီးများကိုပါ အသုံးပြုလာကာ ပိုမိုပြင်းထန်စွာ တိုက်ခိုက်နေမှုကို ပြည်သူ့အကူအညီဖြင့် လက်နက်တပ်ဆင်ရင်းတော်လှန်နေကြသည့် ပြည်သူ့ကာကွယ်ရေးတပ်ဖွဲ့များက ခုခံတိုက်ခိုက်နေကြခြင်းဖြစ်သည်။