မလေးရှားသံအမတ်က ၂၀၂၁ ခုနှစ်၊ ဧပြီလ (၇) ရက်နေ့က နေပြည်တော်တွင် စစ်ကောင်စီ၏ လျှပ်စစ်နှင့်စွမ်းအင်ဝန်ကြီးအား တွေ့ဆုံခြင်းမှာ မလေးရှားအစိုးရအနေဖြင့် အာဏာသိမ်းစစ်ကောင်စီအား အသိအမှတ်ပြုခြင်း မဟုတ်ကြောင်း မလေးရှားနိုင်ငံခြားရေးဝန်ကြီးက မီဒီယာများသို့ ထုတ်ပြန်လိုက်သည်။
ယင်းတွေ့ဆုံမှုမှာ PETRONAS Carigali Myanmar (Hong Kong) Limited (PCML) က မြန်မာနိုင်ငံရှိ ရဲတံခွန် သဘာဝဓာတ်ငွေ့ရှာဖွေရေးလုပ်ငန်းကို ယာယီဆိုင်းငံ့ကြောင်းကို လျှပ်စစ်နှင့်စွမ်းအင်ဝန်ကြီးဌာနသို့ လာရောက်အသိပေးခြင်းဖြစ်သည်ဟု သိရသည်။
မလေးရှားနိုင်ငံအနေဖြင့် မြန်မာနှင့်ပတ်သက်၍ ရပ်တည်ချက်ရှင်းရှင်းလင်းလင်း ဖေါ်ပြထားပြီးဖြစ်ကြောင်း သိရသည်။
မြန်မာနိုင်ငံတွင်း အကြမ်းဖက်မှုများ ချက်ချင်းရပ်တန့်ရန်၊ နိုင်ငံရေးအကျဉ်းသားများအား ချက်ချင်းလွှတ်ပေးရန်၊ တွေ့ဆုံညှိနှိုင်းအဖြေရှာရန်၊ နိုင်ငံနှင့်ပြည်သူများအကျိုးကိုရှေးမှု၍ ငြိမ်းချမ်းတည်ငြိမ်သည့်လုပ်ငန်းစဉ်များ ဖေါ်ဆောင်ရန် မလေးရှားက တိုက်တွန်းထားပြီး မလေးရှားက မြန်မာပြည်သူများနှင့်အတူ ရပ်တည်မည်ဟု ထုတ်ပြန်ချက်တွင် ဖေါ်ပြထားသည်။
