ကိုဇက်-Tachileik News Agency
တာချီလိတ်၊ ဇွန်(၂၀)ရက်
အင်းလေးကန် ပလပ်စတစ်အမှိုက်ကင်းစင်ရေးအတွက် ဂျပန်နိုင်ငံမှလှူဒါန်းသည့် အမှိုက်မီးရှို့စက်ဖြင့် ရှင်းလင်းခြင်းကို အင်းလေးကန်ဒေသ မိုင်းသောက်ကျေးရွာတွင် ဇွန်လအတွင်းစတင် စမ်းသပ်လုပ်ဆောင်နေပြီလို့ သိရပါတယ်။
"အဓိကတော့ အင်းလေးကန်ထဲမှာစွန့်ပစ်တဲ့ ပလပ်စတစ်အမှိုက်ပြဿနာကို ဖြေရှင်းဖို့ပါ။ တခြားအမှိုက်တွေက ဆွေးမြေ့လွယ်ပေမဲ့ ပလပ်စတစ်ကပျက်စီးဖို့ခက်ခဲတယ်လေ။ နိုင်ငံခြား NGO တွေလာတဲ့အချိန်မှာ အင်းလေးကန်နဲ့ ပလပ်စတစ်ပြဿနာတွေ့သွားလို့ လာပြီး တပ်ဆင်ပေးထားတာပါ။ အခုလောလောဆယ်တော့ စမ်းသပ်တဲ့ အဆင့်ပဲရှိသေးတယ်။ နောက်ပိုင်း အမှိုက်အများဆုံးထွက်တဲ့ ဖောင်တော်ဦးဘုရားလိုမျိုးနေရာမှာ တပ်ဆင်ပြီး အသုံးပြုသွားဖို့ စီစဉ်ထားပါတယ်"လို့ Save The Innlay အဖွဲ့မှ ကိုခင်မောင်လတ်က ပြောပါတယ်။
ဂျပန်နိုင်ငံမှ ၀ယ်ယူလှူဒါန်းသော အမှိုက်မီးရှို့စက်မှာ သဘာဝပတ်ဝန်းကျင်ထိခိုက်မှု နည်းပါးပြီး တစ်နာရီလျှင် ပလပ်စတစ်အခြောက် ကီလို(၁၀၀)ခန့် လောင်ကျွမ်းပျက်စီးနိုင်ပြီး အခြားစိုထိုင်းအမှိုက်များအား တစ်နာရီလျှင် ကီလို(၆၀)ကျော်ခန့် လောင်ကျွမ်းကြောင်း သိရပါတယ်။
"အမှိုက်မီးရှို့စက်က ပထမဆုံးအမှိုက်ကို လျှပ်စစ်အားနဲ့ မီးရှို့ပေးလိုက်တယ်။ ထွက်လာတဲ့ မီးခိုးငွေ့ကို လှောင်ထားတဲ့ အခန်းမှာ သတ်မှတ်ထားတဲ့ အပူချိန်နဲ့ ပမာဏရအောင် စောင့်ရတယ်။ ရပြီဆိုရင် မီးခိုးတွေကို ဒီဇယ်ဆီဖြန်းပြီး မီးထပ်ရှို့တယ်။ ကာဗွန်ဒိုင်အောက်ဆိုဒ် ဓာတ်ငွေ့က အပြင်ပြန်မထွက်တော့ဘူး။ ဂျပန်မှာလည်း အဲဒီလို အသုံးပြုနေတယ်လို့ ပြောတယ်”လို့ ကိုခင်မောင်လတ်က ဆိုပါတယ်။
အိမ်ခြေ(၁၅၀)မှ ထွက်ရှိသော အမှိုက်များအား စက်တစ်လုံးဖြင့် မီးရှို့ဖျက်ဆီးနိုင်ကြောင်း သိရပြီး အင်းလေးကန်အတွင်း အမှိုက်သန့်ရှင်းရေးအတွက် အမှိုက်မီးရှို့စက် (၄)လုံးထပ်မံမှာယူထားကြောင်း သိရပါတယ်။
Save The Innlay အဖွဲ့မှ ဒေသခံများအား အမှိုက်စွန့်ပစ်ရာတွင် အမှိုက်စို၊ အမှိုက်ခြောက်၊ ပြန်လည်အသုံးပြုရန် အမှိုက်နှင့် ပလပ်စတစ်အမှိုက်ဟူ၍ ခွဲခြားစွန့်ပစ်ရန် ဒေသခံများအား အသိပညာပေးလျှက်ရှိကြောင်း သိရပါတယ်။
