~~~~~~~~⊰❂ unicode ❂⊱~~~~~~~~

ကာကွယ်ဆေးထိုးပြီးနောက် သေဆုံးခဲ့သည့် ကလေးသုံးဦးမှာ လေပြွန်ရောင်ခြင်းနှင့် အခြားဗိုင်းရပ်စ်ပိုးဝင်ခြင်းကြောင့်ဖြစ်ကြောင်း သတင်းထုတ်ပြန်
***********
ဂျပန်ဦးနှောက်ရောင်ကာကွယ်ဆေးထိုးနှံပြီးနောက် သေဆုံးခဲ့သည့် ကလေးသုံးဦးမှာ လေပြွန်ရောင်ရောဂါ၊ အခြားဗိုင်းရပ်စ်ပိုးဝင်ခြင်းကြောင့် အစာအိမ်နှင့် အူလမ်းကြောင်း၊ နှလုံးနှင့် ကျောက်ကပ် ထိခိုက်ခြင်းများကြောင့် သေဆုံးခြင်းဖြစ်ကြောင်း ကျန်းမာရေးနှင့် အားကစားဝန်ကြီးဌာနက နိုဝင်ဘာလ (၂၄)ရက်နေ့တွင် သတင်းထုတ်ပြန်သည်။

ရှမ်းပြည်နယ်(တောင်ပိုင်း) ပင်လောင်းမြို့မှ ကျောင်းသူတစ်ဦး၊ ဧရာဝတီတိုင်းဒေသကြီး ပုသိမ်မြို့နယ်နှင့် သာပေါင်းမြို့နယ်တို့မှ ကလေးနှစ်ဦးတို့ ကာကွယ်ဆေးထိုးပြီးနောက် သေဆုံးခဲ့သဖြင့် ကျန်းမာရေးနှင့် အားကစားဝန်ကြီးဌာနမှ တာဝန်ရှိသူများ၊ ကလေးအထူးကုဆရာဝန်ကြီးများနှင့် ကမ္ဘာ့ကျန်းမာရေးအဖွဲ့၊ ကုလသမဂ္ဂကလေးများရန်ပုံငွေအဖွဲ့တို့မှ တာဝန်ရှိသူများက စစ်ဆေးမှုများ လုပ်ဆောင်ခဲ့ခြင်းဖြစ်ကြောင်း အဆိုပါ ထုတ်ပြန်ချက်တွင် ဖေါ်ပြထားသည်။

ပင်လောင်းမြို့မှ ကျောင်းသူမှာ ငယ်စဉ်ကတည်းက လေပြွန်ရောင်သောရောဂါဖြစ်ပွားခဲ့ပြီး ကာကွယ်ဆေးထိုးပြီးနောက် လေပြွန် ရုတ်တရက်ကျဉ်းသော လက္ခဏာများ ပြင်းထန်စွာဖြစ်ပေါ်ခဲ့သည်ကို စစ်ဆေးတွေ့ရှိရပြီး ဧရာဝတီတိုင်းဒေသကြီး၊ ပုသိမ်မြို့နယ်နှင့် သာပေါင်းမြို့နယ်တို့မှ  ကလေးနှစ်ဦးမှာ အခြားဗိုင်းရပ်စ်ပိုးဝင်ခြင်းကြောင့် အစာအိမ်နှင့် အူလမ်းကြောင်း၊ နှလုံးနှင့် ကျောက်ကပ် ထိခိုက်ခြင်းဖြစ်သည်ကို စစ်ဆေးတွေ့ရှိရကြောင်း ထုတ်ပြန်ချက်တွင် ဖေါ်ပြထားသည်။

အဆိုပါဖြစ်ရပ်များကြောင့် လက်ရှိကာကွယ်ဆေးထိုးအစီအစဉ်တွင် ကာကွယ်ဆေးမထိုးသင့်သည့် အခြေအနေနှင့် လက္ခဏာများ ရှိ၊ မရှိကို ကာကွယ်ဆေးမထိုးမီ စစ်ဆေးခြင်း၊ ကာကွယ်ဆေး မထိုးသင့်သည့် အခြေအနေကို မိဘများ ပိုမိုသိရှိရန် ကာကွယ်ဆေး မထိုးသင့်သည့် အချက်အလက်များပါဝင်သော ဗီနိုင်းပိုစတာများကို ကာကွယ်ဆေးထိုးစုရပ်တိုင်းတွင် ချိတ်ဆွဲပေးခြင်း၊ မိဘများ သိရှိလိုသော အချက်အလက်များအတွက် အမေးအဖြေကဏ္ဍများကို ပိုမိုကျယ်ပြန့်စွာ အသိပေးထုတ်ပြန်ခြင်း၊ ကာကွယ်ဆေးထိုးပြီး တစ်နာရီ စောင့်ကြည့်ခြင်း၊ မည်သည့်လက္ခဏာမျိုးမဆို ပေါ်ပေါက်ပါက ဆရာဝန်၊ ဆရာမထံ ချက်ချင်းပြသရန် အသိပေးခြင်းစသည့် အစီအစဉ်များကို ထည့်သွင်းဆောင်ရွက်ထားကြောင်း သိရသည်။

ကျောင်းအခြေပြု ကာကွယ်ဆေးထိုးအစီအစဉ်ကို နိုဝင်ဘာလ (၁၅)ရက်နေ့က စတင်ခဲ့ရာ နိုဝင်ဘာလ (၂၃) ရက်နေ့ ညနေ (၄)နာရီအထိ ရရှိသောသတင်းအရ  ရည်မှန်းကလေးဦးရေ (၈.၆) သန်းခန့်အနက် (၈) သန်းကျော် ထိုးနှံပေးနိုင်ခဲ့ပြီး ဖြစ်ကြောင်း သိရပြီး ပြည်သူလူထုအခြေပြု ကာကွယ်ဆေးထိုးအစီအစဉ်ကို ဒီဇင်ဘာလ (၁၁)ရက်နေ့တွင် စတင်ဆောင်ရွက်မည်ဖြစ်သည်။

ရောဂါဖြစ်ပွားလျှင် ပျောက်ကင်းအောင် ကုသနိုင်သည့်ဆေး မရှိသည့် ဂျပန်ဦးနှောက်ရောင်ရောဂါ ဖြစ်ပွားမှုများသော ကမ္ဘာ့နိုင်ငံ (၂၄) နိုင်ငံတွင် ပါဝင်နေသည့် မြန်မာနိုင်ငံတွင် ရောဂါဖြစ်နိုင်ချေရှိပြီး ကာကွယ်ဆေးမရရှိသေးသော အသက် (၉) လမှ (၁၅) နှစ်အရွယ် ကလေးများအတွက် အစုလိုက်ကာကွယ်ဆေးထိုးအစီအစဉ်ကို ဆောင်ရွက်နေခြင်းဖြစ်ကြောင်း သိရသည်။

အဆိုပါ လုပ်ငန်းအတွက် ကမ္ဘာ့ကျန်းမာရေးအဖွဲ့၊ ကုလသမဂ္ဂကလေးများရန်ပုံငွေအဖွဲ့တို့နှင့် ပူးပေါင်းဆောင်ရွက်ခဲ့ခြင်းဖြစ်ပြီး အမျိုးသားအဆင့် ကာကွယ်ဆေးထိုးလုပ်ငန်းဆိုင်ရာ အကြံပေးအဖွဲ့၏ နည်းပညာဆိုင်ရာ အကြံပြုမှုဖြင့် ဆောင်ရွက်ခဲ့ခြင်းဖြစ်ကြောင်း သိရသည်။

ဂျပန်ဦးနှောက်ရောင်ကာကွယ်ဆေး အစုလိုက်ထိုးနှံခြင်းလုပ်ငန်းတွင် သုံးစွဲလျက်ရှိသည့် ကာကွယ်ဆေးမှာ ကမ္ဘာ့ကျန်းမာရေးအဖွဲ့မှ အသိအမှတ်ပြု Japanese Encephalitis Vaccine Live (SA 14-14-2) ကာကွယ်ဆေး ဖြစ်ပြီး  လူပေါင်းသန်း (၄၀၀) ကျော်ကို ထိုးနှံပေးခဲ့ပြီးဖြစ်ကာ နိုင်ငံပေါင်း (၁၁) နိုင်ငံတွင် သုံးစွဲလျက် ရှိကြောင်း သိရသည်။

 ကာကွယ်ဆေးများ၏ ဘေးကင်းလုံခြုံမှုဆိုင်ရာ ကမ္ဘာ့အကြံပေးကော်မတီ (Global Advisory Committee on Vaccine Safety) က အလွန်ဘေးကင်းသော ကာကွယ်ဆေးအဖြစ် (WHO, Weekly Epidemiological Record, No.28, 2005, 80, 241–248) တွင် အသိအမှတ်ပြု ဖော်ပြထားကြောင်း သိရသည်။

သတင်း #နန်းဟွမ်ခမ်း