~~~~~~~~⊰❂ unicode ❂⊱~~~~~~~~

ရှမ်းပြည်နယ်(မြောက်ပိုင်း)၊ လားရှိုးမြို့နယ် ပုန်းထွန်ကျေးရွာအနီးရှိ ပြည်ထောင်စုလမ်းမကြီးပေါ်တွင် တရားပွဲမှ ပြန်လာပြီး ဆရာတော် (၂)ပါး လိုက်ပါလာသည့် ကားနှင့် ခရီးသည်တင် ယာဉ်တို့ တိုက်မိရာမှ ဆရာတော်(၁)ပါး မျက်လုံးတစ်လုံး ကျွတ်ထွက်သွားကြောင်း သိရသည်။

မေလ(၃)ရက်နေ့ နံနက်ပိုင်းက မူဆယ်တရားပွဲမှ ပြန်လာသည့် ယာဉ် နှင့် သီပေါဘက်မှ လာသည့် ခရီးသည်တင် ယာဉ်ငယ်တစ်စီးတို့ တိုက်မှုဖြစ်ပွားရာမှာ ဆရာတော်(၁)ပါး ယာဘက်မျက်လုံး ကျွတ်ထွက်သွားခဲ့ပြီး ယာဉ်မောင်းမှာ ဒဏ်ရာ အနည်းအငယ်ရရှိခဲ့ကြောင်း သိရသည်။

"မနက် (၉)နာရီလောက်မှာ ဖြစ်တာ။ ဘုန်းကြီးက (၂)ပါး ပါတယ်။ အဲ့ဒီကားက မနေ့ကမှ မူဆယ်ကလှူလိုက်တာလို့ သိရတယ်။ မျက်လုံးထွက်တဲ့ ဆရာတော်နဲ့ ဒဏ်ရာနည်းနည်းရတဲ့ ကားဒရိုင်ဘာကို လားရှိုးပြည်သူ့ဆေးရုံမှာ တင်ပေးထားတယ်"ဟု လားရှိုးမြို့ ပေးသောလက် လူမှုကူညီရေးအသင်းမှ ကိုမြင့်မော်က တာချီလိတ်သတင်းအေဂျင်စီသို့ ပြောသည်။

ယာဘက်မျက်လုံးထွက်သွားသည့် ဆရာတော်နှင့်၎င်းယာဉ်မှ ယာဉ်မောင်းအား လားရှိုးပြည်သူ့ဆေးရုံတွင် ကနဦး ပို့ဆောင်ပေးထားပြီး ဆရာတော်များ၏ ဘွဲ့တော်အမည်များနှင့် နေရပ်များအား မသိရှိရသေး ကြောင်း နှင့် ခရီးသည်တင်ယာဉ်ငယ်မှာ ယာဉ်မောင်းနှင့် ခရီးသည်များမှာ ပွန်းပဲ့ဒဏ်ရာ အနည်း အငယ်သာ ရရှိခဲ့ကြောင်း လားရှိုးမြို့ ပေးသောလက်လူမှုကူညီရေးအသင်းထံက သိရသည်။

အဆိုပါ ဖြစ်စဉ်နှင့် ပတ်သက်၍ လားရှိုးယာဉ်ထိန်းရဲတပ်ဖွဲ့မှ သွားရောက် စစ်ဆေးနေဆဲဖြစ်ကြောင်း သိရှိရသည်။

သတင်း - နဖြေိုးမြင့်
ဓာတ်ပုံ - ပေးသောလက်လူမှုကူညီရေးအသင်း