~~~~~~~~⊰❂ unicode ❂⊱~~~~~~~~
***************
ရှမ်းပြည်နယ်(တောင်ပိုင်း) ပင်းတယမြို့မှ ယခုနှစ် လက်ဖက်ထုတ်လုပ်မှု အရည်အသွေးပြည့်မီသဖြင့် ဂျာမနီသို့ Green Tea တစ်တန်ခွဲတင်ပို့နိုင်မည်ဖြစ်ကြောင်း ရှမ်းပြည်နယ်လက်ဖက်အစုအဖွဲ့ထံမှ သိရသည်။
“ဒီနှစ်ကတော့ ပြည်ပဆိုရင် ဂျာမနီကို တစ်တန်ခွဲ တင်ပို့ဖို့ စီစဉ်နေပါတယ်။ ပြည်တွင်းကတော့ သဘာဝရိုးရိုး နေလှန်းခြောက်တွေပဲ ပိုသုံးကြတယ်။ Green Tea လက်ဖက်ကတော့ စက်ရုံကထုတ်တဲ့ဟာဆိုရင်တော့ ဈေးပိုရတယ်။ သဘာဝလက်နဲ့လုပ်တဲ့ Green Tea ဆိုရင်တော့ ဈေးနည်းနည်းလျော့တယ်။ အစိုကျတော့ ပုံမှန်ဈေးနှုန်းအတိုင်းပဲရတယ်။ အရင်နှစ်က လက်ဖက်ပျက်စီးတာများသွားတော့ ပြည်ပလည်းမတင်ပို့ဘူး။ ဒီနှစ်ကလည်း အထွက်နည်းနည်းကျတယ်။ ရာသီဥတုနဲ့လည်း သက်ဆိုင်တယ်။ ဒါပေမဲ့ အထွက်လျော့ပေမဲ့လည်း ဈေးကောင်းရပါတယ်” ဟု ရှမ်းပြည်နယ်လက်ဖက်အစုအဖွဲ့မှ ဦးဘစီက တာချီလိတ်သတင်းအေဂျင်စီသို့ ပြောသည်။
လက်ဖက်စိုက်ပျိုးထုတ်လုပ်မှုတွင် လက်ဖက်အစိုထုတ်လုပ်မှု(၅၅)ရာခိုင်နှုန်း၊ နေလှန်းခြောက်၍ နေ့ချင်းခြောက်(စက်ဖြင့်) Green Tea လက်ဖက်ခြောက် ထုပ်လုပ်မှု (၃၅) ရာခိုင်နှုန်းနှင့် မီးဖိုခြောက်လက်ဖက်ခြောက် ထုတ်လုပ်မှု (၁၀) ရာခိုင်နှုန်းရှိကြောင်း သိရသည်။
“ဒီနှစ်က ဂျာမနီဘက်ကို စမ်းပြကြည့်တော့ သူတို့ကကြိုက်တယ်။ ပြည်ပဆိုရင် ဂျာမနီတစ်ခုပဲ တင်ပို့ပေးနေတယ်။ ထိုင်းနဲ့ တရုတ်ကတော့ နမူနာစမ်းနေတယ်။ တင်ပို့ဖို့မဖြစ်နိုင်သေးဘူး။ ကျွန်တော်တ့ိုလည်း မလုပ်နိုင်သေးဘူး။ ဒီနှစ်က ဂျာမနီကိုတင်ပို့တာ ဈေးလည်း အရင်နှစ်ထက်ပိုရပါတယ်” ဟု ရှမ်းပြည်နယ် လက်ဖက်အစုအဖွဲ့မှ ဦးဘစီက ပြောသည်။
ရှမ်းပြည်နယ်အတွင်းရှိ လက်ဖက်အများဆုံး စိုက်ပျိုးသောမြို့နယ်များဖြစ်သည့် ကျောက်မဲနှင့် နမ့်ဆန်တွင် ဧကပေါင်း (၈၀၀၀၀) ကျော်၊ ပင်းတယတွင် ဧကပေါင်း (၁၀၀၀၀)ကျော်၊ ရပ်စောက်တွင် ဧကပေါင်း (၆၀၀၀)၊ ပင်လောင်းနှင့် ရွာငံတို့တွင် ဧကပေါင်း(၆၀၀၀)ဝန်းကျင်အထိရှိကြောင်း သိရသည်။
ရှမ်းပြည်နယ်တွင်း လက်ဖက်စိုက်ပျိုးသည့်ဒေသများအနက် ယခုနှစ်အတွင်း အရည်အသွေးကောင်းစွာထွက်သည့် ပင်းတယဒေသထွက်လက်ဖက်ကို ပြည်ပတင်ပို့နေခြင်းဖြစ်ကြောင်း သိရသည်။
သတင်း #နိုနို
ဓါတ်ပုံ #နေဖြိုးမြင့်
~~~~~~~~~~~~~~~~~~ ေၾကာ္ျငာ ~~~~~~~~~~~~~~~~~~~~ 
