~~~~~~~~⊰❂ Unicode Version ❂⊱~~~~~~~~

တာချီလိတ်မြို့တွင် ဂီတဝါသနာပါသည့် လူငယ်များအား စနစ်တကျ သီဆိုနိုင်ရန်အတွက် ပြိုင်ပွဲ မဟုတ်သည့် Tachileik Talent Show အစီအစဉ်ကို ၂၀၁၉ခုနှစ် ဖေဖော်ဝါရီလ(၂)ရက်နေ့ ညက ဒုတိယပတ် အဖြစ် ကျင်းပပြုလုပ်ရာ သီဆိုဖျော်ဖြေသူ ဝါသနာရှင် လူငယ်(၁၀)ဦးရှိခဲ့ပြီး နောက်ပတ်များတွင် သီဆိုရန် အတွက် လာရောက် စုံစမ်းကာ စာရင်းပေးသူ စုစုပေါင်း (၃၀)ဝန်းကျင် ရှိကြောင်း သိရသည်။

"ဖုန်းဆက်ပြီး စာရင်းပေးတာရော၊ ဒီပွဲခင်းထဲမှာ ရောက်နေတာရောဆိုရင် (၃၀)ဝန်းကျင်ရှိပါတယ်။ တီးဝိုင်းနဲ့အသံ စစ်ဖို့ကိုတော့ လာမဲ့ အင်္ဂါနေ့မှန်းထားပါတယ်၊ ပထမတစ်ခေါက် အသံစစ်လို့ မအောင်ရင် စိတ်ဓာတ်ကျသွားစရာ မလိုပါဘူး၊ နောက်တစ်ခါ အသံစစ်တဲ့ အခါမှာလည်း ထပ်စစ်လို့ရပါတယ်။ အသံစစ်လို့ အောင်တဲ့သူတွေကို ကျွန်တော်တို့ ဒီနေရာမှာ သီဆိုခွင့်ပြုသွားမှာပါ၊ စာရင်းပေးထားသူက (၃၀)ဝန်းကျင်ရှိနေတော့ ရရှိထားတဲ့ အချိန်နဲ့က မလောက်ဖြစ်နေတယ်။ အဲ့ဒီတော့ ကျွန်တော်တို့ အသံအောင်တဲ့သူ တော်တော်များရင်တော့ လာမဲ့ တတိယအကြိမ်မှာ သောကြာ၊ စနေ လုပ်သွားဖို့တော့ စဉ်းစားထားပါတယ်။ မသေချာသေးပေမဲ့ နီးရင် ပြန်ပြောပေးမှာပါ"ဟု Tachileik Talent Show Team မှ အဆိုတော် ကိုအိုက်ထွန်းက ပြောသည်။

တာချီလိတ်မြို့၊ ဆန်ဆိုင်း(ခ)ရပ်ကွက်၊ ရှမ်းရိုးမကွင်း အနောက်ဘက်က Johnny Fitness Center ဝန်းထဲ၌ ပြုလုပ်သည့် Tachileik Talent Show တွင် သီဆိုရန်အတွက် အသံစစ်ခြင်းနှင့်အတူ သီချင်းတိုက်ပြီးသည့် လူငယ်အဆို ဝါသနာရှင် (၁၀)ဦးက သီဆိုရာ လူငယ်များဖြင့် အသစ်ဖွဲ့စည်းထားရှိသည့် A3N Band တီးဝိုင်းအဖွဲ့က တီးခတ်ပေးခြင်းဖြစ်ပြီး ဂီတစိတ်ဝင်စားသူများမှ လာရောက်အားပေးခဲ့ကြသည်။

Tachileik Talent Show တွင် လိုအပ်နေသည့် တီးဝိုင်းပစ္စည်းများအနက် တာချီလိတ် ဆန်ဆိုင်း(ခ)ရပ်ကွက်၊ ရှမ်းရိုးမကုန်တိုက် တိုက်တန်းတွင် ဖွင့်လှစ်ထားရှိသည့် Golden Land Music Stores ဂီတာဆိုင် မှ ကိုသန်းကိုက Bass Guitar တစ်လုံးကိုလည်း လှူဒါန်းပေးထားကြောင်း သိရသည်။

Tachileik Talent Show အစီအစဉ်သည် ပြိုင်ပွဲမဟုတ်ဘဲ အဆိုဝါသနာပါသူများနှင့် အတီး ဝါသနာ ပါသူများကို စနစ်တကျဖြစ်ရန်အတွက် စနေနေ့တိုင်းတွင် သီဆိုမှုများ မပြုလုပ်မိ တီးဝိုင်းများဖြင့် သီချင်း တိုက်ခြင်းများကို ပြုလုပ်ပေးသွားမည်ဖြစ်ပြီး အဆိုဝါသနာပါသူများ နှင့် အတီးဝါသနာပါသူများအား Tachileik Talent Show အဖွဲ့မှ စိစစ်လက်ခံကာ ဝါသနာပါသူ လူငယ်များနှင့် ပေါင်းစပ် ဆောင်ရွက်ပေးသွားမည် ဖြစ်ကြောင်း သိရသည်။

"Tachileik Talent Show ဆိုတာက ပြိုင်ပွဲ မဟုတ်ပါဘူး၊ ဝါသနာပါတဲ့ လူငယ်တွေကို စနစ်တကျ သီဆိုနိုင်အောင်၊ အတီးဝါသနာပါတဲ့ လူငယ်တွေကိုလည်း စနစ်တကျ တီးနိုင်အောင် ဝါသနာပါတူ လူငယ်အချင်းချင်း ထိတွေ့ပေးတာမျိုးတွေ လုပ်ပေးသွားမှာပါ။ စနေနေ့တိုင်း သီဆိုမှုတွေ မပြုလုပ်ခင်မှာ ကျွန်တော်တို့ စတူဒီယိုမှာ သီချင်းတိုက်တာတွေ အတီးတိုက်တာတွေ လုပ်ပေးမှာ။ တီးဝိုင်းတိုက်တာ၊ သီချင်းတိုက်တာတွေအတွက် Smile Studio က ပံ့ပိုးကူညီပေးပါတယ်၊ အဆိုဝါသနာရှင်များအနေနဲ့ ကျွန်တော်တို့ကို ဆက်သွယ်လို့ရပါတယ်။ ကျွန်တော်တို့က စိစစ်လက်ခံပေးသွားမှာပါ၊" ဟု အဆိုတော် အိုက်ထွန်းက ပြောသည်။

Tachileik Talent Show အစီအစဉ် တွင် ပါဝင်လိုသူ ဝါသနာရှင် လူငယ်များအနဖြေင့် ဆက်သွယ် မေးမြန်းလိုပါက ကိုအိုက်ထွန်း(အဆိုတော်) 095242273၊ ကိုကြီး (တေးရေး) 09250777919 နှင့် ကိုဂျော်နီ 095240445 သို့ ဆက်သွယ်နိုင်မည်ဖြစ်ကြောင်း သိရသည်။

Tachileik News Agency