~~~~~~~~⊰❂ Unicode Version ❂⊱~~~~~~~~

မန်လီရွာသား(၁၂)ဦးနှင့် နမ္မတူဒေသခံများအား လွှတ်ပေးရန် RCSS ကို တအာင်းလူမှုအဖွဲ့အစည်းများက ဆန္ဒထုတ်ဖေါ်တောင်းဆို
********
RCSS မှ ဖမ်းခေါ်ထားသည့် မန်လီရွာသား (၁၂)ဦးနှင့် နမ္မတူဒေသခံများအား လွှတ်ပေးရန်စာသားများပါသည့် ဗီနိုင်းများကိုင်ဆောင်၍ တအာင်းလူမှုအဖွဲ့အစည်းများက ရှမ်းပြည်နယ်မြောက်ပိုင်း၊ လားရှိုးမြို့တွင် ၂၀၁၉ ခုနှစ်၊ မတ်လ (၁၇)ရက်နေ့ နံနက်က ဆန္ဒဖေါ်ထုတ်ကြသည်။

နမ္မတူမြို့နယ်၊ မန်လီကျေးရွာအနီးတွင် ၂၀၁၉ ခုနှစ်၊ မတ်လ (၁) ရက်နေ့က ပျောက်ဆုံးသွားသည့် ရွာသား (၁၂) ဦးကို ဖမ်းဆီးထားခြင်းမရှိကြောင်း RCSS ကငြင်းထားသော်လည်း တအာင်းအရပ်ဖက်အဖွဲ့အစည်းများက ယင်းကဲ့သို့ ဆန္ဒထုတ်ဖေါ်လာခြင်းဖြစ်သည်။

"ကျွန်မတို့ စုံစမ်းသိရှိရသလောက် အထောက်အထားတွေအရ RCSS လက်နက်ကိုင်အဖွဲ့က ဖမ်းဆီးသွား တယ်လို့ ယုံကြည်ရပါတယ်။ အဲဒီလက်နက်ကိုင်အဖွဲ့နဲ့ တိုက်ရိုက်ဆက်သွယ်လို့မရပါဘူး။ သူတို့နဲ့ အဆက် အသွယ်ရှိတဲ့သူတွေဆီကနေ သတင်းတွေကို တစ်ဆင့်သိရတာ ဖြစ်ပါတယ်။ RCSS တပ်ဖွဲ့ကတော့ သူတို့ တပ်သားတွေက ရွာသားတွေကို မဖမ်းထားဘူးလို့ ငြင်းထားပါတယ်။ ဘယ်သူဖမ်းဖမ်း အဲဒီရွာသားတွေကို အမြန်ဆုံး ပြန်လွှတ်ပေးဖို့အတွက် တောင်းဆိုရခြင်းဖြစ်ပါတယ်" ဟု တအာင်းအမျိုးသမီးအဖွဲ့အစည်းမှ တွဲဘက် အထွေထွေ အတွင်းရေးမှူး ( ၁ ) မလွေးပိုးကမေဲ့ခြိုဝ်းက တာချီလိတ်သတင်းအေဂျင်စီသို့ ပြောသည်။

ကြွေးကြော်သံများကိုင်ဆောင်ထားသူများက လားရှိုးမြို့၊ အမှတ် (၁) ရပ်ကွက် အာဇာနည်ကျောက်တိုင်ကွင်းရှေ့မှ ပြည်ထောင်စုလမ်းမကြီးအတိုင်း ပြည်ထောင်စုအားကစားကွင်းအထိ နံနက် (၉) နာရီမှစ၍ ငြိမ်းချမ်းစွာ စီတန်းလှည့်လည်ကြကာ နေ့လယ် (၁၂)နာရီတွင် ဆန္ဒထုတ်ဖေါ်မှုပြီးဆုံးကြောင်း သိရသည်။

နမ္မတူမြို့နယ်အတွင်း ၂၀၁၉ ခုနှစ်၊ ဖေဖေါ်ဝါရီလ (၂၆) ရက်မှ မတ်လ (၃) ရက်နေ့အထိ TNLA နှင့် RCSS တို့ တိုက်ပွဲများဖြစ်ခဲ့သဖြင့် မန်လီရွာသားများအား RCSS က ဖမ်းဆီးခြင်းဖြစ်သည်ဟု ယုံကြည်ကြောင်း ဆန္ဒထုတ်ဖေါ်သူများက ဆိုသည်။

တအာင်း လူမှုအဖွဲ့အစည်းများဖြစ်သည့် တအာင်း အမျိုးသမီး အဖွဲ့အစည်း၊ တအာင်း ကျောင်းသားနှင့် လူငယ်အဖွဲ့အစည်း၊ တအာင်း ပညာရေး အင်စတီကျုနှင့် Ta'ang Legal Aid အဖွဲ့အစည်းတို့ ပူးပေါင်းပါဝင်သည့်အဖွဲ့က သက်ဆိုင်ရာထံ ခွင့်ပြုချက်ရယူပြီး ဆန္ဒထုတ်ဖေါ်ကြခြင်းဖြစ်ကြောင်း သိရသ်ည။

သတင်း #နေဖြိုးမြင့်
ဓါတ်ပုံ- ရွှေမင်းသား