~~~~~~~~⊰❂ Unicode Version ❂⊱~~~~~~~~

ထိုင်းနိုင်ငံတွင် တောင်းရမ်းစားသောက်သူများအား ဒဏ်ငွေနှင့် ထောင်ဒဏ်ချမှတ်မည့် ဥပဒေသစ် ရက် (၉၀)အတွင်း သက်ဝင်မည်
***************
ထိုင်းနိုင်ငံတွင် ပြဌာန်းလိုက်သည့်ဥပဒေသစ်အရ တောင်းရမ်းစားသောက်သူများအနေဖြင့် ဒဏ်ငွေနှင့် ထောင်ဒဏ်တို့ကို ရင်ဆိုင်ရမည်ဖြစ်ပြီး တောင်းရမ်းသူများအား ပေးကမ်းခြင်းမှာ တရားမဝင်အလုပ်ဖြစ်ကြောင်း လူထုအား အသိပေးမှုလုပ်ဆောင်နေပြီဖြစ်သည်။

အဆိုပါ ဥပဒေသစ်မှာ ရက်ပေါင်း (၉၀)အတွင်း သက်ဝင်လာမည်ဖြစ်၍ တောင်းရမ်းစားသောက်သူများအား ပေးကမ်းခြင်းနှင့် ပတ်သက်၍ လူထုအသိပညာပေးခြင်းတွင် ဘုန်းတော်ကြီးကျောင်းများမှလည်း လုပ်ဆောင်ပေးကြရန် အကူအညီရယူထားကြောင်း သိရသည်။

တောင်ရမ်းစားသောက်သူများအား ကူညီလိုသူများအနေဖြင့် လူမှုကူညီရေးဌာနကဆောင်ရွက်နေသည့် တောင်းရမ်းစားသောက်သူအတွက် သက်မွေးဝမ်းကြောင်းအလုပ်အကိုင်ဖန်တီးပေးရေးစင်တာသို့ လှူဒါန်းကြရန်ကိုလည်း တိုက်တွန်းထားသည်။

ပေးကမ်းစွန့်ကြဲခြင်းကုသိုလ်ပြုလုပ်လိုသူများရှိတတ်သည့် ဘုန်းကြီးကျောင်းများ အနီးတစ်ဝိုက်နှင့် လူစည်ကားရာနေရာများတွင် ရှိတတ်သည့် တောင်းရမ်းစားသောက်သူများစာရင်းကို ဒေသတာဝန်ရှိသူများက ရယူထားပြီး ၎င်းတို့အနေဖြင့်တောင်းရမ်းစားသောက်ခြင်းမပြုလုပ်ရန်နှင့် သက်မွေးဝမ်းကြောင်း လုပ်ဆောင်နိုင်ရန် စီစဉ်ပေးမည်ဖြစ်ကြောင်း သိရသည်။

တောင်းရမ်းသူများအား ပေးကမ်းခြင်းမပြုရန် အသိပေးကြော်ငြာများကိုလည်း အင်္ဂလိပ်၊ တရုတ်၊ ဂျပန်၊ ကိုရီးယား၊ ကမ္ဘောဒီးယားနှင့် မြန်မာဘာသာများဖြင့်ပါ ရေးသားအသိပေးခြင်းကို လေဆိပ်များအပါအဝင် ခရီးသွားအများစုရောက်ရှိရာနေရာများတွင် ကပ်ထားတော့မည်ဖြစ်ကြောင်း သိရသည်။

တောင်းရမ်းစားသောက်သည်ကို တွေ့ရှိပါက ပထမအကြိမ်တွင် ဒဏ်ငွေ ဘတ် (၅၀၀)၊ ဒုတိယအကြိမ်တွင် ဒဏ်ငွေ ဘတ် (၂၀၀၀)၊ တတိယအကြိမ်တွင် ဒဏ်ငွေ ဘတ် (၅၀၀၀)နှင့် ယင်းထက်ကျော်လွန်ပါက ဒဏ်ငွေ ဘတ် (၁၀၀၀၀)အထိ အရေးယူနိုင်မည့်အပြင် ထောင်ဒဏ် (၁)လလည်း ကျခံရဖွယ်ရှိကြောင်း သိရသည်။

Tachileik News Agency
Ref: The Nation