~~~~~~~~⊰❂ Unicode Version ❂⊱~~~~~~~~

ကုလသမဂ္ဂလမ်းအန္တရာယ်ကင်းရှင်းရေးရက်သတ္တပတ်အဖြစ် မိုင်းယောင်းတွင် ယာဉ်လမ်းအန္တရာယ်ကင်းရေး အသိပညာပေး
*************
ရှမ်းပြည်နယ်အရှေ့ပိုင်း၊ တာချီလိတ်ခရိုင်၊ မိုင်းယောင်းမြို့တွင်  ကုလသမဂ္ဂလမ်းအန္တရာယ်ကင်းရှင်းရေး ရက်သတ္တပတ်အဖြစ် ၂၀၁၉ ခုနှစ်၊ မေလ (၁၂)ရက်နေ့က ခရိုင်၊မြို့နယ် ဌာနဆိုင်ရာများ ပူးပေါင်းပါဝင်သည့်အဖွဲ့ဖြင့် ယာဉ်၊လမ်းအန္တရာယ်အသိပညာပေးဆောင်ရွက်သည်။

“လူ့အသက်တွေကယ်ဆယ်ဖို့ Road Safety အကြောင်းများများပြောကြစို့” ခေါင်းစဉ်ဖြင့်  ယာဉ်၊လမ်း ဘေးအန္တရာယ်ကင်းစေရေးအတွက် အသိပညာပေးခြင်းလုပ်ငန်းကို အမှတ်(၈)ရပ်ကွက် ဗလမင်းထင်လမ်းဆုံ၌ ဆောင်ရွက်ကြရာတွင်  မော်တော်ယာဉ်များ မောင်းနှင်အသုံးပြုရာတွင် သတ်မှတ်စည်းကမ်းများနှင့်အညီ လိုက်နာမောင်းနှင်ကြရန်၊ ဆိုင်ကယ်များ မောင်းနှင်စီးနင်းရာတွင် ဆိုင်ကယ်စီးဦးထုပ်ဆောင်းကြရန်၊ မေးသိုင်းကြိုးများတပ်ဆင်ကြရန်၊ နှစ်ဦးထက်ပိုမစီးကြရန် အသိပညာပေး လက်ကမ်းစာစောင်များဖြန့်ဝေပေးခြင်းနှင့် ယာဉ်အန္တရာယ်၊ လမ်းအန္တရာယ်ကင်းရှင်းစေရေး ယာဉ်မောင်းသူများ လိုက်နာရမည့် အသိပညာပေးစတေကာများ ကပ်ခြင်းတို့ကို ဆောင်ရွက်ကြခြင်းဖြစ်သည်။

အဆိုပါလှုပ်ရှားမှုကို ကုန်းလမ်းပို့ဆောင်ရေးညွှန်ကြားမှုဦးစီးဌာန တာချီလိတ်ခရိုင်ဦးစီးမှူး ဦးစိုင်းလုံးကျောက် ဦးဆောင်သော ဝန်ထမ်းများ၊ ခေတ္တမြို့နယ်အုပ်ချုပ်ရေးမှူး ဦးသုနောင်မိုးလှိုင်၊ မြို့နယ်ရဲတပ်ဖွဲ့မှူး ရဲမှူးနိုင်ဝင်းနှင့် တပ်ဖွဲ့ဝင်များ၊ မြို့နယ်စည်ပင်သာယာရေးကော်မတီဥက္ကဌ ဦးထွန်းညိုနှင့် အမှုဆောင်အရာရှိ ဦးကျော်ကျော်၊ မြို့နယ်မီးသတ်ဦးစီးဌာနမှ တာဝန်ရှိသူများနှင့် ဌာနဆိုင်ရာပူးပေါင်းအဖွဲ့တို့ ပူးပေါင်းပါဝင်ကြခြင်းဖြစ်သည်။

ကမ္ဘာ့ယာဉ်အန္တရာယ်၊ လမ်းအန္တရာယ်ကင်းရှင်းရေး “5th UN Global Road Safety Week” ရက်သတ္တပတ်လှုပ်ရှားမှုကို ၂၀၁၉ ခုနှစ်၊ မေလ (၆) ရက်နေ့မှ (၁၂) ရက်နေ့အထိ ကမ္ဘာတလွှားတွင် ဆောင်ရွက်နေကြခြင်းဖြစ်သည်။

သတင်း၊ဓါတ်ပုံ #အားချာ(မိုင်းယောင်း)