~~~~~~~~⊰❂ Unicode Version ❂⊱~~~~~~~~

ကျောက်မဲမြို့နယ် ကော်ပေါင်ရွာတွင် လူငယ်နှစ်ဦး မိုင်းနင်းမိပြီး တစ်ဦးသေ၊ တစ်ဦးဒဏ်ရာရ
**************
ရှမ်းပြည်နယ်(မြောက်ပိုင်း) ကျောက်မဲမြို့နယ်၊ ကော်ပေါင်ကျေးရွာအနီးတွင် ၂၀၁၉ ခုနှစ်၊ သြဂုတ်လ (၂၀) ရက်နေ့က စားကျက်လွှတ်ထားသော မြင်းများအားသွားရောက်ရှာဖွေသည့် လူငယ်အမျိုးသား (၂) ဦး မိုင်းနင်းမိပေါက်ကွဲ၍ တစ်ဦးသေဆုံးကာ တစ်ဦးဒဏ်ရာရရှိသွားသည်။

"ရွာနီးစပ်ကတောထဲမှာ သူတို့လွှတ်ထားတဲ့မြင်းတွေ ပျောက်နေလို့လိုက်ရှာရင်းနဲ့ ပေါက်ကွဲမှုဖြစ်တာလို့ သိရတယ်။ တစ်ဦးကတော့ နေရာတင် သေဆုံးတယ်။ ရွာဓလေ့အတိုင်း ပြုလုပ်မယ်ဆိုတာနဲ့ ဆေးရုံကို မသယ် လာရဘူး။ ဒဏ်ရာရသူတစ်ဦးကိုတော့ ကျောက်မဲပြည်သူ့ဆေးရုံကို ဒီမနက်မှာ ပို့ပေးထားနိုင်ပါတယ်" ဟု မိုင်းစထိမှန်ဒဏ်ရာရသူအား သွားရောက်သယ်ဆောင်ပေးခဲ့သည့် ဇီဝိတ လူမှုကူညီရေးအသင်း ( ကျောက်မဲ ) မှ ကိုစောမင်းကြူက တာချီလိတ်သတင်းအေဂျင်စီသို့ ပြောသည်။

ကျောက်မဲမြို့၏ မြောက်ဘက်ရှိ ကော်ပေါင်ကျေးရွာအနီး တောစပ်ထဲတွင် သြဂုတ်လ (၂၀) ရက်နေ့ နေ့လယ် (၁၂)နာရီခွဲဝန်းကျင်က မိုင်းပေါက်ကွဲသွားသဖြင့် မြင်းသွားရှာသည့် ကော်ပေါင်ရွာမှ အသက် (၂၂) နှစ်အရွယ် ဇာလိန္ဒသည် နေရာတွင် သေဆုံးခဲ့ပြီး အသက် (၁၆) နှစ်အရွယ် မောင်အောင်စိုးမှာ ခြေထောက်နှစ်ဖက်လုံး မိုင်းစထိမှန်ဒဏ်ရာရသွားခြင်း ဖြစ်သည်။

ဒဏ်ရာရရှိသူအား ကျောက်မဲမြို့ရှိ မြန်မာနိုင်ငံ ကြက်ခြေနီအသင်းအဖွဲ့သားများနှင့် ဇီဝိတလူမှုကူညီရေး အသင်းတို့က သွားရောက်သယ်ဆောင်ပေးခဲ့ခြင်းဖြစ်ပြီး ၎င်းမိုင်းပေါက်ကွဲမှုဖြစ်သည့်ကျေးရွာအနီးတွင် သြဂုတ်လ (၂၁)ရက်နေ့မှ သြဂုတ်လ (၂၁)ရက်နေ့ နံနက်ပိုင်းအထိ ပစ်ခတ်မှုများ ရှိနေဆဲဖြစ်သည်။

သတင်း #နေဖြိုးမြင့်
ဓါတ်ပုံ - SMK