~~~~~~~~⊰❂ Unicode Version ❂⊱~~~~~~~
~

မန္တလေး - လားရှိုးလမ်းမှ မိုင်းခွဲခံထားရသည့် ဂုတ်တွင်းတံတားနေရာတွင် ယာယီဘေလီတံတားကို နေ့၊ည အဆိုင်းခွဲ၍ တည်ဆောက်နေ
**********
ရှမ်းပြည်နယ် (မြောက်ပိုင်း) နောင်ချိုမြို့နယ်အတွင်းရှိ မန္တလေး - နောင်ချို - လားရှိုးလမ်းမှ မိုင်းခွဲခံထားရသည့် ဂုတ်တွင်းတံတားနေရာတွင် ယာယီဘေလီတံတားတည်ဆောက်ခြင်းလုပ်ငန်းကို ၂၀၁၉ ခုနှစ်၊ သြဂုတ်လ (၁၈)ရက်နေ့တွင် နေ့ဆိုင်း၊ ညဆိုင်းဖြင့် ဆောင်ရွက်နေသည်။

ယာယီဘေလီတံတားမှာ အရှည်(၂၁၀)ပေရှိသည့် နှစ်လမ်းသွား သံဘောင်ဘေလီတံတားဖြစ်ပြီး မိုင်းခွဲခံထားရသည့်တံတားအစား နှစ်လမ်းသွား သံကူကွန်ကရစ်တံတားကို ပြန်လည်တည်ဆောက်မည်ဖြစ်ကြောင်း သိရသည်။

ရှမ်းပြည်နယ်(မြောက်ပိုင်း) ပြည်ထောင်စုလမ်းမကြီးတလျှောက် ပစ်ခတ်တိုက်ခိုက်မှုများဖြစ်ပွားနေပြီး သြဂုတ်လ (၁၅)ရက်နေ့က နယ်စပ်ကုန်သွယ်ရေးလမ်းမကြီး၏ မန္တလေး - လားရှိုးလမ်းပိုင်းမှ ဂုတ်တွင်းတံတား၊ သြဂုတ်လ (၁၇)ရက်နေ့တွင် လားရှိုးခရိုင်၊ သိန္နီမြို့နယ်ရှိ သိန္နီ - ကွမ်းလုံ - ချင်းရွှေဟော်လမ်း၊ မိုင်တိုင်(၃၀/၇ - ၃၁/၀)ကြား ၊ နားတီးရွာအထွက်မှ တံတား၊  သိန္နီနှင့် ကွမ်းလုံမြို့နယ်အတွင်း သိန္နီ - ကွမ်းလုံ - ချင်းရွှေဟော်လမ်း မိုင်တိုင်(၁၅/၃-၄) ၊ ကောင်းကော်ရွာ နှင့် နမ့်တုန်ဆုံရွာကြားရှိ တံတားနှင့် မိုင်တိုင်(၄၀/၃-၄) ကြား ဗြုန်းတောင်အတွင်းရှိ တံတားတို့မှာလည်း မိုင်းခွဲဖျက်ဆီးခံရသဖြင့် အဆိုပါတံတားများနေရာတွင် ယာယီဘေလီတံတားများထိုးပေးရန် စီစဉ်နေခြင်းဖြစ်သည်။

TNLA၊ AA နှင့် MNDAA တို့ ပူးပေါင်းအဖွဲ့က ရှမ်းပြည်နယ်မြောက်ပိုင်း ပြည်ထောင်စုလမ်းမကြီးတလျှောက် ပစ်ခတ်တိုက်ခိုက်မှုများအတွင်း တံတားများကို မိုင်းခွဲဖျက်ဆီးခံရမှုကြောင့် လမ်းပန်းဆက်သွယ်ရေးများ ပြတ်တောက်နေပြီး တရုတ်နယ်စပ်ကုန်သွယ်ရေးလည်း ရပ်ဆိုင်းနေခြင်းဖြစ်သည်။

Tachileik News Agency
ဓါတ်ပုံ - ဆောက်လုပ်ရေးဝန်ကြီးဌာန