ကျောက်ဆည်မြို့ အေးမြကြည်လင်ရပ်ကွက်တွင် ငလျင်လှုပ်ခတ်မှုကြောင့် ပြိုကျ၍ သေဆုံးခဲ့ရသည့် Bright Kids မူကြိုကျောင်းမှ ကလေးငယ်(၂၅)ဦး၊ ဆရာမတစ်ဦးနှင့် အမျိုးသမီးတစ်ဦးတို့အတွက် ယနေ့ ၂၀၂၅ခုနှစ် ဧပြီလ (၂)ရက်နေ့ နံနက်ပိုင်းတွင် တရားနာအမျှဝေ၍ အမိန့်စာထုတ်ပြန်သည်ဟု သိရသည်။
သေဆုံးသွားသည့် ကလေးလေး (၂၅)ဦး၊ ဆရာမတစ်ဦးနှင့် ကျောင်းမုန့်စျေးတန်းမှ အမျိုးသမီးတစ်ဦးတို့အတွက် ရည်စူး၍ ကျောင်းတည်ထောင်သူ မိသားစုများနှင့် အတူပူးပေါင်းကာ အမျှဝေအမိန့်စာ ထုတ်ပြန်ခြင်းဖြစ်သည်ဟု သိရသည်။
မတ်လ(၂၈)ရက်နေ့ နေ့လယ်ပိုင်းက အင်အားပြင်းငလျင်လှုပ်ခတ်မှုကြောင့် ပြိုကျသွားသည့် နှစ်ထပ်ခွဲတိုက် မူကြိုကျောင်းအား ရှာဖွေကယ်ဆယ်မှုလုပ်ဆောင်ခဲ့ရာ အသက်ရှင်သည့် ကလေးငယ်တချို့ကို ကယ်ထုတ်နိုင်ခဲ့ကြသည်ဟု သိရသည်။
ငလျင်ဒဏ်ကြောင့် ပြိုကျသွားသည့် အဆောက်အဦးအောက်တွင် ကလေးတချို့၏ ရုပ်အလောင်းများအားသယ်ထုတ်ရာ ခန္ဓာကိုယ်အစိတ်အပိုင်းများပင် မပါရှိတော့ဟု သိရသည်။
Bright Kids မူကြိုကျောင်းတွင် ဆရာမ(၅)ဦးရှိသည့်အနက် တစ်ဦးမှာ သေဆုံးသွားခဲ့ရပြီး ကျန်ဆရာမ(၄)ဦးမှာ လက်ကျိုး၊ ဆီးအိမ် အက်ဒဏ်ရာ၊ ခေါင်းနှင့်ကြော ပြင်းထန်ဒဏ်ရာ၊ ကျောပြင် နှင့် မျက်လုံး ဒဏ်ရာများ ရရှိထားကြောင်း သိရသည်။
"မူကြိုကျောင်းမှာ ရှိတာမှ ဆရာမ (၅)ဦးပဲ ရှိတာပါ။ တစ်ဦးပဲ ဆုံးရှုံးတာပါ။ ကလေးတွေကို ကာကွယ်ပေးရင်း ဆုံးရှုံးသွားတာပါ။ ဒီကနေ့ ညနေပဲ ဆရာမလေးရဲ့ နာရေးကို ပို့ဆောင်ပေးခဲ့ပါတယ်။ ဆရာမတစ်ဦးက နှလုံးရောဂါအခံရှိလို့ မန္တလေးဆေးရုံကြီးမှာ တက်ရောက် ဆေးကုသမှုခံနေရပါတယ်။ ဆရာမတစ်ဦးက ခါးထိထားပြီး တစ်ဦးက လက်ထိထားပါတယ်။ ဒီစာရင်းက ကျောင်းက အတည်ပြုပေးထားတဲ့စာရင်းပါ။"ဟု သတင်းအမှားများ ထွက်ပေါ်မှုနှင့် ပတ်သက်ပြီး ကျောက်ဆည် Bright Kids ကိုယ်ပိုင်ကျောင်းမှ ပန်းချီနည်းပြဆရာ တစ်ဦးက ရှင်းပြပြောဆိုထားသည်။
နိုင်ငံအတွင်း ၂၀၂၅ခုနှစ် မတ်လ(၂၈)ရက်နေ့မှ ဧပြီလ(၁)ရက်နေ့ နံနက်(၈)နာရီအထိ ရှာဖွေတွေ့ရှိထားသည့် လူသေဆုံးမှု အရေအတွက်မှာ (၂၇၁၉)ဦး ရှိကြောင်း စစ်ကောင်စီက သတင်းထုတ်ပြန်ထားသည်။
Photo: Zu Zu Soe , CJ
