ငလျင်ဒဏ်ကြောင့် အကူအညီများစွာ လိုအပ်နေသည့် တောင်ကြီးခရိုင်အတွင်း စစ်ကောင်စီတပ်နှင့် ပအိုဝ်းပြည်သူ့စစ် (PNO)တပ်ဖွဲ့က ရေပူကျေးရွာ နှင့် ဘုရားတောင်ကျေးရွာတို့ကို (၂)ရက်ဆက်တိုက် ဒရုန်းအပါအဝင် လက်နက်ကြီးများဖြင့် ပစ်ခတ်တိုက်ခိုက်မှုများ လုပ်ဆောင်၍  နေအိမ်များ ထိခိုက်ပျက်စီးမှုများ ဖြစ်ပေါ်ခဲ့ရကြောင်း သိရသည်။

စစ်ကောင်စီတပ်နှင့် ပအိုဝ်းပြည်သူ့စစ် (PNO) ပူးပေါင်းအဖွဲ့သည့် ရှမ်းပြည်နယ်(တောင်ပိုင်း) တောင်ကြီးခရိုင်အတွင်း ညောင်ရွှေမြို့နယ် ရေပူကျေးရွာကို ၂၀၂၅ခုနှစ် မတ်လ(၃၁)ရက်နေ့၏ တစ်နေ့တာအတွင်း ဒရုန်းဖြင့် (၈)ကြိမ် ကြဲချတိုက်ခိုက်ခဲ့ကြောင်း သိရသည်။

ဗုံးကြဲချတိုက်ခိုက်မှုကြောင့် ရေပူကျေးရွာမှ ဒေသခံပြည်သူများ၏ နေအိမ် (၂)လုံး ထိခိုက်ပျက်စီးခဲ့ရကြောင်း သိရသည်။

အလားတူ မတ်လ(၃၀)ရက်နေ့ နံနက်(၆)နာရီအချိန်ကလည်း ညောင်ရွှေမြို့နယ်အတွင်း အင်လေးတောင်ဖက်ခြမ်းရှိ ဘုရားတောင်ကျေးရွာကို စစ်ကောင်စီတပ် နှင့် PNO ပြည်သူ့စစ် ပူးပေါင်းအဖွဲ့က တိုက်ပွဲဖြစ်ပွားခြင်းမရှိဘဲ ဒရုန်း နှင့် လက်နက်ကြီးတို့ဖြင့် (၆)ကြိမ် ပစ်ခတ်တိုက်ခိုက်မှုများ လုပ်ဆောင်ခြင်းကြောင့် နေအိမ်(၁)လုံး ထိမှန်ပျက်စီးခဲ့ရကြောင်း အင်းလေးဒေသလူ့အခွင့်အရေး(The Human Right of Inle Region )အဖွဲ့က ထုတ်ပြန်ထားသည်။

ငလျင်ဒဏ်ကြောင့် အင်းလေးဒေသတွင်း ထိခိုက်သေဆုံးမှုများ နှင့် ပတ်သက်ပြီး အင်းလေးဒေသလူ့အခွင့်အရေးမှ တကယ့်မြေပြင်အခြေအနေကို အခြေခံပြီး ရရှိထားသည့် စာရင်းများအရ သေဆုံးသူ (၈၉)ဦးရှိပြီး အလုံးစုံ ပြိုကျပျက်စီးသည့် နေအိမ်နှင့် လူနေမရသည့် အခြေအနေဖြစ်နေသည့် နေအိမ် စုစုပေါင်း (၂၃၃၇)လုံး ရှိကြောင်း သိရသည်။

#TachileikNewsAgency

Photo:အင်းလေးဒေသလူ့အခွင့်အရေး