အင်အားပြင်းငလျင်လှုပ်ခတ်မှုကြောင့် စစ်ကိုင်းမြို့တွင် သေဆုံးသူ(၁၀၀၀)ဝန်းကျင်အထိရှိနေပြီး မန္တလေးအထိ ပို့ဆောင်သင်္ဂြိုလ်နေရသည်ဟု စစ်ကိုင်းမြို့တွင်း ကယ်ဆယ်ရေးလုပ်နေသူများထံမှ သိရသည်။
လက်ရှိတွင် အလောင်းများကိုသယ်ထုတ်နေရသေးပြီး ဆက်လက်ကယ်ဆယ်ရေးလုပ်ဆောင်နေရကာ သေဆုံးစာရင်းကို အတိတကျမသိနိုင်သေးဟုလည်း ဆိုသည်။
“သေဆုံးသူ ၁၀၀၀ လောက်ရှိတယ်ဗျ။ ဒါမထုတ်ရသေးတဲ့သူတွေအပါပေါ့။ ခန့်မှန်းခြေဗျ။ ဒီနေ့ဘုန်းကြီးကျောင်းတွေ၊ မယ်သီလရှင်ကျောင်းတွေနဲ့ ဗလီတွေကျန်နေသေးတယ်။ ဗလီတွေကတော့ မနေ့ကတော့ ရဲအင်အားနဲ့ ထုတ်တော့ထုတ်တယ်။”ဟု စစ်ကိုင်းမြို့တွင် ကယ်ဆယ်ရေးလုပ်ပေးနေသူတစ်ဦးက Tachileik News Agency ကိုပြောသည်။
စစ်ကိုင်းမြို့ရှိ စစ်ကောင်စီ တပ်မ(၃၃)ဘေးတွင် စစ်ကိုင်းမြို့၏ သင်္ချိုင်းကို သွားသောလမ်းဖြစ်ပြီး အဆိုပါလမ်းသည် ရှိန်းမကား၊ မင်းကွန်းတို့ဘက်သို့ သွားလာနိုင်သဖြင့် စစ်ကောင်စီတပ်က ဘူဒိုဇာနှင့်ထိုး၍ ဖျက်ဆီးထားခြင်းကြောင့် ရုပ်အလောင်းများကို မန္တလေးမြို့သို့ ပို့ဆောင်သင်္ဂြိုလ်နေရခြင်းဖြစ်သည်ဟု သိရသည်။
“မန္တလေးဘက်နဲ့ ချိတ်ဆက်ပြီး ကူညီရေးအသင်းတွေက လာလာပြီး သယ်သွားတာပေါ့။ တံတားကပဲသယ်တာ။ ရဲတွေနဲ့ ကူညီရေးအသင်းတွေနဲ့ သယ်ထုတ်နေတာ။ စစ်ကိုင်းတံတားသစ်ကနေပဲ သယ်ထုတ်နေတာပါ။”ဟု ၎င်းကဆက်ပြောသည်။
ခရိုင်ချင်းဆက်လမ်းများကို စစ်ကောင်စီတပ်မ(၃၃)က ဘူဒိုဇာနှင့်ဖျက်ဆီးထားသဖြင့် မန္တလေး အမရပူရ ဘုံးအိုးရွာတွင် သွားရောက်သင်္ဂြိလ်ရသည်မှာ တစ်နှစ်နီးပါးရှိပြီဟု ဆိုသည်။
“အခုထိထိတော့ ကယ်ထုတ်နေတုန်းဗျ။ ပြီးတော့ အိမ်ပါသွားတဲ့သူတွေက နေစရာ စားစရာ အခက်အခဲရှိနေတယ်။ အသက်ရှင်ကျန်ရစ်သူတွေကို ကျွန်တော်တို့ ဘာမှမလုပ်ပေးနိုင်သေးဘူး။ သူတို့အဆင်ပြေသလို ကွင်းပြင်မှာ တဲထိုးပြီးနေကြရတယ်။”ဟု ကယ်ဆယ်ပေးနေသူတစ်ဦးက ပြောသည်။
ထို့အပြင် စစ်ကိုင်းတံတားသစ်၏ ယှဉ်းကပ်လမ်းများကွဲအက်သွားခြင်းနှင့် ကြံခိုင်မှုမကောင်းခြင်းတို့ကြောင့် သေဆုံးသူများ၏ မိသားစုဝင်မျာမှာ လိုက်ပါ၍မရဘဲ အစ္စလာမ်ဘာသာဝင်များမှာလည်း ဘာသာရေးအရ သင်္ဂြိုလ်ခွင့်မရ ဖြစ်နေသည်ဟု ဒေသခံတစ်ဦးက ဆိုသည်။
“အလောင်း ၁၅၀ ကျော်ဆွဲထုတ်ပြီးပြီ။ မင်းလမ်းရပ်ကွက် ဗလီရယ် မြို့မ၊ မိုးကျနဲ့ မြို့တော်ဗလီ ၃ လုံးပါ။ အလောင်း ၂၀၀ ကျော်မယ်လို့ ခန့်မှန်းထားပါတယ်။”ဟု ဒေသခံတစ်ဦးက Tachielik News Agency ကိုပြောသည်။
မြန်မာနိုင်ငံအတွင်း ၂၀၂၅ခုနှစ် မတ်လ(၂၈)ရက်နေ့ မြန်မာစံတော်ချိန် နေ့လယ်(၁၂)နာရီ (၅၁)မိနစ် (၀၂)စက္ကန့် အချိန် က မန္တလေးမြေငလျင်စခန်းမှ အရှေ့မြောက်ဘက် (၂၁)ကီလိုမီတာခန့် ကွာဝေးသော မြန်မာနိုင်ငံပြည်တွင်း (မန္တလေးမြို့၏ အရှေ့ မြောက်ဘက် (၂၀) ကီလိုမီတာခန့်အကွာ)တွင် အင်အား ရစ်(ခ်)တာစကေး (၇.၇) အဆင့်ရှိသည့် အင်အားအလွန်ပြင်းထန် ငလျင်လှုပ်ခတ်သွားခြင်းဖြစ်သည်။
မြန်မာနိုင်ငံတဝှမ်းလုံးနီးပါး ငလျင်ဒဏ်ကို ခံစားခဲ့ရပြီး မန္တလေး၊ စစ်ကိုင်း၊ မကွေးနှင့် ရှမ်းတောင်တို့တွင် အပျက်အစီးများကာ လူထိခိုက်သေဆုံးမှုများနေသည်။
စစ်ကောင်စီ၏ ထုတ်ပြန်ချက်အရ မန္တလေးတိုင်းအတွင်း အင်အားပြင်းငလျင်ဒဏ်ကြောင့် လူပေါင်း(၁၆၄၄)ဦး သေဆုံးပြီး (၃၄၀၈)ဦး ဒဏ်ရာရကာ (၁၃၉)ဦး ပျောက်ဆုံးနေသည်ဟု ဆိုသည်။
#TachileikNewsAgency
