မြန်မာနိုင်ငံတွင်လှုပ်ခတ်ခဲ့သည့် အင်အားပြင်း ငလျင်ကြောင့် လူသားချင်းစာနာမှုဆိုင်ရာလုပ်ငန်းများကို အစောတလျင် လုပ်ဆောင်နိုင်ရန် သြစတြေးလျနိုင်ငံမှ ကနဦးဒေါ်လာ(၂)သန်းကို အပြည်ပြည်ဆိုင်ရာကြက်ခြေနီကော်မတီ(ICRC)မှတစ်ဆင့် ပေးအပ်မည်ဟု သိရသည်။ 

မြန်မာနိုင်ငံတွင် ဖြစ်ပွားခဲ့သော အင်အားပြင်းငလျင်ကြောင့် ထိခိုက်သေဆုံးမှုများအတွက် များစွာဝမ်းနည်းကြေကွဲရသည်ဟုလည်း ဆိုသည်။

သြစတြေးလျနိုင်ငံ၏ အကူအညီသည် ICRC အနေနှင့် အရေးပေါ်ကျန်းမာရေးဆိုင်ရာအကူအညီများ ပေးအပ်ခြင်းအပါအဝင် အသက်ကယ်ဆယ်ရေး ပံ့ပိုးမှုများကို ချက်ချင်းလုပ်ဆောင်နိုင်စေရန် အထောက်အကူဖြစ်စေမည်ဖြစ်သည်ဟု ဆိုသည်။

အမိုးအကာ၊ အစားအစာနှင့် သောက်သုံးရေတို့ကဲ့သို့သော အစောတလျင် လိုအပ်ချက်များကို ဖြည့်ဆည်းပေးနိုင်ရန်အတွက် UN Central Emergency Response Fund (CERF) မှ အမေရိကန်ဒေါ်လာ (၅)သန်းပေးအပ်ထားသည်။

သြစတြေးလျအနေဖြင့် မြန်မာစစ်အာဏာရှင်အဖွဲ့အစည်းထံသို့ မည်သည့်တိုက်ရိုက်အကူအညီမှ ပေးအပ်ခြင်းမရှိသလို မြန်မာနိုင်ငံအတွက် ၎င်းတို့၏ အကူအညီများသည် စစ်အာဏာရှင်အဖွဲ့အစည်းကို တရားဝင်စေမှုမဖြစ်စေရန် အသေအချာ ကြိုတင်ပြင်ဆင်ဆောင်ရွက်နေသည်ဟု ထုတ်ပြန်သည်။

စစ်ကောင်စီ၏ ယမန်နေ့ ညပိုင်းထုတ်ပြန်ချက်အရ ငလျင်ဒဏ်ကြောင့် မြန်မာတစ်နိုင်ငံလုံးတွင် သေဆုံးသူ(၁၆၄၄)ဦးရှိပြီး ဒဏ်ရာရသူ(၃၄၈၀)ဦးနှင့် ပျောက်ဆုံးနေသူ(၁၃၉)ဦးရှိသည်ဟု ဆိုသည်။

#TachileikNewsAgency